کئچه‌ن گونلرده ایشغالچی ائرمنیستان دؤولتی بیر داها وطنیمیزین قوزئی حیصه‌سینه هوجوم ائتمیش و بیر نئچه عسگریمیزین شهید اولماسینا و یارالانماسینا سبب اولموشدور. طبیعی قهر‌مان آزربایجان اوردوسو لازیم اولان جاوابی وئرمیش، اوستون آتش گوجو ایله دوشمنی سوسدورموش و دوشمنه آغیر ضربه ائندیرمیشدیر.

ایشغالچی ائرمنیستان دؤولتی روسیا و ایران‌دان آلدیغی سیاسی، عسگری و ایستیخبارات دسته‌یی ایله قوزئی آزربایجان جومهوریتی تورپاقلارینین ۲۰%-سینی ایشغال ائتمیش و بیر میلیوندان چوخ سویداشیمیز آتا بابا یوردوندان دیدرگین سالمیشدیر.

ایران دؤولتی بیر یاندان ائرمنیستانا هر جور دستک ساغلارکن، دیگر یاندان دا ائرمنیستانین اسرائیل‌ده سفیرلیک آچماسینا سوسماقدادیر. ایران دؤولتینین فلسطین مسئله‌سین‌ده بوتون ساختا تبلیغاتلارینا رغمن، بو مثل حاقیندا سوسماغی طبیعی کی بیرمعنالی‌دیر. چونکی اردبیلین جوما ایمامی عاملی کیمی ایران عامللری، آزربایجان جومهوریتینین اسرائیل ایله علاقه‌لرینی باهانا ائد‌رک آزربایجان دؤولتینی علیهینه تخریبات آپارماقدا و ایران دؤولتی بو باهانا ایله قوزئی آزربایجان‌دا ترور قروپلاشمالارینا دستک وئرمکده‌دیر.

روسیانین نئچه یوز ایللیک قافقاز سیاستی آیدیندیر و آنلاشیلیردیر. یالنیز اؤزونو ایسلام و شیعه مدافعه‌چیسی کیمی قلمه وئره‌ن ایران ایسلام جومهوریتینین موسلمان آزربایجان تورکلرینه قارشی ایشغالچی ائرمنیستانا وئردیگی دستک، ایران‌ین نه قدر ساختاکار اولدوغونو و ادعالارینین یالان اولدوغونو آچیقجا اورتایا قویماقدادیر.

قاراباغ موناقیشه‌سینده ایرانین آزربایجانا یوخ، ائرمنیستانا دستک وئرمه‌سی، بوتون ایسلام دونیاسی، تورک دونیاسی، اؤزللیکله ده گونئی آزربایجان تورکلرینده درین راحتسیزلیق یاراتمیشدیر. محض بو سببله کئچمیش ایللرده ایرانین قاراباغ سیاستی ایله باغلی گونئی آزربایجان‌دا بیر چوخ اعتراض باش توتموش و بو اعتراضلاردان دولایی چوخ سایدا وطنداشیمیز حبس ائدیلیب و جزا آلیبدیر.

ایران دؤولتی بیلمه‌لی‌دیر کی بو گون تبریز، زنگان، اورمو و اردبیل کیمی گونئی آزربایجان بؤلگه‌لرینده میللتیمیزی زوراکیلیق و تضییقله سوسدورموش اولا بیلر. یالنیز میللتیمیز اؤزللیکله ده گنجلریمیز بوتون اولانلاری دقت و حساسیت ایله ایزله‌ییر و ایران دؤولتینین آزربایجان تورکلرینه قارشی خاینجه سیاستی داوام ائدرسه آرتیق بیر یئرده میللتیمیزین صبری توکه‌نه‌جک و ایران دؤولتینه جاوابینی کوچه‌لرده وئره‌جکدیر.

بیز، گونئی آزربایجان سیاسی قورولوشلارینین امکداشلیق پلاتفورماسی اولاراق بو وسیله ایله قاراباغ‌داکی شهیدلریمیزه الله‌دان رحمت دیله‌ییب، آزربایجان دؤولتی و اوردوسونا تام دسته‌ییمیزی ایفاده ائدیریک. اؤزللیکله ده ایران دؤولتینی اویاریریق کی آزربایجان تورپاقلارینین ایشغالینا وئردیگی دستک آرتیق میللتیمیزین صبرینی توکتمیشدیر و بو مسئله‌دن دولایی گونئی آزربایجان‌دا میدانا گلن هر بیر حادثه‌نین مسولیتی ایران دؤولتینین عؤهده‌سینه اولاجاق‌دیر.

(گونئی) آزربایجان سیاسی قورولوشلارینین امکداشلیق پلاتفورماسی
آزوه – دیرنیش – گادپ
۱۴/۰۷/۲۰۲۰

Ermənistanın təcavüzkar hücumları ilə bağlı Azərbaycan dövlətinə dəstək və İran dövlətinə xəbərdarlıq Bəyanatı

Keçən günlərdə İşğalçı Ermənistan dövləti bir daha vətənimizin quzey hissəsinə hücum etmiş və bir neçə əsgərimizin şəhid olmasına və yaralanmasına səbəb olmuşdur. Təbii qəhrəman Azərbaycan ordusu lazım olan cavabı vermiş, üstün atəş gücü ilə düşməni susdurmuş və düşmənə ağır zərbə endirmişdir.

İşğalçı Ermənistan dövləti Rusiya ə İrandan aldığı siyasi, əsgəri və istixbarat dəstəyi ilə Quzey Azərbaycan Cümhuriyyəti torpaqlarının 20% sini işğal etmiş və bir milyondan çox soydaşımız ata baba yurdundan didərgin salmışdır.

İran dövləti bir yandan Ermənistana hər cür dəstək sağlarkən, digər yandan da Ermənistanın İsraildə səfirlik açmasına susmaqdadır. İran dövlətinin Fələstin məsələsində bütün saxta təbliğatlarına rəğmən, bu məsəl haqqında susmağı təbii ki birmənalıdır. Çünki Ərdəbilin cuma imamı Amili kimi İran amilləri, Azərbaycan cümhuriyyətinin İsrail ilə əlaqələrini bahana edərək Azərbaycan dövlətini əleyhində təxribat aparmaqda və İran dövləti bu bahana ilə Quzey Azərbaycanda terror qruplaşmalarına dəstək verməkdədir.

Rusiyanın neçə yüz illik Qafqaz siyasəti aydındır və anlaşılırdır. Yalnız özünü İslam və Şiə müdafiəçisi kimi qələmə verən İran İslam cümhuriyyətinin müsəlman Azərbaycan Türklərinə qarşı işğalçı Ermənistana verdiyi dəstək, İranın nə qədər saxtalar olduğunu və iddialarının yalan olduğunu açıqca ortaya qoymaqdadır.

Qarabağ münaqişəsində İranın Azərbaycana yox, Ermənistana dəstək verməsi, bütün İslam Dünyası, Türk Dünyası, özəlliklə də Güney Azərbaycan Türklərində dərin rahatsızlıq yaratmışdır. Məhz bu səbəblə keçmiş illərdə İranın Qarabağ siyasəti ilə bağlı Güney Azərbaycanda bir çox etiraz baş tutmuş və bu etirazlardan dolayı çox sayda vətəndaşımız həbs edilib və cəza alıbdır.

İran dövləti bilməlidir ki bu gün Təbriz, Zəngan, Urmu və Ərdəbil kimi Güney Azərbaycan bölgələrində millətimizi zorakılıq və təzyiqlə susdurmuş ola bilər. Yalnız millətimiz özəlliklə də gənclərimiz bütün olanları diqqət və həssasiyyət ilə izləyir və İran dövlətinin Azərbaycan Türklərinə qarşı xaincə siyasəti davam edərsə artıq bir yerdə millətimizin səbri tükənəcək və İran dövlətinə cavabını küçələrdə verəcəkdir.

Biz, Güney Azərbaycan Siyasi Quruluşlarının Əməkdaşlıq Platforması olaraq bu vəsilə ilə Qarabağdakı şəhidlərimizə Allah rəhmət diləyib, Azərbaycan dövləti və ordusuna tam dəstəyimizi ifadə edirik. Özəlliklə də İran dövlətini uyarırıq ki Azərbaycan torpaqlarının işğalına verdiyi dəstək artıq millətimizin səbrini tükətmişdir və bu məsələdən dolayı Güney Azərbaycanda meydana gələn hər bir hadisənin məsuliyyəti İran dövlətinin öhdəsinə olacaqdır.

(Güney) Azərbaycan Siyasi Quruluşlarının Əməkdaşlıq Platforması
AZOH – Dirəniş – GADP
۱۴/۰۷/۲۰۲۰