میللی مئدییالاریمیز اوچون بیر سیرا نوکته‌لر و یانیتلار!-عليرضا فرشى
• آذربایجاندا دین و مذهبین چوخ اؤنملی رولو وار و روحانیت نهادی هله که هله دیر فعال دیر و ایران ایسلام جومهوریت نیظامی بو مسئله‌دن یارارلانیر! ندن؟ بونا گؤره کی ایران ایسلام جومهوریت نیظامی بو مسئله‌نی باشا دوشوب کی بو میللتین دامارینی توتماق اوچون دیندن یاپیشمالی دیر. «اکبر گنجی»نین بؤیوک بیر یالنیش دوشونجه‌سی بو ایدی کی “ایران ایسلام جومهوریت نیظامی ایسلامدان یارارلانماسین دئیه ایسلامی ییخماق لازیم دیر!” آنجاق او باشا دوشموردی کی ندن ایران ایسلام جومهورییت نیظامی ایسلامدان یارارلانیر: بونا گؤره کی میللت ایسلاما اینانیر! و ایران ایسلام جومهورییت نیظامی «اکبر گنجی»نین باشا دوشمزلیگیندن یارارلانیب، اونو میللت ایچینده خار و ذلیل بیر دوروما سالدی! بیزیم مئدیالار دا بو دوروما دوشمه‌مک اوچون دینه و میللتین بوتون اعتقادلارینا، ایتانجلارینا سایقیلی داورانمالی‌دیرلار! رحمتلیک «علی مسیو» مشروطه زامانی آذربایجاندا بیر ایللیک حکومت قوردو و ایران قاجار ارتشی‌نی 11 آی آذربایچانین دیشاریسیندا ساخلاتدی، قاجار حاکیمیتی اونو دینسیزلیگه متهم ائتدیگینده او «آذان» سسی‌نی سنگرلردن سسلندیردی و حاکیمییتین تله‌سینی و قورغوسونو پوزدو! بیز ندن آذان سسی‌نی سسلندیرمیریک و عاشورا نوحه‌سینه ایلگیسیز داورانیریق و دوشمنلریمیزه بیزی تخریب ائتمک و دینسیزلیگه موتتهم ائتمک اوچون فورصت وئریریک؟!
• تورکیه و آذربایجان حؤزه‌سینه مناسب اولان خبرلر و وئرلیش‌لر بیزیم آذربایجانیمیزا ایش وئرمز و یاراشماز! و بیزی میللتدن اوزاقلاشدیرار! مثلاً ژانویه‌یه گؤره یایینلانان خبرلر و وئرلیش‌لر بیزیم مئدیالاری میللتدن اوزاقلاشدیریب، یادلاشدیرار. چالیشمالییق یالنیز گونئی آذربایجانا مناسب اولان خبرلری و وئرلیش‌لری یایینلایاق. باشقالارینین اؤزلرینه مخصوص مئدیالاری وار و بیزیم مئدیالار اونلارا گره‌کمیر و گونئی آذربایجان بیت‌المالی‌نی قوزئی آذربایجانا و تورکیه‌یه خرجله‌مه‌مه‌لی‌ییک!
• میللتین مسئله‌سی بیزیم مئدیالارین مسئله‌سی اولمالی‌دیر: قاراداغ زیلزیله‌سی! کنکوردا فارسلارلا ریقابت ائدن اوشاقلاریمیز-گنجلریمیز! آذربایجان سویوغوندا یاشاماغا و باهالی قاز پاراسی وئرمه‌یه مجبور اولان میللتیمیز! ایشسیزلیک! ائو و یئر باهالیغی! ایجاره‌لرین چوخالماسی! اؤزؤلدورمه‌لر! قاضی‌لر و قضاوتین دورومو! اینتیظامی قووه‌لرین آجیناجاق دورومو! تروریسم ألی ایله شهید اولان بالالاریمیز! سو چکیلمه‌میش کندلریمیز! برقسیز یاشایان اوزاق کندلی‌لر! یولسوز قالان کندلی‌لر! اهر یولوندا اؤلن یولچولار! ائوله‌نه بیلمهین گنج‌لر-جاوانلار! آذربایجانین چالا-چوخورلو تیرانزیت یوللاری! تالانمیش قیزیل، گوموش و … معدن‌لری! آیلارجا آیلیق آلمایان ایشچی‌لر! زیندانلاردا جانلاری چوروین گوناهسیزلار! قادینلارین دورومو! و …! بیز میللتین مسئله‌لریندن اوزاقلاشدیقجا میللتدن ده اوزاقلاشیریق، میلله‌ته یاخینلاشماق اوچون میللتین مسئله‌لرینه و چتینلیکلرینه یاخینلاشماق لازیم دیر!
• گونئی آذربایجانا مخصوص اولان بیر لهجه ایله دانیشماق و باکی-ایستانبول لهجه‌سیندن و روس-اینگیلیز کلمه‌لری ایشلتمکدن چکینمک! میللت بیزی اؤزلریندن بیریسی بیلمه‌لی‌دیر و بیزلری یاد یئرینه قویمامالی‌دیر. تبریز، اردبیل، اورمو، زنجان، همدان، قزوین، و … لهجه‌سی ایشلنمه‌لی و میللته تانیش اولمایان کلمه‌لر ایشلنمه‌مه‌لی دیر.
• گونئی آذربایجانا اؤزل اولان و تورکیه-باکی‌یا باغلی اولمایان فیکیرلری اورتایا قویماق و او فیکیرلری میللته چاتدیرماق گره‌کیر. آذربایجانین استعمار و استثمارینی میللته آیدینلاتماق لازیم دیر.
• ایران ایسلام جومهوریت نیظامی بیر سیر عطف نقطه‌لرده ده‌گیشمه‌یه مجبور قالیر: رفسنجانی، خاتمی، احمدی‌نژاد و روحانی‌نین جومهور باشقان اولماقلاری بو عطف نقطه‌لرین باشلانقیجیندا اوز وئریر. البته کی بیر زامانلار گلیب چاتاجاق کی بو عطف نقطه‌لر چوخ گئنیش بیچیمده اوز وئره‌جک. بیز اؤزوموزو بو عطف نقطه‌لره حاضیر ائتمه‌لی‌ییک و او گونلره نظری و عملی حاضیرلیق آپارمالییق. روحانی جومهور باشقانی اولدو، آنجاق بیز حاضیرسیز یاخالاندیق و هئچ بیر طرحیمیز بو دؤره اوچون یوخ ایدی و یوخ دیر! بو مسئله‌نین بیر داها تیکرار اولماماسی اوچون چالیشمالی‌ییق و أن آزی گلن گون ایلینه دوشونمه‌لی‌ییک. بیزیم مئدیالار گلجک اوچون یایینلارینی اؤنجه‌دن پیلانلاییب و حاضیرلیقسیزلا یاخالانمامالی‌دیرلار! میللت بیزی یئنی فیکیرلر قایناغی و او فیکیرلری عملی ائتمه‌یه أن شاییسته اولان بیریسی‌لری کیمی تانیمالی دیر. فیکری یاراتماق اونو یایینلاماقسیزلا یئترسیز قالار! فیکری یاراتماق ایله بیرلیکده اونون میللت ایچینده نئجه یایینلاماسینا دا دوشونمک گره‌کیر!
• محروم توده‌لر و ألی-آیاغی یالین میللته استعماری و استثماری باشا سالماق أن ساده ایش‌دیر! یئترکی میللتی عدد-رقم و آمار ایله باشا سالاسان کی سن قیزیل اوستونده یاشاییرسان آنجاق آج قالمیسان، لوت قالمیسان، یییه‌سیز قالمیسان و اؤز دوغما یوردوندان کؤچمه‌یه زورلانمیسان و باشقا میللت‌لره قوللوقچو اولموسان: سوپورگه‌چی اولموسان، آبدارچی اولموسان، قوروجو و نیگهبان اولموسان، سرایدار اولموسان، ایشچی اولموسان، و …!
• میللتی باشا سالماق لازیم دیر کی حاکیمیت هئچ بیر طرحی آذربایجاندا بیتیرمک ایسته‌میر و بیر ایللیک ایشی قیرخ ایلده بیتیرمک ایسته‌ییر! اؤرنک و میثال اوچون خدآفرین سدی‌نین طرحی شوروی‌نین سون زامانلاری تصویب اولوب، و 24 ایله یاخیندیر هله اؤن فاییزی بیتمه‌ییب! بو سد قورتولسا 50 مینه یاخین تورک اینسانا ایش یارانا بیلر و بو طرحین بیتمه‌سی اوچون أن آزی 500 میلیون دولار پول لازیمدیر! حاکیمیت آذربایجانین بوتونلوگونده 500 میلیون دلار پول خرجله‌میر و هئچ زامان بو طرح اوچون بو قدر پول هزینه ائتمه‌یه‌جک دیر! سونگون میس معدنیندن ایلده 500 میلیون دلار پول گؤتورولور آنجاق سونگونلی‌لره 1 میلیون دلارلیق دا پول خرجلنمیر! ندن؟! آذربایجانین شهرلری بؤیومه‌مه‌لی و کنده چئوریلمه‌لی‌دیرلر و تورکلرین توپلولوقلاری ایرانین باشا-باشیندا یایینلانمالی و داغیلمالی‌دیرلار! بو بیر قایدادیر و حاکیمیت بو قایدانی پوزماز!
• 1357 اینقلابیندان سونرا آذربایجاندا هئچ بیر یئنی شهر یارانماییب و حتی بیر سیرا شهرلر کنده چئوریلیب! سراب کیمی بؤیوک بیر شهردن چوخلاری تئهرانا کؤچوب و سراب شهری بیر بؤیوک کنده چئوریلیب دیر! بؤیوین شهرلر اؤز طبیعی و یئر-سو دوروملارینا گؤره بؤیویوبلر و چوخلو کندلی‌لرین یوزه دوقسان فاییزی تئهرانا-کرجه و یوزه اونو آذربایجانین بؤیوک شهرلرینه کؤچوب و چوخلو کندلر آرادان گئدیب و کندلرین آرادان گئتمه‌سی ایله کندلرین تورک آدلاری پوزولوب، خاطیره‌لردن اونودولوبلار. بو گرچه‌یی میللته آچیقلاماق گره‌کیر!
• آذربایجانین ایچینده و دیشیندا چالیشان بوتون سییاسی آداملاری میللته تانیتماق و اونلارین مثبت و منفی ایشلرینی میللته چاتدیرماق و میللتی اونلارا گؤره آیدینلاتماق گره‌کبر. هر کس خییانت ائدیبسه قارقیشلانمالی و هر کیمسه میللت اوتون قوللوق ائدیبسه آلقیشلانمالی دیر.
• میللتین وئردیگی مالییاتلار میللته وئریلن خدمات ایله توتوشدورولمالی‌دیر! میللت مالییات وئریر آنجاق دؤلت هئچ بیر بهداشتی، رفاهی، و … خدمات میللته وئرمیر! حتی میللتین آیلیقلارینی آی باشیندا دا وئرمیر و بیر طرفدن ده مالی-ایداری فیساد هر یئره بورویوب دیر! بو فیسادا گؤره دانیشماق و حاقسیزلیقلاری میللته آچیقلاماق گره‌کیر.
• ایرانین بوتؤولوگونده اوز وئرن مسئله‌لری آذربایجان مسئله‌سی کیمی گؤرستمه‌مک گره‌کلی‌دیر! یالنیز آذربایجانا اؤزل اولان مسئله‌لری و آذربایجانلی‌لارا معذل اولان مسئله‌لری بحث قونوسو ائتمک لازیم دیر.
• آنکارا و باکی رهبرلرینه گونئی آذربایجان مسئله‌لرینه و تورک میللتینه گؤره یاد داورانیشلاری اوچون اعتراض ائتمک و اونلاری قیناماق لازیمدیر.
• آذربایجانین ایندیکی گونده‌لیکلرینی و درگی‌لرینی مشروطه و پیشه‌وری دؤرونون درگی‌لری ایله توتوشدورماق لازیمدیر و بو درگی‌لرین نه قدر ائتگیسیز و جیره‌خوار اولدوقلارینی گؤرستمک لازیمدیر.
• احمدی‌نیژاد دؤرونده طرحی ایجرا اولان مئهر ائولرینه گؤره و آذربایجاندا دؤلتین اؤز تعهدلارینا و سؤز وئردیکلرینه عمل ائتمه‌دیکلرینه گؤره دانیشماق لازیمدیر.
• آذربایجانین تعطیل و یاریم تعطیل گومروکلرینه گؤره و اونلاردا ریشوه و فیسادین یوکسک‌لیگینه گؤره یازماق و دانیشماق لازیم دیر.
• آذربایجانین خاریجی تیجارتینه و آل-وئرینه گؤره آمار و عدد-رقم دیلی ایله دانیشماق لازیمدیر. بو آمارلاری راحاتجاسینا ایرانین ایقتیصادی وئب‌سایتلاریندان و سازمانلاریندان أله گتیرمک اولار.
• آذربایجاندا آنا تولید و ایش یئرلری‌نین یارانماماسینا و اونلارین گئنیشلنمه‌مه‌سینه گؤره یازماق و دانیشماق لازیم دیر. مییانا، اردبیل، و … دمیر أریتمه فابریکالارینا گؤره، سرابین نفلین سینیت فابریکاسینا گؤره، خودآفرین سو سددینه گؤره، و …
• آذربایجان معدنلری‌نین غارت اولماسینا و آذربایجانلی‌لار اوچون ضرردن باشقا هئچ بیر خئیری اولماماسینا گؤره یازماق و دانیشماق لازیم دیر. تیکابین و خاروانانین قیزل معدنلرینه گؤره، سونگونون میس معدنی‌نه گؤره، و …!
• آذربایجانین بؤیوک یول پروژه‌لرینه و تبریزین متروسونا گؤره دانیشماق و یازماق لازیمدیر. بو طرحلری ایللر بویو دیر کی باشلانیب و هله کی هله دیر بیتمه‌ییب‌لر و بو تئزلیکده بیتمه‌لرینه ده هئچ اومود یوخ دیر!
• آذربایجان ایدمانینا اولان ظولملره و تیراختورون، شهرداری‌نین، گسترش فولادین، اورمو والیبالی‌نین؛ آذربایجان دوچرخه‌سواری‌سی‌نین، و … باشینا گلن اویونلارا گؤره دانیشماق و یازمان گره‌کیر.
• آذربایجانین ایچینده بانک‌لارین و مالی مؤسسه‌لرین یارانماسینا مانع تؤرتمه‌لره گؤره دانیشماق لازیم دیر.
• آذربایجانین ایچینده هواپیمایی اوچوش خطلرین باشقا شهرلره بوراخیلماسینا گؤره و مانع تؤرتمه‌سینه گؤره دانیشماق و یازماق گره‌کیر.
• ایرانین مدرسه و بیل‌یورد درس کیتابلاریندا فاشیستی یازیلاری میللته اوخومان و تانیتماق گره‌کیر و فارسلارین تورکلره پیس باخیشلارینی آچیقلاماق گره‌کیر.
• ….
سون سؤز: آذربایجان مئدیالاری آذربایجانا یاراشیب، و آذربایجانین و آذربایجان تورک میلله‌تی‌نین میللی یارارلاری قوللوغوندا اولمالی‌دیرلار و میللت مسئله‌لرینه یاخینلاشدیقجا میللته یاخینلاشمالی‌دیرلار!
