پیشه‌وری‌نین نادره‌سی و گئچمیشدن گونوموزه قادینلارین اؤزگورلوک موجادیله‌سی
👤 گون‌آی قاراداغلی
۲۱ آذر حرکتی، سادجه بیر تاریخی اولای دئییل، توپلوملارین کیملیکلرینین، حاقلارینین و برابرلیک آنلاییشلارینین یئنیده‌ن شکیلله‌ندیی بیر دؤنه‌مین تاریخ صفحه لرینه ورولموش مؤهرودور. بو حرکت، اؤزگورلوک و برابرلیک آرزوسونون بیر توپلومون ژئنلرینده نئجه کؤک سالدیغینی، توپلومسال دگیشیمین گرچک آنلامدا نئجه باشلادیغینی گؤستریر. ۲۱ آذر سادجه بیر حوکومتین قورولماسی دئییل، هم ده توپلومدا حاقسیلیغا اوغرایان قاتمانلارین او جومله‌دن قادینلارین اؤزگورلشمه‌سینین ایلک آدیمینی آتدیغی بیر دؤنوم نقطه‌سی ایدی. قادین، بو حرکتده یالنیزجا اؤز حاققینی طلب ائتمکله قالمادی، عئینی زاماندا بوتون خالقین اؤزگورلوک موجادیله‌سینین سمبولو اولدو.
تاریخی سور‌ه‌جده گونئی آزربایجان‌دا قادینلارین توپلومداکی یئری، بویوک اؤلچوده سنتی دگرلرله شکیلله‌نمیشدی. قادینلار، عمومیتله توپلومون ان آلت طبقه‌سینده یئر آلیر، تحصیل، ایش حایاتی و توپلومسال حاقلار قونوسوندا جیدّی بیر آیریمچیلیقلا قارشیلاشیردی. قادینلارین بویوک بیر قیسمی تحصیل آلمیردی وتوپلومون عمومی آلانیندا کیشیلرله برابر سؤز حاققیندان محرومدولار. اؤزللیکله کند بؤلگه‌لرینده، قادینلار یالنیزجا ائو ایشلری و اوشاق باخیمی ایله محدود بیر یاشام سوردوروردو.
ارباب-رعیتی یاپیلارین دایاتدیغی بو نظم، قادینلاری پاسیو بیر یاشام طرزینه محکوم ائتمیشدی. مشروطه انقلابیندان سونرا و اوندان اؤنجه‌کی دوشونورلرین قادینلارین تحصیل آلماسی اوچون آتدیغی آدیملاری میلی حوکومتین قیسا دؤنه‌مینده چوخ سرعتلی شکیلده ایره‌لیله‌دی. ۲۰-جی یوزایلین باشلاریندان اعتیباراً ایران‌دا یاشانان توپلومسال و سیاسی دگیشیملر، قادین حاقلاری قونوسونداکی اویانیشین آرتماسینا زمین حاضیرلامیشدی. آنجاق بو دگیشیم، قادینلارین گونلوک یاشامیندا سوْموت بیر یاخشیلاشما ساغلایابیلمه‌میشدی. آزربایجان میلی حوکومتی دؤنه‌میندن قالان منبعلر، میلی حوکومتین آزربایجان‌دا گوجلو و قاپساملی اصلاحاتلارین آپاریلماسینی پلانلاندیغینی گؤستریر آنجاق بونو گرچکلشدیره‌بیلمه‌سی اوچون حوکومتین عومرو ال وئرمه دی.
اؤندر پیشه‌وری‌نین نادره رومانی، ۲۱ آذر حرکتی و گونئی آزربایجان میلی حوکومتی‌نین سوسیال رئفورملارییلا باغلانتیلی اؤنه‌ملی بیر اثردیر. رومان، ایران توپلومونداکی قادینلارین حاق موجادیله‌سینه اوداقلانیر و قادینلارین اؤزگورلویونو توپلومسال مدرنلشمه‌نین بیر پارچاسی اولاراق اله آلیر.
آنا کاراکترلردن بیری اولان نادره، تحصیله اؤنم وئرن و اؤز حایاتینا یؤن وئرمک ایسته‌ین گوجلو بیر قادیندیر. رومان، اونون یاشادیغی چاتیشمالار و توپلومون باسقیچی یاپیسینی آنلاتیرکن، قادینلارین ساوادسیزلیق و حاق محرومیتی کیمی سورونلارینا دقت چکیر. بو دوروم، ۲۱ آذر حرکتی‌نین و میلی حوکومت‌ده قادین حاقلاری و برابرلیک اوچون وئریلن موجادیله ایله اؤرتوشور.
نادره، بو موجادیله‌نین و بو دؤنوشومون ادبی یانسیماسیدیر. نادره، یالنیزجا بیر قادینین ایچسل ماجراسینی آنلاتماز، عئینی زاماندا بوتون توپلومون برابرلیک و عدالت آختاریشینین و اؤزگورلوک موجادیله‌سینین ادبی بیر سیمگه‌سیدیر. نادره رومانیندا، قادین سادجه توپلومون بیر پارچاسی اولاراق دئییل، بوتون توپلومون روحونو دگیشدیرن بیر گوج اولاراق یوکسه‌لیر. او، اؤز کیملیگینی آختاریرکن، بوتون توپلومون کیملیگینی ده شکیلله‌ندیریر. نادره، بیر قادینین اؤزگورلویونون، سادجه اؤزونه عایید بیر مسئله اولمادیغینی، توم اینسانلیق اوچون بیر انقلاب اولدوغونو گؤستریر.
۲۱ آذر حرکتی، آزربایجان میلی حوکومتی و نادره رومانی، فیکری باخیمدان سیخی بیر باغا صاحیبدیرلر. چونکو توپلومسال عدالت، قادین حاقلاری و حقوق برابرلیگی اوچون وئریلن موجادیله‌نی وورغولاییرلار و حایاتا گئچیرمک اوچون چالیشیرلار. ۲۱ آذر حرکتی و میلی حوکومتین اؤنده گلن شخصیتلری، سید جعفر پیشه‌وری لیدرلیگینده ، گؤنئی آزربایجان‌دا خالقین کولتورل و سیاسی حاقلارینی ساوونماق هدفی ایله باشلادیلان بیر حرکت و قورولان بیر حوکومتدیر. حرکت، سادجه دیل، کولتور و اکونومی کیمی آلانلاردا دئییل، توپلومون فرقلی ازیلن قاتمانلاریندان اولان قادینلاری دا نظرده توتاراق بویوک توپلومسال رئفورملار اوچون آدیملار آتمیشدیر. بو رئفورملار، آزربایجان تورکلری‌نین داها اؤزگور و قاپساییجی بیر سیستئم و توپلومدا یاشامالاری اوچون بیر تمل اولوشدورماغی هدفله‌ییردی.
بیر قادینین اؤزگورلشمه‌سی، توپلومون اؤزگورلشمه‌سیدیر. قادینلارین اؤزگورلشمه‌سی، سادجه بیر توپلومسال عدالت مسئله‌سی دئییل، عئینی زاماندا اینسانلیغین ویجدانینین اویانماسیدیر. قادین، بو دونیادا سادجه واراولماق اوچون دئییل، اؤز سسینی تاپماق و بو سسی توپلوما دویورماق اوچون واردیر. ۲۱ آذر حرکتی، قادینلارین تحصیلینی، اؤزگورلوگونه و حاقلارینا وئردیگی اؤنه‌مین بیر گؤستریجیسی ایدی. بو حرکتین ان بویوک گوجو قادینلارین توپلومون ان تمل داشلارینی دگیشدیرمه پتانسییلینه صاحیب اولمالاری ایدی. پیشه‌وری نادره رومانینی میلی حکومت قورولمادان ایللر اؤنجه یازمیش و رومانیندا آنا کاراکتر اولان نادره، دؤنه‌مین سنتی توپلوموندا بیرچوخ قیسیتلامایلا قارشی قارشییا قالان قادینلاری تمثیل ائتمکده‌دیر. پیشه‌وری، نادره کاراکترینی ترسیم ائدرک، مصلحتی ائولیلیکلری، قادینلار اوزه‌رینده‌کی توپلومسال باسقیلار، بیرئیسل حاق و اؤزگورلوکلره اولاشما چابالاری کیمی قونولاری اله آلیر. بو اثر، قادینین توپلومداکی نقشینه و مودرنلشمه‌نین و سوسیال رئفورملارین اؤنه‌مینه ایلیشکین بیر باخیش آچیسی گؤسترمکده‌دیر.
پیشه‌وری و اونون یول یولداشلاری گونئی آزربایجان‌دا قادینلارین و آزربایجان توپلومونون بیر چوخ قاتمانلارینین برابر حاقلارا صاحیب اولماسینی آرزو ائدیب اورکلرینده داشییردیلار، لاکین مرتجع و فاشیست گوجلرین بیرلشمه‌سی ایله بو مودرن و قاباقجیل حرکت باسدیریلدی. گونوموزده گونئی آزربایجان‌دا اوشاق ائولیلیکلری و قادینلارا قارشی باسقیچی قانونلار و و عمومیتله قادینلارین دورومو مرتجع ذهنیتین و گوجلرین یوردوموزون گئچمیشینین تاریخی قووشاغیندا آزادلیق و عدالت غالیب گلمه‌سینین نتیجه‌سی اولسا دا، آزادلیق اوغروندا موجادیله دوام ائدیر و قالدیریلان موجادیله بایراغی نسلدن نسله ال دگیشه‌رک ایره‌لی گئدیر.
اؤزگور قادین، توپلوملارین یوکسه‌لیشی اوچون گرکلیدیر. تورک قادینی‌نین اؤزگورلویو، توپلومسال دگیشیمین اؤزودور. او توپلومون یانسیماسیدیر و اونون اؤزگورلویو، اینسانلیغین اؤزگورلویودور. بیر توپلوم، قادینلارینی نه قدر اؤزگورلشدیریرسه ، او قدر گوجلو و عادیل اولور. قادین حاقلاری سادجه فردی بیر مسئله دئییل، بوتون توپلومون رفاهی و گلجه‌یی اوچون بیر گرکلیکدیر. نادره رومانیندا یانسیتیلان فیکیرلر و دوشونجه‌لر و ۲۱ آذر حرکتینده آتیلان آدیملار، یاریمچیق قالسا دا، آزربایجان گنجلیگی بو آزادلیق اوغروندا قالدیریلان موجادیله بایراغینین دوشمه‌سینه ایذین وئرمه‌دی وئرمه‌یه‌جک.
یازی دیرنیش گنجلیگی درگیسی‌نین ۵-جی ساییسیندا یایینلانمیشدیر.
