مجید جوادی: «فارس شووینیزمینین ماهیتی دَ‌ییشمیر»
مجید جوادی: سون پروسئسلر گونئی آذربایجانلیلارین «آزادلیق، عدالت، میللی حکومت» شوعارینی الده رهبر توتمالاریندا تامامیله حاقلی اولدوقلارینی بیر داها تصدیقله‌دی
آرتیق اوچ آیدان چوخدور کی، ایراندا فارس-موللا رئژیمینه قارشی اعتراضلار داوام ائدیر. اؤتن مدت عرضینده باش وئرهنلر، حکومت قوهلری طرفیندن دینج نوماییشچیلره قارشی تطبیق ائدیله‌ن وحشیلیک، همچینین آکسییا ایشتیراکچیلاریندان بعضیلرینین اعدام ائدیلمه‌سی ایرانداکی مؤوجود رئژیمین ایچ اوزونو بیر داها بوتون چیلپاقلیغی ایله اورتایا قویدو. بللی اولدو کی، فارس-موللا رئژیمی اؤلکه داخیلینده‌کی دیگر خالقلارین اعتراض آکسییاسیندا سسلنه‌ن طلبلره عمل ائتمکدنسه، دینج اینسانلارین قتلینه اوستونلوک وئریر.
فارس شووینیزمینین حاکم اولدوغو مدتده…
محض بونا گؤره ده، ایرانداکی دیگر خالقلار، خصوصیله ده گونئی آذربایجانلیلار نجاتی یالنیز بو دؤولتین بوخوووندان آزاد اولماقدا گؤرورلر. چونکی تاریخه نظر سالاندا گؤرورورک کی، فارس شووینیزمینین حاکم اولدوغو مدتده ایران آدلانان مکاندا ایداره‌ائتمه‌ده کیمین، هانسی قوه‌نین اولماسینین فرقی یوخدور. بوتون حاللاردا دیگر خالقلارا «ایکینجی نؤع خالق» کیمی یاناشما سرگیله‌نیر.
ائله بوگونلرده ایران اطرافیندا جریان ائدن یئنی گلیشمه‌لر ده بونو بیر داها تصدیقله‌ییر. معلوماتلارا اساساً، یاخین گونلرده ایران نووین پارتییاسی، یاخود تورکجه آدی ایله یئنی ایران پارتییاسی و «مشروطه انجومنی» قورولوشلارینی اعلان ائدیبلر. ایلک باخیشدان دوشونمک اولاردی کی، بو، مترقی آددیمدیر و یقین، یئنی سیاسی قوروملارین اعلانی ایرانین دئموکراتیکلشمه‌سینه دستک اولاجاق. لاکین تأسف کی، بئله دئییل.
فاشیزم ایرانا یئنی فورمادا گئری قاییدیر؟
گونئی آذربایجان میللی دیرنیش تشکیلاتینین مرکزی شوراسینین عضوو و قورومون سؤزچوسو مجید جوادی دئییب کی، مساله‌نی دریندن نظردن کئچیرمک لازیمدیر.
«بو تشکیلاتلاری قوران اینسانلارا، اونلارین کئچمیشینه و دوشونجه‌لرینه باخان هر کس اؤزونه بو سوالی وئریر: «فاشیزم ایرانا یئنی فورمادا گئری قاییدیر؟». فیکریمی بیر قدر ده اطرافلی چاتدیریم. ایرانین بوگونکو رئژیمینین بیر دینی فاشیزم اولدوغونا کیمسهنین شوبههسی یوخدور. بیر اؤلکهنین بوتون کسیملرینی قارا گونه محکوم ائدن دینی فاشیزمدن قورتولماق اوچون بو گونلرده بؤیوک بیر موباریزه داوام ائدیر و آغیر بدللر اؤدنیلیر. آنجاق نه یازیق کی فاشیزمین بیریندن قورتولمامیشکن، باشقا بیر فاشیزمین آیاق سسلری ائشیدیلمه‌یه باشلاییب. ائله گؤرونور کی، بیریلری اؤلکه‌نی شاه زامانینداکی فارس میللیتچیلیگی فاشیزمینه گئری گؤتورمک اوچون قوللاری چیرمالاییب» دیرنیش تشکیلاتینین سؤزچوسو دئییب.
اونون سؤزلرینه گؤره، شاهچی آدی ایله تانینان و کئچمیش شاهین اوغلو رضا پهلوی‌نین اطرافینا توپلاشان بیر کسیم ایرانین سیاسی آتموسفئرینده فعالیتلرینی آرتیرمیش دورومدادیر: «اؤزللیکله خاریجده‌کی فارسدیللی مئدیادا بو کسیمین تأثیری یوکسکدیر. اساساً ایرانین فارس اصیللی و یا فارسلاشمیش وطنداشلاریندان تشکیل ائدیله‌ن بو زومره ۱۹۷۹-جو ایل اینقیلابیندان اؤنجه‌کی ایداره‌ائتمه‌یه، یعنی شاهلیق دؤنه‌مینه گئری قاییتماغی خیال ائدیر و اونون اوچون چابالاییر. لاکین اونوتماق لازیم دئییل کی، بوگونکو فاشیزمین کؤکلری محض او زامان، شاه رئژیمی زامانی قورولوب. یعنی ایراندا غیر فارس میللتلر دیل، تاریخ، مدنیت، سیاسی حاقلار و اقتصادیات باخیمیندان او دؤنه‌مدن بری موستملکه معامیله‌سی گؤرمکده‌دیرلر.»
مجید جوادی دئییب کی، ایران نوین پارتییاسی نیظامنامه‌سینده آچیق شکیلده بیان ائدیر کی، ایرانین میللی دیلی فارس دیلیدیر: «بو پارتییا هر جور ادمی-مرکزیتی رد ائدیر و «تک میللت، تک بایراق، تک دیل» ایدئیاسینی مدافعه ائدیر. یعنی، تام آنلامی ایله ایراندا فارس هژمونیسینین داوامینی تامین ائتمه‌یه چالیشان بیر قورولوشدور».
فارس شووینیستلرینین داها بیر اویونو
موصاحیبیمیز فارس سیاستچیلرین داها بیر اویونو باره‌ده ده معلومات وئریب: «کئچه‌ن گونلرده آلمانییانین کؤلن شهرینده «مشروطه انجمنی» آدلی بیر تشکیلاتین قورولدوغو اعلان ائدیلدی. بنزر تشکیلاتلارین دا فرانسا، کانادا، آمریکا و اینگیلتره‌ده یارادیلاجاغی، بونلارین هامیسینین بیرلشمه‌سی ایله «ایران مشروطه پارتییاسی» قورولاجاغی بیلدیریلدی. طبیعی کی بو تشکیلات دا «تک میللت، تک بایراق، تک دیل» ایدئولوژیسینی اساس گؤتوروب و ایراندا فارس هژمونیسینین داوام ائتمه‌سینی هدفلییر. نئجه کی، قوروجولاری دا تانینان ایفراط و فاشیست شاهچی فارس میللیتچیلری ایدیلر. بو تشکیلاتلا باغلی واجیب بیر مقامی دا دقتینیزه چاتدیرماق ایستییرم. بونلار باشقا بیر اویونا دا ال آتیبلار. بئله کی، گویا اؤزلرینی مشروطه اینقیلابینین داوامچیلاری اولاراق گؤرورلر. آنجاق بو فارس شووینیستلرینین آذربایجانین اؤنجوللویونده ۱۹۰۵-جی ایلده گئرچکلشه‌ن مشروطه اینقیلابی ایله اوزاقدان یاخیندان علاقه‌لری یوخدور. مشروطه اینقیلابی دئموکراسی، چوخولچولوق و آزادلیق آراییشیندا اولان بیر اینقیلاب ایدی. بو فارس فاشیستلری ایسه بوتون او د‌ه‌یرلره قارشیدیرلار. بونلارین ان چوخ قورخدوقلاری شئی گئرچک بیر دئموکراسیدیر. چونکی گئرچک دئموکراسیده فارس هژمونیسینین یاشام شانسی قالمایاجاق».
مجید جوادی بیلدیریب کی، فارس و شاهچی شووینیستلرین بو اویونلاری باره‌ده آراز نیوز واسطه‌سیله خالقا معلومات چاتدیریرلار: «بایراقدار مئدیا دا ساغ اولسون کی، بو مسئله ایله باغلی دولغون معلوماتین چاتدیریلماسینی گونده‌مه گتیریب. اصلینده، بوتون بو باش وئرنلر بیر باخیمدان یاخشیدیر. او معنادا کی، پروسئسلر گونئی آذربایجانلیلارین «آزادلیق، عدالت، میللی حکومت» شوعارینی الده رهبر توتمالاریندا تامامیله حاقلی اولدوقلارینی بیر داها تصدیقله‌دی. بللی اولدو کی، رئژیمین آدینین موللا، یاخود شاه اولماسی هئچ نه‌یی ده‌ییشمیر. بوتون حاللاردا ماهیتده فارس شووینزیمی دایانیر. بوتون بونلاردان سونرا دئیه‌جه‌ییمیز بودور کی، فارس توپلومو اسکی فاشیزم و سؤمورگه گونلرینی اؤزله‌ییر، او گونلره قاییتماق ایستییرسه، اؤزو بیلر. بو، اونلارین اؤز ترجیحیدیر. لاکین بو جور یاناشمادان سونرا ایرانداکی دیگر میللتلرین، او جمله‌دن گونئی آذربایجانلیلارین بیرجه یولو قالیر: موستقیللیک. بیر سؤزله، گونئی آذربایجان جومهوریتینین قورولماسی قاچیلمازدیر».
