یاییلان یالانلار و «ماحمود بی بیلگین»
بیزلرین (دؤرد تشکیلات اولاراق) کورد تشکیلاتلاری و مرکزچی قووه‌لرله موذاکیره‌لر آپاریب آنلاشدیغیمیز و آزربایجان منفعتلریتی ساتدیغیمیزین یالانینی سندسیز و ثبوتسوز بیر شکیلده اصرارلا یایانلار وار. بیزیم تکذیب ائدیب فاکت ایسته‌مه‌گیمیزین ایسه معلوم خطه هئچ بیر تاثیری یوخدور چونکو اونلارین دردی اوزوم یئمک دئییل، باغبان دؤیمکدی! بیر سیرا جزییاتی بؤیودوب جنایت سندی کیمی سونماقدادیرلار. اما طبیعی کی توپلومدا آلینمیر، چونکو ادعالارین آیاغی یئرده دئییل، هاوادا!
یئری گلمیشکن، غربی آزربایجاندا ترور مساله‌سینی ایللر اؤنجه «باتی آزربایجان میلی مودافیعه کومیته‌سی» ایله گوندمه گتیرن و اوگوندن بو گونه بو مسئله ایله یاخیندان مشغول اولان دا ائله بیزلر اولموشوق؛ و بونو ان یاخشی اونلار بیلیرلر.
نه ماراقلی‌دیر کی بو اصرارلا یاییلان یالانلار دا رژیم ارگانلاری‌نین یالانلاری ایله عئینی‌لیک تشکیل ائدیر؛ نه حیکمت ایسه!!
نتیجه اعتباری ایله هدف یارانان گوج بیرلیگینی، داغیتماقدیر. چونکو بو بیرلیک خاریجده و داخیل‌ده محسوس بیر تاثیر یارادیب و رژیمین باشینا ایش آچماق ظرفیتی داشییر. ایکی ایل سورن امکلرله قورولان و جیدی تاثیر یارادان «گونئی آزربایجان تشکیلاتلاری ایش بیرلیگی مرکزی»نی ده ائله همن بو معلوم خط بوش بهانه‌لرله تیخادی.
بو آرادا ایسه ان بؤیوک حاقسیزلیق ماحمود بی بیلگینه اولور. اونون اوچون ده بیر موجادیله یولداشی اولاراق بیر سیرا قونولاری وورغولاماغی اؤزومه بورج بیلیرم.
اوزون ایللردیر تانیدیغیم ماحمود بی، آزربایجان و تورکلوک داعواسینا ان تمناسیز امک وئرن انسانلاردان بیریدیر. سادجه معنوی و سیاسی امکلر دئییل، شخصی امکانلاریندان حرکته چوخلو مادی دستکلر وئردیگی‌نین ده شاهدی اولموشام.
لیدرلیک پارانویاسی یاشایان بیری، شخصی سببلردن دولایی سولدوز مسئله‌سی ایله باغلی ماحمود بیه بیر یالان باغلادی و وابالینا گیردی. بو یالان ایسه معلوم خطین آغیزاندا ساققیز اولدو. ماحمود بی نئچه دفعه آچیقلاما وئریب کی سولدوز حادثه‌لریندن آیلار سونرا معلم اولاراق سولدوزا گئدیب، حادثه زامانی اوردا اولماییب و حادثه ایله بیر علاقه‌سی اولماییب.
ایندی ایسه دئییرلر سول تشکیلاتلار و مشخصاً فدایی‌لر او حادیثه‌لرده کوردلرله بیرلیکده حرکت ائدیبلر و ماحمود بی ده او زامان‌فدایی‌لرین عوضوو اولدوغو اوچون مسئولیت داشییر.
او زامان سوال یارانیر؛ ایران سول تشکیلاتلاری و مشخصاً فدایی‌لرین چوخ سایدا اسکی عوضوو بوگون میلی حرکتین ایچینده واردیلار و فعالیت ائدیرلر. حتی او زامان فدایی‌لرین رهبرلریندن اولانلاردان بئله واردیلار حرکتده و چوخ دا حؤرمت گؤرورلر (گؤرسونلر، بوندا بیر پروبلئم یوخدور). یالنیز بس نیه سادجه ماحمود بی بیلگین مسئول توتولور و دیگرلری گؤرمزدن گلینیر؟! اگر بئله بیر مسئولیت اولاجاقسا اسکی سول تشکیلات عوضولری‌نین هامیسی مسئول توتولمالیدیر، سادجه بیر نفری یوخ! بو ایکیلی استاندارد نیه؟!
دئمک کی مساله نه اسکی فدایی عوضوو اولماقدی نه سولدوز حادثه‌سی و نه باشقا شئیلر، مساله بیر «بیرلیگی» ووروب داغیتماق جهدیدی…
اما ائلین گؤزو تَرَزیدیر
ایللردی ائقولاری و باشقا معلوم-نامعلوم سببلر اوچون حرکتی ایچدن پارچالاماغا چالیشانلار و اؤزلرینی اؤلچوسو سانیب اللرینه «خاین‌متیر» آلیب گزنلر باشارماییبلار باشارمایاجاقلار…
