سیدجعفر پیشه وری نین آژیر قزئتینده یازدیغی مقاله نین قیسالتیلمیش شکلی

(آژیر قزئتی، نومره ۱۵۸ – ۲۷ خورداد ۱۳۲۳)

{…} بیز فیرقه نین اھمییتینى ھئچ ده اونون عوضولرینین چوخلوغوندا آختارمامالیییق. کئیفییته، کمییتدن داھا آرتیق اھمییت وئرملى ییک. اونا گؤره کى، ایجتیماعى ایشلرده کمییتین فؤوق اولعاده تاثیرى اولا بیلمز. محض کئیفییت دیر کى، آداملارى فیرقه یه باغلاییر و ھمیشه اونلارى حاضیر وضعییتده ساخلاییر.{…}

فیرقه نین جمعیت داخیلینده توتدوغو مؤوقعینى موعین لشدیرن عامیل اونون مقصد، آرزو و فعالییتیندن عیبارتدیر. فیرقه لرین ماھییتى نین دگیشمه سى ده ھمین سبب اوزوندن مئیدانا گلیر. {…} روسییه کومونیست فیرقه سى ده یاریم عصیرلیک کسگین صینفى موباریزه دن سونرا بو گون تام میلى وطنپرور شوعارلار آلتیندا حرکت ائده رک وطن محاریبه سینه رھبرلیک ائدیر. بورادا روسییه فیرقه سى رھبرلرینین رئالیست لیگى ده بؤیوک رول اویناییر. {…}

بیزیم نوقطه یى نظریمیزجه اوزون مودتلى ایتیفاق، دوزگون اساس و تشکیلات اوزرینده قورولمادیغى تقدیرده باش توتا بیلمز. مومکوندور، چوخ قیسا مودت اوچون موعین عیده بیر یئره توپلانسین. لاکین بئله جمعییتلر ایسته نیلن نتییجه یه چاتا بیلمیرلر. موتفیق اولانلار اؤز ایشلرینه داوام ائتدیرمک خاطیرینه، ایشلرینه موعین ترتییبات وئرملى، نظام اینتظام عمله گتیرملى، عؤھده چیلیک گؤتورملى و عھد – پئیمان باغلامالیدیرلار. اونلار دوزگون پلان و پروقرام حاضیرلامالى دیرلار. خوصوصییله گؤرولوجک ایشلرى اؤز آداملارى آراسیندا بؤلوشدورملى دیرلر. فیرقه ده بورادان مئیدانا گلیر. {…}

بعضیلرى فیرقه نى ھمفیکر و ھم عقییده آداملارین توپلاندیقلارى ساده و قوندارما بیر تشکیلات کیمى باشا دوشورلر. بو فیرقه مفھومونو آیدینلاشدیرمیر. فیرقه ایرلى نى گؤرن معلوماتلى و ھمفیکر آداملارین ایشتیراک و امکداشلیغى ایله یارانان و جمعییتى موعین مقصده دوغرو یؤنلدن مونظم و جیدى بیر تشکیلاتدیر. مرامنامه و نیظامنامه مساله سى ده بورادان مئیدانا گلیر. مرامنامه اساس مقصد، نیظامنامه ایسه ائله بیر واسیطه دیر کى، فیرقه اونون یاردیمى ایله صینفین و یا جمعییتین گؤرکملى آداملارینین ایتیفاق و بیرلیگینى حیاتا کئچیریر. لاکین عملده تکجه مرامنامه و نیظامنامه ھئچ ده کیفایتلندیرجى دئییل. تاریخ دایانمیر، گونده لیک موباریزه نین جریانى ھرگون بلکه ھر ساعات فیرقه اوچون تازا وظیفه لر مئیدانا چیخاریر. بونا گؤره ده دئییرلر کى، فیرقه گونده لیک مساله لر باره ده دوزگون تصمیم توتماق اوچون تاکتیکایا مالیک اولمالیدیر. {…} بؤیوک سییاسى بیر آددیم موعین کیچیک و اھمییت سیز بیر فیرقه نى ائله دیرچلده بیلر کى، او بیر جمعییتى ایرلى یه آپارماغا قادیر اولار.{…}