قاپانمایان دفتر
بوگون ۱۲ زومار\سنبله (شهریور)، آزربایجان دمکرات فیرقه‌سی‌نین تاریخی بیانیه‌سی ایله قورولوشونو اعلان ائتدیگی گوندور.
شوبهه‌سیز بوگون آزربایجان تاریخینده بیر عطف نؤقطه‌سی‌دیر. تورک میلتینی سئومه‌ینلر سانیرلار کی ۲۰ مین آزربایجان اینسانینی قتل‌عام ائدرک آزربایجان دمکرات فیرقه‌سینی یوخ ائتدیلر. اما اونلار دا یاخشی بیلیرلر کی تاریخه و میلتیمیزین بیلینجینه دوشن بو ایز سیلینمز. فیرقه میلتیمیزین مشروطه انقلابی ایله باشلاییب، خیابانی حرکتی ایله دوام ائدن آزادلیق و عدالت موباریزه‌سی‌نین دوامی ایدی. نئجه کی فیرقه زامانیندا دا ائله همن قهرمانلاری، همن طلبلری و همن کادرلاری گؤروروک. نئجه کی خلق موسلمان حرکاتی دا و بو گونکو آزربایجان میلی حرکتی ده همن سئیرین دوامی‌دیر.
بوگون حرکتیمیزین شعاری اولان «آزادلیق، عدالت، میلی حؤکومت» بئله بیر تاریخدن سوزولوب گلیب.
تورک میلتینی سئومه‌ینلر چوخ چالیشیرلار آزربایجان دمکرات فیرقه‌سینی بیر شوروی قورغوسو کیمی گؤسترسینلر. دوغرودور، اوگونکو آزربایجان تورک آیدینی میدانی و ساحه‌ده وار اولان ژئوپولوتیک شرطلردن یارارلاندی. او جومله‌دن دونیا ساواشی سونراسی شرطلری، قیزیل اوردونون بؤلگه‌ده‌کی وارلیغی و بیر یابانجی عاملی اولان رضاخانین تبعیدیندن سونرا یارانان آچیق فضا آزربایجان آیدینینا بو ایمکانی تانیدی. اما اونوتماماق لازیم کی فیرقه‌ده بیر میلی اراده و میلی مطالبه فاکتورو ایدی. همن فاکتور کی فیرقه‌دن اؤنجه مشروطه و خیابانی حرکاتیندا و فیرقه‌دن سونرا خلق مسلمان و چاغداش میلی حرکاتیمیزدا وار. یانی، فیرقه منفرد بیر اولای یوخ، بلکه بیر تاریخی سورجین بیر حلقه‌سیدیر. بو سببله آزربایجان دمکرات فیرقه‌سینی سادجه بیر شوروی قورغوسونا تقلیل وئرنلر شوبهه‌سیز کی یا جاهیل و یا موغرضدیرلر.
بیریلری سانیرلار کی میلتیمیزین ۱۲ زومار\سنبله (شهریور) ده آچدیغی دفتری، ۲۱ قوس (آذر) قتلی‌عامی ایله قاپادیبلار؛ اما سهو ائدیرلر. او دفتر چوخ اؤنجه‌سیندن آچیلمیشدی و حله ده باغلانماییب؛ گؤروله‌جک حسابلار وار …
