آشاغیدان اۆستۆمۆزه قیسیر گرمیج اسیردی. یانقین یوردون ساری قوراقلیغی یاغیز توْرپاغی سارمیشدی‌. گؤیلردن یاغیش یئرینه سارى تیکان یاغیردی. توْزاناقلار ایلخی لاری ایسه یئرله گؤیۆن آراسیندا دلیجه سینه دوْلانیردى. یئرین دوْداغى قوروموشدو و سوسوز باغرینا چات_ چات داغ باسیلمیشدی.

آجی گؤزلرین تالواساسیندا بیر اودوم سویون سرینلییى چوْخورلانیردی. گرمیجین اوْد قامچیسی شیریق_شیریق یوْل سالیردی اؤلۆشگه ین دنیزلره.

آلین یازیلار ایستی لیین اؤگئی سسینده کی هنیرتییه تاپشیریلمیشدیرلار.
چوْراق یوردون آزغین الی سوْموروردو ایلیکلرین اؤزه یینده یووا سالان اومود داملالارینى.
فصیللر قارغانمیشدى، ساعاتلارى قوم باسمیشدى. گئجه گۆندۆز توْز ایچینده بوْغولموشدو.
ایستی قومون سرت آخینی کۆسکۆن قاپی باجالارین اۆز گؤزۆنۆ دوْلدوروردو.

یئردن گؤیه نیسگیل یاغیشی یاغیردی. هردن بیردن آلا_تالا ماهنیلارین آرغیلاری گرمیج چالاریندا آزالیب چوْخالیردی. دورولمایان قوْشوقلارین ایشیلتیسی پارلاییردی. آرا سیرا آلوْولانان اۆرکله ره سو بارداغین جالاییردی.
سانکی بیری تانیش ناغیل سسله رینی یاریم چیلپاق اوْخویوردو. هانسی سا، زامانین کئفلی لیگینی مۆرگۆله دیردی و سوسوز ایلغیمین گرچک گؤزۆنده دوْغرولوردو سویا دۆشن پلتک گۆلۆشلر.
سن ترسه آخان آخیملارین آجیماسیز نفسینده یوْغرولان دوْغما بیر ماهنی سان.سن سئوینجه بۆرۆنمۆش گؤزله ییشین شن سوْراغیندان دوْغولورسان ایپک تئللی دوْغمالیغیم، گورشاد یولون گور هارایی، آغ یاغیشی آخیداجاق کؤز_ کؤز اوْلان وارلیغینا چای سسینه قوْشولونجا. گل ساریلیم آرغین_یوْرغون قوْللارینا، گل دوْلانیم دیلک دوْلو شن بوْیونا.

سیامک میرزائى
اوین زیندانی ١٣٩٩/١١/٢۴