حیاتی سئون و سئودیگینی یاشایان فرهاد
قارانلیقدا باتیب قالماغی ایسته‌میرسن. نورمال بیر حیات قورماغی دوشونورسن. سن دوشونورسن. باشاردیغین قدر؛ چالیشیرسان باشاردیغین قدر. یاشاییرسان دوشوندوک‌لرینی باشاردیغین قدر.
ایندی تام آنلاملی اولور واتس‌اپ بیوسوندا یازدیغین بو سؤزلر:
Ya Olduğun Gibi Görün, Yada Göründüğün Gibi Ol
اوشاقلیق چاغیندان ائوده بؤیوک بابا و آنادان تورکجه‌نین درینلیک‌لرینی اؤیره‌نیرکن، ائوده ده تلویزیون و مدرسه‌نین اجباری فارسجاسینی دانیشمالی اولدون.
اما ۱۶-۱۷ یاشدان سونرا، اؤزون سئچیب، تورکجه دانیشماغی باشلادین. تکجه دانیشماقدا قالمادین. تورکجه یاشاماغی سئچدین. تورکجه یاشاماغا اوره‌گین دؤیوندو. و یاشاتدین اؤزونو اولدوغون کیمی. تورکجه اؤیرندین، اؤیرتدین.
تکجه بو دئییلدی. اطرافینداکی انسان‌لارا چالیشدین، یازدین، دوشوندون. دغدغه‌لی اولدون حیاتا.
بیلیم‌یورد ایل‌لرینده آیری اؤیرنجی‌لرله «مدنیت» درگی‌سی، «حکیم هیدجی» اوجاغینی یولا سالدین. ائله بو یاخین زمان‌لاردا خوی زلزله‌سینده زنگان‌ین چوخلو چالیشقان اکیپ‌لری ایله چالیشدین. تورکمن صحراسی‌نین سئلینده هابئله. مختلف ایش‌لرله سئودیگینی یاشاییردین. یاشادیردین سئودیگینی.
و بو اصلا خوشا گلن ایش دئییلدی بیر عده حیات یابانجی‌لارینا. سوچلاندین بونا. گناهین همن بو اولدو. ایندی سنی نئچه گون‌لر اولسون بئله سئودیگین یاشامدان آییرماق ایسته‌ین‌لر اولوب.
بیلیرم همیشه گولدوگون کیمی بونا دا گولورسن. اونلار بیلمیرلر سنین سئودیگین یاشامدا، بو نئچه گون آیریلیق دا سئویلیب یاشاناجاقدیر. یاشام سندن ائشیکده دئییل. سنین فیکرینده اولان بیر دوشونجه‌دیر. سن اوردا دا یاشاییرسان.
اولدوغون کیمی، سئودیگین کیمی، دوشوندوگون کیمی یاشاییرسان.
سن او زمان‌لار ساعات‌لارجا ا‌وخویاردین، یازاردین، دانیشاردین. اوخوماغین، یازماغین، دانیشماغین تام یاشادیغین کیمی گؤرونوردو. باشا باش جسارت، کسکین، عینی حالدا ساده، صمیمی و اوزو گولر… .
بیز تبسسوم‌لرین قتیلی اولدوق. او دئمیشدی ها، أنا قَتیلُ العَبَرات: منی گؤز یاش‌لاری اؤلدوردو. بیزی هر نه‌دن چوخ تبسسوم‌لر اؤلدوردو. تبسسوم ائدن‌لرین آیریلیغینا اصلا دؤزوموموز یوخدور.
بیلیرم ایندی سنی توتوب، سنه زندانبان اولان حیات بیگانه‌لرینه یازیقلیغین گلیر. بو فلاکتی بوتون بو حیات سئون‌لری‌نین باشینا گتیرن‌لره بئله اوره‌گین یانیر! بونلار نییه یاشامیرلار؟ نه‌دن هر بیر کیچیک حیات ایزلرینی گؤرن کیمی اورایا هجوم ائدیب، محو ائتمگه چالیشیرلار؟
بیلیرم سن اونلارا حتی نفرت ده بسله‌یه بیلمزسن. سنین دوشونجه‌‌نده دشمنین تعریفی یوخ. هر نه وار حیات‌دیر. دوستلوق‌دور. محبت‌دیر و گولمک.
تئز گل؛ بیر داها بو گولر اوزو، بو انسان باخیشلی گؤرونوشو و بو حیاتلی دوشونجه‌نی آرتیق یاشات و هامیمیزا پای وئر.
