علیرضا قولونجو

“ ایراندا بیر چوخ قئیری-فارس سیاسی قوروپلاردان فرقلی اولاراق عملده هر هانسی زوراکی فعالیییتدن اوزاق اولان گونئی آزربایجان ملی حرکاتینین اینسان حاقلاری سؤیلمینه بو قەدر بیگانه یاناشماسی چوخ قریبەدیر،“دومان رادمهر سؤیلەییر. گونئیلی سیاسی فعال آمئریکانین سسینه موصاحیبەده گونئیلی فعاللار و تشکیلاتلار آراسیندا اینسان حاقلارینین مودافیعه ساحەسینده فعالییتلرین دورومونو دەیرلەندیریب.

 دومان رادمهرین سؤزلرینه گؤره بو گون تورکلر و تورکمنلری ایستیثنا ائتمکله ایراندا اکثیر قئیری-فارس ائتنیک قروپلارین سیاسی جریانلاری ایچه ریسینده سیلاحلی تشکیلاتلار مؤوجوددور. آنجاق همین سیلاحلی قروپلار دا هر زامان اینسان حاقلاریندان دم وورورلار.“ بو دورومدا هر هانسی زوراکی بیر فعالییتدن اوزاق اولان گونئی آذربایجان ملی حرکاتینین اینسان حاقلاری سؤیلملرینه بو قەدر بیگانه قالماسی چوخ قریبه بیر حالدیر،“ دئیه او، علاوه ائدیر.

 گونئی تشکیلاتلارینی اینسان حاقلاری فعالییتلری باخیمیندان تنقید ائدن رادمهر اؤزو و فیکیر یولداشلارینی دا ایستیثنا ائتمیر:

“ من بوتون بو تنقیدلری ایرەلی سوردویومده اؤزومو و دوستلاریمی آییرمیرام و حرکاتیمیزی بیر بوتون اولاراق دئییرم. 35 میلیون اینساندان دانیشیریق، ایستدیکلریمیزین هامیسی دا اینسان حاقلاری چرچیوەسیندەدیر، آنجاق حوقوق مودافیعچیلەییی ساحەسینده بارماق ساییسیندا چالیشانیمیز یوخدور.“

 ایسوئچده موهاجیرتده یاشایان فعالین فیکرینجه، حاضیردا دونیادا مؤوجود اولان شراییط دؤولتلری ده اینسان حاقلارینا رعایت چرچیوەسینده سییاست یوروتمەیه مجبور ائدیر.

“ ایندیکی دونیادا پست-مودئرن بیر شراییط حاکیمدیر. موعاصیر دونیادا دؤولتلر اؤز ماراقلارینی قوروماق اساسیندا دەیرلندیریلیردیلر، آنجاق بو گون داها چوخ باشقالارینین حاقلارینا داییر مؤوقئعلری ایله قییمتلنیرلر.“بو سببدن ده جناب رادمهر حئساب ائدیر کی، بئین الخالق میقیاسدا گوندەمه چیخماق ایستەین سیاسی حرکات اؤزونون اینسان حاقلارینین مودافیعەسی اوزەره گؤستریجیلرینه جیدی دیقت یئتیرمەلیدیر.

 سیاسی فعال ایرانین آذربایجان و دیگر ویلایتلرینده یاشایان تورکلرین بوتون حاقلاری و طلبلرینین اینسان حاقلاری بیاننامەلرینده نظرده آلیندیغینی وورغولاییر.

آمئرکانین سسی