آزربایجان جمهورباشقانی: دیرناق‌آراسی «آرتساخ دؤولتی» جهنمه گئتدی
“یئنه آزاد ائدیلمیش تورپاقلارداییق. فضولی‌دن خوجاوند رایونونا گئدیریک. ایشغالدان آزاد ائدیلمیش خوجاوند رایونونا گئدیریک. یول بویونجا بوتون یاشاییش منطقه‌لرینین داغیدیلماسینین بیر داها شاهیدی اولوروق. بوتون کندلر، شهرلر تامامیله داغیدیلیب. اؤزو ده بو داغینتیلار ساواشدان سونرا باش وئرمیشدیر. محاربه دؤورونده – بیرینجی قاراباغ محاربه‌سی دؤورونده بو قدر داغینتیلار اولمامیشدیر، اولا دا بیلمزدی. محض ایشغال دؤورونده منفور دوشمن بیزیم شهرلریمیزی بو حالا سالیب”. ایلهام علیئو مارتین ۱۵-ده فضولی و خوجاوند رایونلارینا سفری زامانی سؤیله‌دی.
“بورا فضولی شهری‌دیر. اما شهردن اثر-علامت قالماییب. شهر یوخ‌دور، داغیدیلیب. ائرمنیلر داغیدیبلار. ایشغال دؤورونده گلیب بیزیم بینالاریمیزی سؤکوب، بینالارین داشلارینی، داملارینی آپاریبلار، اوغرو کیمی، تالان‌چی کیمی. بونلار، فضولی شهرینین قالیقلاری‌دیر. بو گون ده ائرمنیستانی مدافعه ائد‌ن خاریجی دایره‌لر گؤزلرینی آچیب باخسینلار اونلارین وحشیلیینه. اونلار کیمی مدافعه ائدیرلر؟! اوتوز ایل تورپاقلاریمیزی ایشغال آلتیندا ساخلایان منفور دوشمن بیر داشی-داش اوستون‌ده قویماییب.” دئیه قوزئی آزربایجان جمهورباشقانی ایفاده ائتدی.
“گؤرون، یوللار نه گون‌ده‌دیر. اوتوز ایل عرضینده بو یوللار آسفالت گؤرمه‌ییب. اونلارین بوتون تبلیغاتی یالاندیر، بوتون تاریخی ساختادیر. اؤزلرینی دؤولت آدلاندیریردیلار، دیرناق‌آراسی «آرتساخ دؤولتی» – جهنمه گئتدی. «دؤولت» ایدیسه، بس، نیه داش-داش اوسته قویولماییب؟ چونکی بیلیردیلر کی، بو تورپاق اونلارین دئییل. بو تورپاق آزربایجان‌لیلارین تورپاغیدیر. بورا ایشغالدان آزاد ائدیلمیش خوجاوند رایونودور”، – دؤولت باشچیسی سؤیله‌دی.
