وارلیق درگییسی‌نین سورومولوسو محمدرضا هیئت و نطقی عایله‌سیندن «آنا وارلیق» درگیسینه اعتراض یازیسی
وارلیق درگیسی‌نین قوروجولاریندان بؤیوک تورکولوق عالیم، پروفسور دوکتور حمید نطقی‌نین قلمه آلدیغی «باشلانغیج» کیتابی‌نین ایذینسیز و یانلیش بیر نسخه اوزریندن «آنا وارلیق» درگیسی طرفیندن یایینلانماسی، نطقی عایله‌سی‌نین اعتراضینا یول آچدی.
مرحوم دوکتور حمید نطقی‌نین قیزی سایین آسیا نطقی، گؤندردیگی اعتراض مکتوبوندا «آنا وارلیق» درگیسی‌نین نطقی عایله‌سی ایله مصلحتلشمه‌دن و یانلیش بیر نسخه اوزریندن یئنیدن نشر ائتمه‌سینی اخلاق‌دیشی (غیر اخلاقی) بیر داورانیش اولاراق دگرلندیردیکلرینی بیلدیردی.
خاطیرلاتمالی‌ییق کی، بو اثر ایلک دفعه سایین حسن مجیدزاده ساوالان طرفیندن لاتین الیفباسیندان عرب الیفباسینا کؤچوروله‌رک ۱۳۸۹-جو ایلده وارلیق درگیسی‌نین ضمیمه‌سی اولاراق یایینلانمیش، آنجاق یانلیشلیقلا دوزه‌لدیلمه‌میش نسخه مطبعه‌یه گؤندریلدیگیندن بو اثرین گؤزدن گئچیریله‌رک یئنیدن یایینلانماسینا قرار وئریلمیشدی. نئجه کی، گئچدیگیمیز آیلاردا نطقی عایله‌سی‌نین ایذنی و وارلیق درگیسی‌نین بیلگیسی داخیلینده سایین علیرضا صرافی طرفیندن اوزان درگیسی‌نین ضمیمه‌سی اولاراق یئنیدن یایینلانمیش و یازیم خطالاری‌نین دوزلدیلمه‌سی ایله بیرلیکده، متنده گئچن بیر چوخ آد و قونو ایله ایلگیلی اتک‌یازیلاریندا آچیقلامالار وئریلمیش و اثرین سونونا گئنیش بیر دیزین (ایندکس) علاوه ائدیله‌رک، مرحوم حمید نطقی‌یه لایق بیر اثر اورتایا چیخمیشدیر.
بیر یاندان بو اثرین مکمل بیر شکیلده یایینلانماسی‌نین سئوینجینی یاشایان نطقی عایله‌سی و وارلیق درگیسی؛ اؤته یاندان یانلیش نسخه‌نین، هم ده عایله‌یه و درگیمیزه بیلگی وئریلمه‌دن «آنا وارلیق» درگیسی طرفیندن باسیلماسی خبری ایله دریندن اوزولموشدور.
گئچن بئش ایل ایچینده وارلیق درگیسی‌نین لوقوسوندان، آدیندان و شهرتیندن ده سوءاستفاده ائدن «آنا وارلیق» درگیسی‌نین بونا بنزر اخلاق‌دیشی فعالیتلری حاقیندا یاخیندا آیرینتیلی بیر یازی یایینلاناجاقدیر.
محمدرضا هیئت
وارلیق درگیسی امتیاز صاحیبی و سوروملو مودورو
سایین آسیا نطقی‌نین آچیقلاماسی:
«پروفسور دوکتور حمید نطقی‌نین باشلانغیج کیتابی‌نین ایکینجی باسقیسی حاقیندا نطقی عایله‌سی طرفیندن وئریلن آچیقلاما:
آتامیزین «باشلانغیج» آدلی اثرینی هفته‌لرجه امک وئره‌رک ایلک باسقیدا اولان نقصانلاری و خطالاری دوزلدیب اثری گرچک دگرینه قوووشدوران علیرضا صرافی بگه و ساوالان بگه مینتداریق. بیزی و چابالاری بویونجا سورکلی بیلگی‌لندیریب کؤنلوموزو آلدیلار، تشکورلر.
آمّا مع‌الاسف بو کیتابین باسیمی سیراسیندا باشقا بیر درگیده، «آنا وارلیق»دا دوزه‌لدیلمه‌یه محتاج اولان باسقینی (نشری) ایشله‌ده‌رک بیزی شاشیرتمیشدیر. کاشکی دوکتور نطقی ایله ایلگیلی هر شئیی بیزیمله مصلحتلشدیکلری کیمی بو اثری باسمادان مصلحتلشسه‌یدیلر. هم داها ائتیک (اخلاقی) اولاردی، هم ده دگرینی قازانمیش شکیلده اولان اثردن خبردار اولاردیلار.
«وارلیق» و «اوزان» درگیلرینه تکرار تشکورلر. امگینیزه ساغلیق.
نطقی عایله‌سی طرفیندن
آسیا نطقی
۲۰۲۱/۰۲/۱۶
