یامان گونلرده خالقی‌نین یانیندا دوران هر کس اونودولماییر …
بهرام اسدی
«آزربایجان اویاقدی تورپاغینا دایاقدی»
«تورک دیلینده مدرسه اولمالیدی هر کسه»
«آزربایجان وار اولسون ایسته‌مه‌ین کور اولسون»
«اورمیه تورکوندور تورکون قالاجاق»
«آزربایجان یوردوموز اورمودو بوزقوردوموز» وووو
جمعیت آز قاباغا گئتمیشدی دئمک سردار مسجدینین قاباغیندا امنیت گوجلری جمعیتین قاباغین کسدی و اونلاری دایاندیرماق ایسته‌دی.
جمعیتین بیر تعدادینین الینده مذهبی هیئتلرین پایلادیغی آغاجلار وار ایدی جمعیت همین آغاجلاری شاخسئیده اولدوغو کیمی توولاییب حیدر حیدر دئیه باغیردیلار امنیت قوه‌لری دالی چکیلدی جمعیته یول وئردی بو ایش بیر دفعه ده سرداران خیابانیندا بیر دفعه ده ایالت میدانینین گیریشینده تکرارلاندی آنجاق هر دفعه‌سینده امنیت گوجلری چکیلدی و جمعیته یول آچدی جمعیت ایالت میدانین دولدوردو ایالت میدانیندان مرکز میدانینا قدر و اطراف خیابانلار و کوچه‌لر جمعیت ایله دولموشدو جمعیت ایالت میدانیندا شعارلارین وئرندن سونرا بیرداها امام خیابانینا دؤندو و بازار آغزینا قدر شعار وئره وئره گئتدی و اوندان سونرا داغیلماغا باشلادی.
من ماشینیمی اطراف کوچه‌لرین بیرینده ساخلامیشدیم اورادا دایانان باشقا ماشینلارا دا دقت ایله باخدیم هامیسی اورمو پلاکلی ماشینلار ایدی و بو اوزدن بو جمعیتی اطراف شهرلردن گلمه دئیه‌نلرین سؤزلری یالاندیر من اؤزوم بونا تانیق اولدوم البته سونرالار ائشیتدیم کی تبریزدن گلن بیر چوخ اتوبوسو گئری قایتارمیش و اونلارا اورمویا گیرمگه امکان وئرمه‌میشدیلر بو توپلانتییا قاتیلانلار اورمو خلقی ایدی اونلارین سایین بئش یوز مین نفره قدر تخمین ائتدیلر و بو تک اورمو تاریخینین دگیل میلتچی و ملیتچی دئییلنلرین تاریخینده ان بؤیوک توپلانتی ساییلا بیلر.
جمعیت دریا کیمی قایناشیردی آنجاق واحد بیر تریبون یوخ ایدی جمعیتین الینده میکروفون یوخ ایدی و اونلارین سسی بیری بیرینه چاتمیردی اونا گؤره ده بو جمعیت دریاسی کیچیک بؤلمه‌لره بؤلونوب هر بؤلمه بیر آیری شعار وئریردی آنجاق بوتون شعارلارین ماهیتی و آنلامی «تورپاق داعواسی وطن سئوداسی» ایدی.
بو نئچه ساعاتلیق حرکتده بیر نمونه ده اولسون بئله اویغونسوز اولای چیخمادی بیر شوشه سینمادی و بیر نفرین بورنو قانامادی بو دا اورمو خلقی و تورک ملتینین اوستون مدنیتینین علامتیدیر.
بو مدنی حرکت دونیادا سسلندی دوست و دوشمن طرفیندن یوروملاندی اونا تپکی گؤسترنلرین سایی اولدوقجا چوخ اولدو.
بو حرکت اورمو هویت‌چیلری و اورمو مداحلارینین بیرلشدیگیندن یاراندی اورمو مسئوللارینین مسئولیت داشیدیقلاریندان یاراندی بونا گؤره ده بو ایکی قروپا تشکر ائتمه‌لی و اونلارین الین سیخماق لازمدیر اورمونون سوننی مذهب تورکلری ده بو جمعیتین بیر پارچاسی کیمی اؤز تورک قارداشلارینین یانیندا یئر آلدیلار.
اورمو مین دؤرد یوز دؤردونجو ایلین ایکینجی گونونده تاریخ یازدی اورمو اؤز کیملیگین گؤستردی اورمو اؤز وارلیغین مدافعه ائتدی.
ایندی قالیب تهرانداکی مسئوللارین بو حرکتی نه قدر دوغرو یوروملاماقلارینا یا دوغرو یوروملاییب گلن قرارلارین دوغرو وئررلر یا دا همین یانلیشلارین تکرار ائدیب سونوچلارینا قاتلاشارلار سئچیم اونلاریندیر آنجاق بیر گرچگی بیلسینلر کی بایرامین ایکینجی گونونده اورمو خلقینین بیر چوخ ساییسی بایرام گؤروشلرینده و اویان بویان مسافرتلرده اولوبلار. تهرانداکی‌لارین گلن قرارلاری دوغرو و حقیقته اویغون اولمازسا اورمو خلقینین گلن تپکیلری داها سرت و داها قالابالیق اولا بیلر بونو دوغرو دوشونوب اونا گؤره قرار وئرسینلر.
