«ائله کوسون، باریشماغا یئر قالسین»
👤 آراز ابراهیم نژاد
هئچ کس آنادان گلمه میللتچی اولماییب و اینسانلار اولابیلر عمرلرینین بیر مرحله سینده بو حرکتین حاقلی اولدوغونو باشا دوشوب و میللی حرکته قوشولسونلار.
اینسانلارین کئچمیشلریندن داها چوخ بوگونکو عمل لری اونملی دیر. طبیعی کی بوگون ده، هرکسین بوگونکو دورومونا دا، چوخلو اینتقادلار اولابیلر. آنجاق هدف بیردیرسه، چوخ مسئله لره گوز یومماق لازیم دیر. بیز ایللر بویو بونا ایناندیغیمیز اوچون، بیر سیرا دوستلارین هم کئچمیشلرینه همده حتی بوگونکو داورانیشلارینا گوز یومموشوق. بیز میللی بیرلیک و میللی منافعیمیزه گوره، بو یولداشلارین مدافع چیسی اولموشوق. نییه کی بیزیم معیاریمیز، اینسانلارین بوگونکو عمللری اولوب.
۱- بیز هئچ واخت «اکبر آزاد» کیمی دوستلاری، کئچمیشده “پان ایرانیست” حزبی نین عضوو اولدوغونا گوره سوچلامامیشیق. اونا دئمه میشیک کی، ندن آذربایجان دوشمنی اولان بیر حزبین جاوانلار شاخه سی نین مسئولو اولوب، اونا عضو ییغیبسان؟!
۲-دئمه میشیک، ندن میللتچیلیک ایدعاسی داشیدیغین حالدا، اوز اوشاقلارین ایله فارسجا دانیشیرسان؟! (بو حادثه حتی نئچه دفعه کلاب هاوس اوتاقلاریندا اوزه چیخیب).
۳-بیز هئچ واخت سیزین کئچمیشیزی، بوگونه معیار توتمامیشیق. بیز هئچ واخت دئمه میشیک ، ندن اکبر آزاد و عباس لسانی کیمی میللتچی لرین اوشاقلاری نین آدلاری تورکجه دئییل و عایله لرینده هئچ کیم بو حرکتین ایچینده دئییل؟!
آنجاق، او زامان کی باشقا یولداشلارین کئچمیشینی سوال آلتینا آپاریرسیز، ائله سانمایین کی همیشه منبرده اولاجاقسیز!
سیز بئله بیر اینسانین کئچمیشینه اتهام وورورسوز کی، ایراندان ۱۳۶۳- جی ایلده چیخان زامان، قیزینین آدی تورکجه ایدی. مگر بیرینین تورک میللتچی اولماسینی تشخیص وئرمک اوچون لاپ کیچیک معیارلاردان بیری، اونلارین اوشاقلارینا تورکجه آد سئچمک دئییل؟ او زامان کی طرفین اوشاغینین آدی تورکجه ایدی، سیز اوشاقلاریزا نه آد قویموشدوز کی هله کئچمیشدن ایدعالی دانیشیرسیز؟!
او زامان کی او بیر خرده بورژوا عایله سینه منسوب اولدوغو حالدا، کارگرلری و اونلارین حاقلارینی ساوونوردو ، سیز هارادایدینیز؟ آیا او زامانین سرکوب لارینا بی تفاوت و سایماز قالمیشدینیز یا سرکوب سیستمی نین بیر پارچاسی ایدینیز؟ بیزیم اوچون اونملی دئییل، هر حالدا سیز میللی حرکته قوشولوبسوز. آنجاق او زامان کی بیری سین” سازمان فدائیان خلق ایران” حزبینه عضو اولدوغو اوچون ، اوز پارانوئید ذهنیتیزله سولدوز حادثه لرینده الی اولوب دئییب، سوچلاییرسینیز، گرک بیله سیز کی، بوگونکو جاوانلار سیزین زامانیزداکی کیمی منبر آلتیندا اوتوران دئییللر کی سیزین آغزیزا باخسینلار و نه دئدینیزه اینانسینلار.
اونلار دوشونور و تحقیق ائدیب بیلیرلر کی، بوگون بوزقورد نیشانی توتان اکبر آزاد ۱۳۸۱-جی ایل ستارخان مراسیمینده، بوزقورد توتانلارین قارشیسیندا دایانمیشدی.
بو گنج فعاللار بیر ساعاتین ایچینده آختاریب تاپاجاقلار کی، سولدوز حادثه سینده هانسی گروپلارین رولو اولوب و اتهام ووردوغوز آدام او زامان هئچ فدائیلرین عضوو دئییلمیش و ۱۳۵۸-جی ایل پاییزدان بو گروپا رسمی عضو اولوب(آلتی آی سولدوز حادثه سیندن سونرا). بو آدامین عضو اولدوغو،” فدائیلرین اکثریت شاخه سی” سیلاحلی ساواشا قارشی اولوب. آدام اوزو سولدوز ساواشیندان سونرا، دورد ایل بو شهرده معلم کیمی ایشله ییب. او قیرغین دا الی اولان بیریسینه بو ایجازه وئریلردیمی؟ بونو سولدوزون اساس مدافعه چیلریندن اولان معبودی طایفاسی-ندان و اورمودان گلن بورچالی طایفاسیندان سوروشماق چتین بیر ایشدیرمی؟!
مسئله نین نارحات ائدن یئری سیزین بو مسئله یه جهالتینیز دئییل، سیزین اخلاقسیزجاسینا آرخادان خنجر وورماغینیزدیر، سیز بونو ایللر اونجه دن بیلیردیز! جالیبدیر کی ایدعانی ایلک دفعه اورتایا آتان آدام(کئچمیشده اوزونون دئدییی و یازدیغی کیمی بسیجی باشی و سونرا میللتچی اولان ماحمودعلی چهرگانی)، سیزی ده جاسوس آدلاندیریب!
سیز آرخایین اولون کی سیز و سیزه تای اوزونو معیار گورن اینسانلار، میللی حرکتین معیاری دئییل لر. میللی حرکت قوربانلیق ات دئییل کی، ایسته دییز زامان جانینا دوشوب، سیزه تابع اولمایانلاری دوغرویوب آتاسینیز. سیزین اوزونوزو معیار سانماغیز، یالنیز ایستبدادین محصولودور. گئج اولمامیش، بو اوچورومدان دونمه ییزی آرزو ائدیرم.
