«آزربایجان میلّی حرکتی» دار ایدئولوژیک قالیبلردن چیخمالی‌دیر
گونئی آزربایجان و ایرانین فرقلی بؤلگه‌لرینده یاشایان تورک توپلومونون فرقلی لایه‌لرینه و ائله‌جه ده دیگر غیری- فارس میلتلره مدرن و مترقی چکیجی بیر گؤرنتو وئره بیلمه‌لیدیر. یوخسا مارژینال‌لاشیب قیسیر دؤنگونون ایچینده اؤز اطرافیندا دؤنوب دوراجاق.
موجود شرطلرده ان یاخشی احتمال ایله تاریخ تکرور ائدر. سون ۳۰۰ ایلده (خانلیق‌لار دؤنمیندن اعتباراً) آلتی دفعه عراقِ عجم‌دن گلن گوج (کی اؤنملی قیسمی تورک گوجو اولوب)، آزربایجان‌دا اورتایا چیخان سیاسی اراده‌نی عسگری گوج ایله ییخیب. بو آجی موقدراتی دگیشدیرمک اوچون عراقِ عجم‌ده کی بؤیوک تورک نفوسو ایچینده میلی سؤیلمی یایا‌بیلمه‌لییک. موجود دار قالیبلرله بو اولماز. (بو تاریخی بیر مقوله‌دیر و گلن گونلرده چالیشاجایام معلوماتیم قدر بو قونونو آچام).
بو آرادا، طبیعی کی حرکت ایچینده کی فرقلی دوشونجه، باخیش و سلیقه‌لره سایغی ایله یاناشمالییق کی سربست فیکیر موبادیله‌سی کؤلگه‌سینده دوغرو یول اورتایا چیخسین. بیزه لازیم اولان بالاجا فاشیست‌لر دئییل؛ مدرن، مترقی و دونیا استانداردلاریندا دمکراتیک بیر سؤیلم‌دیر، کی میلتیمیز حرکتیمیزه جذب اولسون.
هر موضوع‌نو پوپولیسم و لمپن ادبیاتی ایله بیر قارالاما کامپانیاسینا چئویریب، حرکت ایچینده کاوس یاراداراق سربست دوشونجه دولاشیمینا انگل اولماغا چالیشانلارا سوال ایله باخماق لازیم.
