اولوسلارآراسی ایشچی بایرامی موناسیبتی‌ایله آزربایجان سیاسی قورولوشلارینین امکداشلیق پلاتفورمو بیلدیریسی
آزربایجان ایشچیلری و امکچیلری
آزربایجان میللی حرکتی فعاللاری
بوگون، ایران ایسلام جومهوریتی‌نین غاغیل‌دیشی (غیرعقلانی) سیاستلرینین بیر سونوجو اولاراق، ایشچیلرین و ایشچی صینفینین گئچیم قایناقلارینین او قدر چتین حاله گلدیگی بیر دورومدا اولوسلارآراسی ایشچی بایرامینی قوتلاییریق کی، ان اساس اینسان قیداسی اولان «چؤرک»ین تامین ائدیلمه‌سی بئله ، بعضی صینیفلر اوچون چتینله‌شیب.
هئچ شوبهه ائتمه‌دن سؤیلمک اولار کی، اولکه‌نین ائکونومیک دورومونون بئله پیسلشمه‌سینین آنجاق ییرمینجی یوزایلین باشلارینداکی قحطلیکلر و آجلیقلارلا قارشیلاشدیریلابیلمک مومکوندور. بو سفیل دوروما باخمایاراق، ایسلام جومهوریتی‌نین فاسید رئژیمی هله ایدئولوژیک ماجرالارییلا مشغولدور و دوشوندوگو سون شئی خالقین معیشتیدیر.
آزربایجانلی و تورک ایشچیلر
کومونیست و سوسیالیست دوشونورلر و لیدئرلر، ایشچی حرکتینی ایللرجه ایدئولوژیک چرچئوه‌لره حبس‌ائتمیش اولسالار دا، دونیاداکی ایشچی حاقلارینی و ایشچی حرکتلرینی سوسیالیستلره و کومونیستلره اؤزه‌ل قیلماغا و ایشچیلرین دئموکراتیک ایستکلرینین گئنیشلنمه‌سینی انگلله‌مه‌یه چالیشدیلار. آنجاق باغیمسیز ایشچی حرکتلری بو ذهنیتی قیرماغی باشاردی و مودئرن دونیا ائکونومیسینده ایشچیلرین مادی و فیکری حاقلارینا یئنی بیر تانیم گتیردی.
بوگون ایشچی حرکتلری دئموکراتیک موجادیله‌نین اؤنملی بیر پارچاسیدیر و دئموکراسینین تمللرینه تانیش اولان ایشچی صینیفی، مودئرن طلبلرینی موذاکیره ماساسیندا و خیابانلاردا دیله گتیریر.
عئینی زاماندا بوگون، آزربایجان و ایران‌داکی دیگر ازیله‌ن خالقلارین ایشچی حرکتی ایران‌دا آشیری درجه‌ده مرکزیتچی گلیشمه‌نین آغریلی حقیقتلرینی درک ائدرک، ایران‌دا ایشچیلرین چتینلیکلری و اذیتلرینین بئله برابر بؤلوشمه‌دیگینی، تورک، کورد، عرب، بلوچ و لور ایشچیلری و امکچیلری‌نین داها چوخ یوخسون و مظلوم اولدوغونو بیلیر.
اونا گؤره ده بو بیلینج، ایشچیلرین «میللی عدالت و ریفاه» سایه‌سینده برابر حاقلارا صاحیب اولماسی اوچون ایشچی موجادیله‌لرینی میللی-دئموکراتیک موجادیله‌لره باغلاماقدادیر. بوگون، آزربایجان ایشچی حرکتینین سئچکینلری و لیدئرلری زنگین تاریخی تجروبه‌لره صاحیب اولاراق، ایران‌ین مرکزی بؤلگه‌لرینده‌کی ایشچی حرکتی و سول حرکتین نه یازیق کی، “ایرانشهری” توتالیتر و اینحیصارچی ایدئولوژیسینین اسیری اولدوقلارینی بیلیرلر و اونلارین بیلینجلی یا دا بیلینجسیز اولاراق گوج و سرمایه‌نین عدالتلی شکیلده بؤلونمه‌سینین قارشیسینا چیخدیقلارینی و بونا قارشی دیره‌نج گوستردیکلرینی گؤرورلر.
اؤلکه چاپیندا ایشچی حرکتینین چاغداش تاریخی، ازیله‌ن اولوسلارین ایشچی حرکتینین حساس زامانلاردا مرکزیتچیلرین و اونلارین چیخارلارینین قوربانی اولدوغونو گؤسترمیشدیر.
سون ایللرده آزربایجان ایشچی حرکتینین شوعارلارینین سیخلیقلا «آنا دیلینده» اولماسی اونو گؤستریر کی، آزربایجان‌دا دیگر حرکتلر، او جومله‌دن قادین حرکتی و اؤیرنجی حرکتی کیمی، ایشچی حرکتی ده بو بیلینجه چاتمیشدیر کی، میللی باسقی و ظولم اورتادان قالدیریلمادان و سرمایه قایناقلارینین عدالتلی شکیلده داغیدیلمادان هئچ بیر سوسیال صینیف آزربایجان‌دا و ایران‌ین دیگر بؤلگه‌لرینده ریفاه و سعادته چاتابیلمز؛ دولاییسی ایله بو یولدا هرکس بیرلیک اولمالیدیر.
آزربایجانلی ایشچیلرینین سون آیلارداکی قرئولری (اعتصاب)، آزربایجان‌داکی ایشچی حرکتینین جانلی و ساغلام اولدوغونو و آزربایجان خالقینین دئموکراتیک و قورتولوش موجادیله‌سینین آغیرلیقلاریندان بیری اولابیله‌جگینی گؤسترمیشدیر. آنجاق عئنی زاماندا، ایران مئدیاسینین قرئولره یؤنه‌لیک خبرلری بایکوت ائتمه‌سی بیر دفعه داها مرکزیتچیلرین آزربایجان ایشچی حرکتینه اؤز اینحیصارچی دار مرجکیندن باخدیقلارینی گؤستردی.
آزربایجان سیاسی قورولوشلارینین امکداشلیق پلاتفورمو اولاراق، “۱ مای” اولوسلارآراسی ایشچی بایرامینی قوتلارکن، آزربایجانین “بوتون سوسیال صینیفلار اوچون ریفاه و اولوسال سعادتی” هر زامان وورغولادیغیمیزی و ایصرار ائتدیگیمیزی و بونا دوام ائده‌جه‌گیمیزی اعلان ائدیر و بوتون گوجوموزله آزربایجان ایشچی حرکتینین موباریزلرینین یانیندا اولدوغوموزو و هر زامان اولاجاغیمیزی بیلدیریریک.
بیزجه، آزربایجان ایشچیلرینین ریفاهی و حاقلاری اوچون موجادیله ائده‌ن آزربایجان ایشچی حرکتی، آزربایجان میللی حرکتینین آیریلماز بیر پارچاسیدیر و آزربایجان میللی حرکتینین میللی سعادت و اولوسال ریفاه هدفی اوچون تاریخسل سوره‌جینی تاماملار.
آزربایجان ایشچیلری و ایشچی حرکتینین و ائلیتلرینین اؤزگور و دئموکراتیک بیر آزربایجانین اینشاسیندا دانیلماز بیر رول اوینایاجاقلارینا اینانیریق.
سونوج اولاراق آزربایجان ایشچی حرکتینین توم شهیدلرینی، اعدام ائدیلنلری و سیاسی محبوسلارینی و توم ازیله‌ن میللتلری سایغی و حؤرمتله آنیریق و توم ده‌یرلی زحمتکئشلرین بایرامینی تبریک ائدیریک.
آزربایجان سیاسی قورولوشلارینین امکداشلیق پلاتفورمو
آزوح – دیرنیش – گادپ
۱ مای ۲۰۲۲
