دوکتور لطیف حسنی-نین، سون توتوقلامالار حاقدا بیاناتی
توتوقلانان میللی فعاللاریمیزین سسینه سس وئرمه سیله باغلی میثلی گؤرونمه‌ین بیر کامپانییا باشلانیب. دوزونو بو کامپانییایلا حاکمییتین افکار عمومی دن چکینیب، قانونسوز توتوقلامالارینا سون قویولماسینا ایلک باشدان بئله اینانمامیشیق.
بو کامپانییا بیزده، یالنیز میللی ایدئولوژوموزا دستک و اونو کۆتله‌ویلشدیرمک آنلامینی اؤزۆنده داشیییر. بیرده کی، توتوقلانان عزیزلریمیزین چوخونلوغونون دفعه لرجه توتوقلانمالاری اثبات ائدیبدیر کی، اونلار اؤز آزادلیقلارینین پئشینده بئله دئییللر. اونلار اؤزلرینین حاق یولوندا اولدوقلارینا اینانیب، بو یولون نه قدر چتین، قورخولو اولدوغونو گؤز اؤنونه آلیب، توتولاجاقلارینی بیله-بیله میللی گؤرولرینی یئرینه یئتیرمکله میللی اؤزگورلویوموزون پئشینده دیلر.حاکمییت ده گؤروندویو کیمی، بیزیم کامپانییایا جواب اولاراق یئنی دن قانونسوز توتوقلامالارینی آرتیریب، اساس‌سیز اتهاملارلا چوخ سایلی میللی- مدنی فعاللاریمیزی یاخالاییب، تورمه‌یه آتدی.
بونونلادا کامپانییامیزدا اومودسوزلوک یاراداراق، اؤزونو تام غالیب، حرکاتیمیزی ایسه مغلوب ساندیغینی بیزه آشیلاماق ایسته ییر. آنجاق آنلامیر کی، حاق یولونون یولچولارینا یئنیلمک (مغلوبییت)، اومودسوزلوک آنلاملاری تام یاد آنلاملاردیر. میللی حرکاتیمیز آپاردیغی مدنی موباریزه سیله یاشاییر. بو توتوقلانمالار نه قدر آرتیرسا، حرکاتیمیزین گونو- گوندن گوجونو آرتیریر.
بیز توتوقلانان عزیزلریمیزین یالنیز سسی دئییلیک، بیز اونلارین اؤزویوک.
