ایرانداکی قادین اینقیلابیندا گونئی آزربایجان اؤنجول اولمالیدیر
مجید جوادی؛ آزربایجان میللی دیرنیش تشکیلاتی مرکزی شورا عضوو
ایراندا ۱۴۰۱ گونش ایلی مهر و آبان آیلاریندا دوام ائدن اولایلاری بیر قادین اینقیلابی آدلاندیرماق یانلیش بیر آدلاندیرما اولماز.
بو اولایلارین سونوجوندا ایران رئژیمی دگیشسین و یا دگیشمه‌سین، بو بیر قادین دئوریمی‌دیر. بیر گنج قادینین حاقسیز اؤلومو ایله باشلایان، باشقا گنج قادینلارین اؤلومو ایله آلوولانان و بیر چوخ گنج قادینین مدنی دیرنیشی ایله دونیانین دیقینی چکن بو ترپنیشین ایمتیازینی باشقالاری‌نین آدینا یازماق بؤیوک حاقسیزلیق اولار. ایجباری حیجاب بو عوصیانین کود آدی و چیخیش نؤقطه‌سی اولدو؛ یانی بارداغی داشیران سون داملا اولدو. یوخسا بو بارداق ذاتاً چوخدان دولموشدو. هئچ بیر سیاسی ایدئولوژیه باغلی اولمایان، هئچ کیمه اؤزونو باغلی گؤرمه‌ین، هئچ کیمی دینله‌مه‌ین؛ آنجاق سوسیال حاقلار تملینده بیرلشن و ایران رئژیمی‌نین اورتا چاغ اویغولامالاریندان آرتیق جانا گلن گنج قادینلار باشلادیلار بو دئوریمی و اؤز دیرنیشلری ایله دونیانی حئیرته سالدیلار.
ائله اونا گؤره ده بیر آندا و بوتون سیاسی مولاحیضه‌لری گؤرمزدن گله‌رک بو حرکت بوتون بؤلگه‌لره یاییلدی. فارس بؤلگه‌لری، تورک بؤلگه‌لری، کورد بؤلگه‌لری و دیگرلرینده اعتیراضلار سورعتله یاییلدی. چونکو مساله سیاسی، میلی، ایقیتصادی و یا ایدئولوژیک یوخ سوسیال بیر زمینده باشلامیشدی و بو سوسیال طبقه‌نین میلیتی، دیلی، مذهبی، کولتورو نه اولورسا اولسون سورونلاری عئینی ایدی.
طبیعی کی ۱۴۰۱ اعتیراضلاری‌نین باشلانقیجی قادین مساله‌سی اولسا دا، اوزون ایللردن بری توپلومدا ییغیشمیش اولان پروبلئملر ندنی ایله دیگر طبقه‌لر و سیاسی حرکتلرده بو ترپنیشه آکتیو دستک وئردیلر. هئچ بیر ایجتیماعی طبقه و یا سیاسی جریان قالمادی کی بو ترپنیشه دستک وئرمه‌سین. دولاییسی ایله بو حرکت سوره‌سی، گئنیشلیگی و حجمی باخیمیندان اؤنجه‌کیلردن فرقلندی. بیر چوخلاری بو ترپنیشین بیر اعتیراض دالغاسینی کئچیب، بیر عوصیان و اینقیلابا دؤندوگونو یازدیلار و سؤیله‌دیلر.
آزربایجان گنجلیگی ایلک گونلردن اعتیباراً بو ترپنیشه قاتیلدی و طبیعی که آزربایجان میلی حرکتی ده فعاللار اولاراق و تشکیلاتلار اولاراق بؤیوک اؤلچوده بو ترپنیشه دستک وئردیلر. آزربایجان میلی حرکتی بو حرکته دستک وئرمکده و قاتیلماقدا چوخ حاقلی ایدی چونکو آزربایجانین قادینی و گنجی اؤز صینیف و سوسیال سورونلاری اوچون میداندا ایسه آزربایجان میلی حرکتی‌نین گؤره‌وی اونلارا دستک وئرمک و اونلارا آرخا چیخماقدیر. یوخسا بلکه ده فاشیست جریانلار گلیب آرخا چیخیب منیمسه‌یه چالیشاجاق.
ایراندا دوام ائدن ۱۴۰۱ اعتیراضلاری، یاخود عوصیانی و یاخود اینقیلابی کلمه‌نین تام آنلامی ایله بیر پوست مودئرن حرکتدیر. سوسیال مئدیا ایله بویا باشا چاتان، دونیانی تانییان، ایران رئژیمی‌نین اورتا چاغ دگرلری ایله هئچ بیر علاقه‌سی اولمایان، هئچ بیر ایدئولوژی قاندالینی بوینونا تاخمایان و هئچ بیر فرده موطلق اوستونلوک حاققی تانیمایان «ز» قوشاغینی‌نین حرکتی‌دیر بو چونکو. بو رئژیم دئوریلسین و یا دئوریلمه‌سین؛ بو قوشاق اؤز سؤزونو دیه‌جک. گونوموزون گئرچگی بودور و بو سئلین قارشیسندا کمیسه دایانا بیلمه‌یه‌جک.
آزربایجان میلی حرکتی اگر وار اولماق ایسترییرسه و توپلومو تمثیل ائتمک ایسته‌ییرسه بو گرچگه آیاق اویدورمالیدیر، اونا صاحیب چیخمالیدیر و حتی اونون اؤن صفلرینده یئر آلمالیدیر. یوخسا قاطاردان گئریه قالاجاقدیر. ایرانداکی قادین اینقیلابینا گونئی آزربایجان اؤنجول اولا بیلر و بونو حیاتا کئچیرمک میلی حرکتین گؤره‌ویدیر. آزربایجان میلی حرکتی ۱۹جو و ۲۰جی یوز ایللرین پاسلانمیش تئوریلرینی بیر کنارا بوراخیب، ۲۱عصرین حرکتی اولمالیدیر. سنتی داریسقال دوشونجه‌لری بیر کنارا بوراخیب چاغداش ائورنسل دگرلری منیمسه‌مه‌لییک. فردی و ایجتیماعی حاق، حقوق و اؤزگورلوگلر بیزیم اوچون هر شئیدن اؤنجه گلمه‌لی، گئرچک دمکراسی ان بؤیوک دگریمیز اولمالیدیر.
گونئی آزربایجان آنجاق بو شکیلده اؤنجول اولار و اؤنجول توپلوملار ایچینده اؤزونه یئر آچار.
* یازی دیرنیش سسی درگیسینین ۱۲-جی ساییسیندا یایینلانمیشدیر.
