گولوستان باغی و اؤزوموزدن اولان بالتالار
کئچن بئش گونده، تبریز شهر شوراسی و باشقا سوروملولارین گولوستان باغی حاقدا دانیشیقلارینی ایزله‌ییب، یقینه چاتدیم کی او باغین بیر سیرا آغاجلاری کسیلیب، یئرینه کلانتری بیناسی تیکیله‌جک. سوروملو دئدیگیمیز آداملار بو ایشه مانع اولماغا اراده‌لی دئییللر و بیز تورکییه گنجلری و گولوستان باغی دا گزی پارکی دئییل. اؤلن بیر شهرین یوز ایللیک خاطیره‌سیدیر.
آذرین ایکیسی ایدی، ایل ۱۳۷۹٫ قارا خبر گلدی کی زنگانلی میللی شاعیرحکیمه بلوری باکی شهرینده حایاتا گؤز یومدو. چارشنبه گونویدو و تئز بیر ایش گؤرمه‌سیدیم دانشکده ایکی گونلوک تعطیل اولاجاق و او شاعیرین اؤلوم خبری اؤیرنجیلر آراسیندا یاییلمایاجاقدی. اورمونون فنی دانشکده‌سینه گئدیب، اسلامی انجمندن نئچه بؤیوک کاغاذ بورج آلیب، اونلارا حکیمه‌نین اؤلوم خبری و مشهور تبریز شعرینین مصراعلارینی یازدیریب، دانشکده‌نین اعلان تابلولارینا ووردوم کی حکیمه‌نین قوللاری بیر داها تبریزین بویونونا دولانمایاجاق و اونون گؤزلری تبریزین گؤزلرینه دویونجا باخمایاجاق:
قول‌لاریم دولانا بوینونا بیر گون
یئنه باش قویارام دیزینه تبریز
حسرتدن هیجراندان جانا دویموشام
دویونجا باخارام گؤزونه تبریز
بولانیق سولارین آخسین دورولسون
تزه گوللریندن بوساط قورولسون
او گول جامالینا بیرده وورولسون
بیر قوبار قونماسین اوزونه تبریز
گولوستان باغینین سئیرینه گلیم
لاله یاماجیندا بیرده دینجه‌لیم
اؤتن گونلریمه یئتیشمز الیم
دوشوم هئچ اولماسا ایزینه تبریز
اوگون بیلمیردیم کی زامان سوره‌سینده بیز ده گولوستان باغینین سئیریندن محروم اولاجاغیق و او باغین آغاجلاری بیر بیر قتل ائدیله‌جک. آخی او باغ چوخلو شاعیرلرین الهام قایناغی اولوب و بلکه اتهامی ائله بودور. شهریار اؤزونو شیرازلی حافظ‌له مقایسه ائدنده، گولوستان باغینا فخر ائدیب، تبریزی شیرازدان اوستون گؤروردو:
شب است و باغ گلستان خزان رویاخیز
بیا که طعنه به شیراز می‌زند تبریز
آما ایندی ساپی اؤزوموزدن اولان بالتالار، وارلیغیمیزی بیر بیر آلیب، بیزی یوخسول حالا سالیرلار کی حکیمه بلوری‌نین ایلهام قایناغی و شهریارین گوونج اوجاغی داغیلیسین و شهریار اونلارین خوش گونلرینی و بیزیم قارا گونلریمیزی، سعدی و گنجه‌لی نظامی استعاره‌سیله آغلاسین:
سعدی‌نین باغ گلستانی گرک حشره قدر
آلماسی سلله‌لنیب خورماسی زنبیل‌لنسین
لعنت اول باد خزانه کی “نظامی” باغینین
بیر یاوا گولبه‌سرین قویمادی کاکیل‌لنسین…
