میللی حرکت ایله سوسیال عدالت قاورامی
👤 آتیلا حاجی زاده
فیرانسیز بؤیوک دئوریمیندن سونرا یئنی دوشونجه سیستملری ایله گوندمه گلن حاق، آزادلیق، عدالت کیمی قونولار یئنی قورولاجاق سیاسی اورگانیزاسیون ایله توپلوم، توپلوم ایله شخص ائلجه سرمایه ایله امک آراسیندا اورتاق بیر رژیمین قورولوشو «سوسیال عدالت» باشلیغی آلتیندا ده‌یرلندیریلمیشدیر.
سوسیال عدالت، قیسساجا آنلاتیمیندا توپلومون چئشیتلی قاتلار آراسیندا قایناقلار ایله ایمکانلارین عدالتلی بؤلوشدورولمه‌سی ائلجه قانون وئریجیلیک واسیطه‌سی ایله بو آنلاییشین گرچکلشدیرمه‌سینه دوغرو گئدن بیر قاورام دیر؛ مینیموم اوجرت، امکلی معاش، امک حوقوقو، اوجرت‌سیز ائیتیم، ساغلیق، اوتوراجاق، توپلو نقلییات ائلجه بو لیسته‌نین ایچرینده یئرلشن بیر چوخ باشلیقلار ایستر آلینان وئرگی‌لر واسیطه‌سی ایله تماما اوجرتسیزلشدیرمه‌سی یا توپلومون چئشیتلی قاتلاری آراسیندا سوپسیت ایله دستک اولاراق اولوشدورلماسی کیمین واسیطه‌لرله مرتبه‌لر آراسی سوسیال بوشلوقلاری دولدورماغی آرزو ائدن بیر سیستئم دیر.
گونوموزده اؤلکه‌نین هر یئرینده گؤزه چارپان عدالتسیزلیک، صینیفسال بوشلوق، کئچینه‌جک ایله دولانیشیغین ایستانداردلارا هایقیری دورومونو گؤزدن کئچیردیکده ائلجه اؤزل بیر طبقه‌نین هرنه‌یه و باشقا صینیفلارین هئچ نه‌یه مالیک اولدوقلارینی گؤردوک‌ده، حکومتین سوسیال گوونلیک پوروپاگاندالارینی اولدوقجا ایچی بوش دویوب؛ اؤلکه‌ده امک ایله سرمایه آراسیندا حققانیتلی بیر دوزن اولمادیغی اونونلا قارشی دا تأمیناتلی اؤزل صینیفلار قورولدوغونا شاهید اولوروق.
گونئی آزربایجاندا دا اؤلکه‌نین باشقا یئرلری کیمی کاسیبچیلیغین گونو گوندن آرتماسی، کئچینه‌جه‌یین داها زور دوروما چاتدیغی، ایش یاسالاری‌نین برباد اولدوغو، ایشچی‌لرین کؤله‌لیک دوزنینده چالیشماغا معروض قالدیقلاری، ساغلیق، اوتورتجاق ایله ائیتیم بازارلیق لوکس جیحاز دورومونا گلمک‌لری خالقی قارا گونلره چیخاریب، داهاجادا فلاکت دوروما آپارماغا قرارلی‌دیر.
گونئی آزربایجان جوغرافیاسیندا تمل گوج اولان «آزربایجان میللی حرکت»-ی نه یازیق‌کی ایران‌دا آکتیو اولان سیاسی، ایجتیماعی، کولتورل حرکاتلارادان داها چوخ سوسیال عدالت حاققیندا ایلگی‌سیز داورانیب تباری ایله ژنتیکین‌ده بیر زامانلار گوجلوجه گئنیش یئر توتموش بو قاورامی موباریزه آلانلارین‌دان سیلمیش کیمی، آماج توپلومونادا تئوریک یا پیراتیک اولاراق سونمامیش‌دیر.
یازیچینین قئیدیجه قایناقلاری اؤز یؤنه‌تیمین‌ده اولمایان ائلجه گونو گوندن یوخسسولاغا اوغراییب اوره‌تیم‌ده عدالتسیزلیک کئچیرن بیر خالقین مقدراتی اوغروندا مجادیله وئرمک، سوسیال عدالت قاورامینا ایلگی‌سیز داورانماقلا اولاسی اولمادیغی گؤرونور.
