گونئی آزربایجان‌دا میللی فعاللارا قارشی ایران رئژیمینین اینسان حاقلاری پوزونتولاری و غئیری-اینسانی موداخیله‌لری قیناییریق
ایران رئژیمینین گونئی آزربایجان‌دا یاشایان تورک میللی فعاللارا قارشی تؤرتدیگی اینسان حاقلاری پوزونتولاری و غئیری-اینسانی موداخیله‌لره دایر جدی ناراحات‌لیقلار آرتماق‌دادیر. گون کئچمیر کی، ایران رئژیمی و اونون مرکزچی دوشونجه داشییان قوللوق‌چولاری، اؤز دوشمه‌نلیکلرینی قئیری-فارس میللتلره، خصوصیله ده گونئی آذربایجان تورکلرینه قارشی گیزلتمه‌یه‌رک یئنی جینایتلر تؤرتمه‌سینلر. رئژیمین هر گون بیر میللی فعالی توتوقلاماسی، غئیری-اینسانی شرایط‌ده ساخلانیلماسی، ایران اراضی‌سین‌ده‌کی موخالیفلرین سسینی باستیرماق جهدلری داوام ائتمک‌ده‌دیر.
بیز، گونئی آزربایجان میللی حرکاتینا منسوب اولان و ۵ آیدان چوخ‌دور نامعلوم وضعیت‌ده، قوندارما اتهاملارلا توتولان میللی فعاللاریمیزین درحال و شرط‌سیز آزاد ائدیلمه‌سینی طلب ائدیریک. بو فعاللار اؤز میللی و اینسان حاقلارینی مدافعه ائتمک یولون‌دا ۴۰ گونو آشقین آجلیق آکسییاسی ایله اعتراض ائدیرلر و بو، اونلارین محکوم ائدیلدیگی غئیری-اینسانی شرایطه دایر جدی اندیشه‌لری داها دا آرتیریر.
اگر بو محبوسلار او جومله‌دن جناب عظیمی قدیم، طاهر نقوی، کریم اسماعیل زاده، مرتضی پروین، ودود اسدی، سالار طاهرافشار و… آزاد ائدیلمزسه یاخود اونلارا آغیر حبس جزالاری وئریلیرسه، ایران رئژیمی یالنیز گونئی آزربایجان میللی حرکاتی نین دئییل، همچینین بوتون گونئی آزربایجان تورک میللتی نین اعتراضلاری ایله قارشی-قارشییا قالاجاق. بیز، بو تهدیدلره و زوراکیلیغا قارشی سسیمیزی یوکسلتمه گه و گونئی آزربایجان تورک میللتی نین ایراده‌سینه دستک وئرمه گه داوام ائدجه ییک. ایران رئژیمی نین عیرقچی و تجاووزکار سیاستلری قارشی‌سیندا سوسمایاجاغیق و دایم اؤز حاقلاریمیز اوغروندا موباریزه‌میزی سوردوره جه ییک.
ایران رئژیمی نین گونئی آزربایجانا قارشی تؤرتدیگی ظولوملره سون قویماسی گرکیر. ایران رئژیمی اونوتمامالی‌دیر کی، گونئی آزربایجانین آزادلیق، عدالت و میللی حؤکومت اوغروندا موباریزه‌سی دایاندیریلا بیلمز و بو موباریزه نه قدر زورلو اولسا دا، غلبه ایله نتیجه‌لنه‌جک‌دیر.
آزادلیق، عدالت، میللی حؤکومت
آذربایجان اؤیرنجی حرکاتی – آذوح
آذربایجان میلی دیرنیش تشکیلاتی
آذربایجان مرکز پارتیاسی
گونئی آذربایجان دمکرات پارتیسی – گآدپ
۰۱/۰۸/۲۰۲۴
