شهریور آیی نین ۱۵_ی معاصر دئموکراتیک ادبیاتیمیزین نثر آتاسی گنجعلی صباحی نین وفاتی نین ایل دؤنومودور
“گنجعلی صباحی” نین اؤتن گونلری
اؤن سوز : اوستاد “گنجعلی صباحی” معاصر #آزربایجان ادبیاتی نین نثر ساحه‌سینده ان گؤرکملی یازیچی لاردان بیری دیر.
ادبیاتچی‌لار صباحی نی آزربایجان نثری نین آتاسی کیمی ساییرلار.
بو یازیچی حئکایه یازاری اولدوغو حالدا ، گوجلو و باجاریقلی بیر ادبیات شناس ایدی.
اونون ادبی_تنقیدی مقاله‌لری مختلف درگی لرده یاییلمیشدیر.
صباحی نین اثرلریندن کنار اؤز یاشاییشی دا ان ماراق چئکن بیر قونودور.
سیبری یاخینلارینداکی قازاغیستاندا یادا ایرانین #لرستان بؤلگه سینده کی سورگونلوک احوالاتی چوخ تاثیر ائدیجی بیر احوالات دیر.
بیوگرافی : بو اوستادین یاشاییش حئکایه‌سی نی ییغجام شکیلده ، یازارین اؤتن گونلریم اثریندن یاردیم آلاراق ایللر سیراسی ایله بؤیله سینه گتیرمک اولار :
۱۲۸۵ _ مرند شهری‌نین یاخینلیغیندا یئرله‌شن “میاب” کندینده آنادان اولور.
۱۲۹۲ _ یئددی یاشیی ایکن عائیله سی ایله برابر آتاسی نین یانینا گئتمک مقصدی ایله اوتای آزربایجانا کئچیب “گئده بی” شهرینده یئرله‌شیرلر.
قارداشی “صمد” ائله بو ایلده دونیایا گلیر.
(سونرالار صمد آدلیم بیر تئاترچی و فیلم رئجیسورو اولور).
ائله همان ایل بیرینجی دونیا محاربه سی باشلانیر و گنجعلی گیل آنینفیلد ( ایندیکی شامخور ) شهرینه کؤچورلر.
۱۲۹۶ _ #روسیه ده اینقلاب اولور و بو اینقلاب اؤز تاثیرینی آزربایجانلیی لارا هابئله گنجعلی کیمی اینسانلارا دا بوراخیر.
ایکی ایل بوندان سونرا شورالار حکومتی قورولور.
۱۳۰۰ _ آناسی روماتیزم دردینه دوچار اولوب ال آیاقدان دوشور.
آتاسی آناسی دولانیشیق لارینی نجات وئرمک اوچون گنجعلی نی ۱۵ یاشیندا ائولندیریرلر.
بو ایلدن بری اونون حیات یولداشی “حبیبه” گنجعلی نین ائنیش_یوققوشلو یاشاییشینا داخل اولور.
۱۳۰۳ _ #گنجه شهرینه کؤچوب یئنی آچیلمیش عمله فاکولته‌سی_ینه داخل اولوب تحصیلینی داوام ائتدیریر.
۱۳۰۸ _ اورتا مکتبی قورتاریب باکی‌دا پئداقوژی انستیتوتونون دیل و ادبیات شعبه سینه داخل اولور.
۱۳۱۰ _ معلم صفتینده گئده‌بی‌گیه گئدیر.
اوردا مکتبین مدیری تعیین اولونور.
۱۳۱۲ _ شامخورا یوللانیب مکتب ایشینده چالیشمالارینی آرتدیریر.
۱۳۱۶ _ روسیه وطنداشلیغی پاسپورتو اولمایان شخص‌لر ، خصوصی ایله #ایران تبعه‌لری اونلار ایچینده صباحی و آتاسی دا توتولوب زیندانا دوشورلر .
ائله بو ایل آتاسی اؤلور.
۱۳۱۷ _ اییرمی ایکی آی زینداندان سونرا عائیله‌سی ایله برابر قازاغاستانین سیبری یه قوووشان شمال بؤلگه‌سینه سورگون یوللانیر.
۱۳۲۱ _ بئش ایل تبعید سوره‌سینی قورتارسادا ایکینجی دونیا محاربه سی نین قیزغین چاغلارینا دوشوب اوچ ایل داها قازاغیستاندا قالماغا مجبور قالیر.
۱۳۲۴ _ ایکینجی دونیا محاربه‌سی قورتاریر. گنجعلی عائیله‌سی ایله برابر آزربایجانا ( شامخورا) قاییدیر.
۱۳۲۵ – باهار چاغیندا قیرخ ایلدن سونرا وطن تورپاغینا تبریزه قاییدیر.
بو زامان آزربایجاندا #پیشه‌وری نین حکومتی قورولوبدور.
#تبریز رادیوسوندا ایشله‌مه‌یه باشلیر.
میللی حکومت سقوط ائدیب گنجعلی ده باشقالاری کیمی زیندانا دوشور.
۱۳۲۶ _ لرستان‌ین بدرآباد کندینه سونرا دا الشتر شهرینه سورگون گؤنده‌ریلیر.
بوردا مختلف ایشلره باشلاییر.
عکاسلیق حرفه‌سینی بوردا اؤزونه سئچیر.
۱۳۲۸ _ تبریزه قاییدیر.
۱۳۲۹ _ تبریزده امنیت مامورلاری طرفیندن باسقی آلتیندا قالیب تهرانا کؤچمه‌یه مجبور اولور.
۱۳۳۱ _ خائین عنوان حئکایه‌سی ، ایلک دونه چلنگر درگیی سی نین سون اوچ ساییندا چاپ ائدیلیر.
همان ایل “اؤتن گونلریم” اثری نین اساس بؤلومونو تهراندا یازیر.
۱۳۴۱ _ حیات یولداشی ، ایللر بویو سیرداشی اولان “حبیبه” وفات ائدیر.
۱۳۴۳ _ “قارتال” آدیندا اولان حئکایه توپلوسو چاپ اولونور.
۱۳۴۵ _ عیدیه خانیم لا تانیش اولوب یئنی بیر حیات قورور.
۱۳۴۷ _ شاعیر #بولود_قاراچورلو واسیطه‌سی ایله بیر تجارتخانادا ایشه باشلیر.
۱۳۵۷ _ قارداشی صمد دونیاسی نی دییشیر.
بو ایللرده مختلف تازا یارانمیش درگی لرله امکداشلیق ائدیر.
۱۳۵۸ _ دوستو #بولود_قاراچورلو وفات ائدیر و داها چوخ یالنیزلاشیر.
۱۳۶۰ _ “شعریمیز زامانلا آدیملاییر” عنوانلی اثری چاپ اولونور.
۱۳۶۸ _ شهریور آیی نین ۱۵_ینده ۸۳ یاشیندایکن دونیاسی نی دییشیب ابدیته قوووشور.
۱۳۷۲ _ “اؤتن گونلریم” آدیندا اوتوبیوگرافی سی “عزیز محسنی” مقدمه‌سی ایله چاپ اولونور.
۱۳۸۳ _ مهر آیی‌نین ۱۷_سینده تهرانین بهمن آدلی مدنیت ساراییندا ، صباحی آدینا آغیرلاما مراسیمی قورولور.
گنجعلی صباحی نین اثرلری :
گنجعلی صباحی نین دؤرد اثری ایندی یه دک چاپ اولونوب.
بو یازارین چوخلو اثرلری هله ده ایشیق اؤزو گؤرمه ییبلر.
یاییملانان اثرلری بونلاردان عیبارتدیر : حیات فاجعه لریندن : بو اثر بیر کپحئکتیه توپلوسودور.
ایچینده کی حئکایه لر :
۱ – حیات فاجعه لریندن
۲ – خائن
۳ -اووچو
۴ – شرفلی اؤلوم
قارتال : بو حئکایه توپلوسونا دا ۹ حئکایه داخیل ائدیلمیشدیر :
۱ – قارتال
۲ – قوجالیقدا یورغالیق
۳ – گول دسته سی
۴ – آنا قلبی
۵ – عارسیز قافار
۶ – کئفلی
۷ – اوز آرامیزدا قالسین
۸ – حایات آجیلیقلاریندان
۹ – اوشاق اوسته ساواش
شعریمیز زمانلا آدیملاییر : بو کیتاب ۱۳۶۰_جی ایل تهراندا اولان نشر دونیا نشری واسطه سی ایله شهریور آییندا گون ایشیغینا چیخا بیلمیشدیر.
شعریمیز زمانلا آددیملاییر کیتابینین یازی لارین بئله سیرالاماق مومکون دور :
۱ – شعریمیز زمانلا آددیم لاییر
۲ – خلق شاعیری سهند
۳ – ادبیاتین اجتماعی حیاتیندا تاثیری
۴ – خلق شاعیری ساهرین یارادیجیلیغینا بیر باخیش
۵ -محزونون حیات و یارادیجیلیغی
۶ – ساز و سوز اوستادی عاشیق علی عسگر
۷ – آغیر ایللر و عیسی نین صون شامینا بیر نظر
۸ – مبارز شاعیر ( هاشیم ترلان )
۹ – خلق شاعیری سهنددن خاطیره لریم ۱۰ – وطن و خلق محبتی
اوتن گونلریم : بو دا خالق یازیچیمیزین دئمک سون چاپ اولموش رومان سایاقلی خاطیره لری دیر کی “عزیز محسنی” نین اؤن سوزو ایله یازیچی نین وفاتیندان سونرا چاپ ایمکانی تاپابیلمیشدیر.
بو اثر ایکی دؤنه مختلف چئویرمنلر طرفیندن فارسجایا ترجومه اولونوب.
قایناق :
۱ – “اوتن گونلریم” ، گنجعلی صباحی ، دنیا یاییم ائوی ، #تهران ، ۱۳۷۲
۲ – “معاصر دئموکراتیک ادبیاتیمیزین نثر آتاسی” ، ائلدار موغانلی ، آذری درگی‌سی ، ۵_ینجی سای ، ۱۳۸۴
۳ – ” گنجعلی صباحی گونئی آزربایجانین چاغداش نثری نین آتاسی ” ، “رضا همراز ” ین وئب سیته‌سی.
ابوذر جعفری
