تبریز سسی خبر گروپونون یئددی ایللیگی ایله باغلی ساوی
یئددی ایل بوندان اؤنجه بئلنچی بیر گونده تبریز سسی خبر گروپو بیر وبلاگ اولاراق یایین حایاتینا باشلادی. بیر مدت سونرا چالیشمالارینا وب سایت اولاراق دوام ائدن تبریز سسی خبر گروپو هر زامان بیر اصلی گؤز اؤنونده ساخلاماغا چالیشدی؛ آزربایجانین میللی منفعتلری!
بو ایللر بویونجا چالیشدیق کی الیمیزدن گلدیگی قدر سسی بوغولموش و آغزینا مؤهور وورولموش آزربایجان تورک میلتینین سسی اولاق و ایرانچی ذهنیته منسوب اولان مدیانین آزربایجانا اویغلادیغی بایکوتو بیرشکلیده سیندیراق. بیزی بو یولا آددیم قویماغا یؤنلدن عامیل مللتیمیزه روا قیلینان میلی ظلم و حاقسیزلیق اولدو. نئجه اولار کی قوجا بیر میللت گؤز گؤره گؤره هر جهتدن ازیلسین و یوخلوغا محکوم ائدیلسین، ماددی و معنوی نه یی وارسا تالانسین و دارما داغین ائدیلسین و او میلتین خلف اؤولادلاری سسیز قالسینلار؟ بو سوال بو یولدا بیزیم بوتون ایراده میز و موتیواسیونوموز اولدو و اولاماغا دوام ائدیر.
شوکورلر اولسون کی بو گون یئددی ایل بوندان اؤنجه یه گؤره میللی بیلینج و اؤزه دؤنوش باخیمیندان چوخ داها ایره لی بیر نؤقطه ده‌ییک اما بیلیریک کی میللی قورتولوشوموزا قدر هله چوخ یولوموز وار و او زامانا دک‌ده بو یولجولوق دوام ائدجکدیر.
ادعامیز یوخدور کی بو ایللر بویونجا خطادان و سهودن ایراق اولموشوق، چونکو آتا بابا دئمیشکن “دولانان آیاغا داش‌دگر”، یالنیز ویجدانیمیز راحاتدیر کی بوتون چالیشمالاریمیزدا میللی ویجدان و اخلاقی اؤزوموزه قیلاووز ائدیب میللی چیخارلاریمیزا قوللوق ائتمگه چالیشمیشیق و بیر سهویمیز اولوبدورسا‌دا قاتی اوجا میلتیمیزین ارکینه سیغینمیشیق.
بو واسیطه ایله ایشه باشلاماغیمیزین یئددینجی ایلینده بیر داها بیلدیریریک کی سون نفسیمیزه قدر میللی اؤزگورلوگوموزون یولوندا موجادیله میزه دوام ائدیب بؤیوک آزربایجان تورک میللتینین قوللوغوندا اولاجاغیق. خالقیمیزین دوشمنلری بیلمه‌لیدیرلر کی آزربایجان تورک میللتی کئچمیشده اولدوغو کیمی گلجکده ده باشی اوجا و موقتدیر یاشایاجاقدیر چونکو اونون خلف اؤولادلاری هر زامان اونون خیدمتینده حاضیردیرلار.
یاشاسین آزربایجان تورک میللتی
یاشاسین آزربایجان میلی حرکتی
یاشاسین اؤزگورلوک
تبریز سسی خبر گروپو
۲ اسفندماه ۱۳۹۲