یازی:
دوغانی قورویالیم – سیامک میرزایی
یارقیج: نییه اورمو گؤلونون قوروماسینا گؤره اعتراض ائیلمی یاراتماق ایسته‌ییردیز؟
دوغانی، چئوره‌نی قوروماق هر بیر وطنداشین گؤره‌وی‌دیر او اوزدن
یارقیج: اورمونون میللت‌وکیل‌لری واردیر اونلار بو مساله ایله ایلگیله‌نیب بیر ایش‌لر گؤرورلر سیز نئچه‌دن بیرسیز، سیزی کیم سئچیب بو ایشه قاتیلاسیز؟
ایران آنایاساسینین ۵۰-جی ماده‌سینه اساسلاناراق دوغا و چئوره‌نی قوروماق بوتون وطنداشلارین گؤره‌وی ساییلیر اوردا میللت‌وکیلی دئییل وطنداش گؤره‌وی یازیلیب.
۱۳۹۰-جی ایلده اورمو گؤلونون قورودولماسی ایله باغلی گونئی آذربایجاندا اعتراض آکسیالاری باش قالدیردی و هر زاماندا اولدوغو کیمی حاکیمیت بو مساله‌نی امنیتی مساله‌یه چئویریب و مین‌لرجه آذربایجانلینی آیاقلاییب، دوستاق ائتدیلر.
اوستده گتیردیگیم دیالوگ منله موغانین بیر یارقیجی آراسیندا اولان یارقیلامانین بیر پارچاسی‌ایدی و سونوندا ۵۰۰ مین تومن جریمه اؤده‌مه‌یه محکوم اولموشدوم، من اورمو گؤلون قوروماق اوچون سوچلانمیشدیم.
ایراندا، NGO و سیویل توپلومون اولماماسی اوزوندن هر بیر مساله‌ده سورون یاراندیقدا، کیمسه‌نین الیندن بیر ایش گلمیر، هر کیم جسارت ائدیب سورونلاری آچیقلاییرسا و یاخود هانسیسا چاتیشماز و یانلیش ایشلره گؤره اعتراض ائدیرسه او آداملارین سونو دوستاقلانماقلا بیتیر، نییه‌کی بوردا هر بیر وطنداشین یاخشیلاشماغا دوغرو آتدیغی هر بیر آتدیم دؤولت طرفیندن میللی گوونلیگی پوزماق کیمی آلقیلانا بیلر، ایستر شعر اوخوماق اولسون، ایستر حاق ایسته‌مک، ایسترسه‌ده هانسیسا چاتیشماز مساله‌لری گونده‌مه گتیریب و یاخود الشدیرمک.
بوگون آذربایجاندا اولان سورونلارین سایی آرتیق باشدان آشیب‌دیر، آنادیلین یاساقلیغی، ایشسیزلیک، یوخسوللوق، آجلیق، فلاکت، باهالیق، آلیم گوجون آزالماسی، توپلومسال سورونلار، دوستاق‌لار، یوللارین سورونلاری، کرونا خسته‌لیگی، مدنی آزادلیق‌لارین اولماماسی، پارتیا و باسین آزادلیق‌لاری‌نین اولماماسی، کولتورل سورونلار، چئوره‌نین آجیناجاقلی دورومو و ساییرا..
آنجاق بوردا وورغولاماق ایسته‌دیگیم مساله چئوره ایله باغلی‌دیر. بیلدیگیمیز کیمی آراز چایی، ارمنستان دؤولتی‌نین فابریکا توللانتی‌لاری اوزوندن، کیرله‌نیب بولانیر، اونا گؤره‌ده موغان بؤلگه‌سینده خسته‌لیک‌لر اؤزللیکله‌ده خرچنگ خسته‌لیگی آرتیر، کئچن ایل و بو ایل ایسه قاراداغ مئشه‌لری و اوردا یاشایان حیوان‌لار، چئشیدلی ندن‌لر اوزوندن یانیب کوله دؤنورلر، بیر سیرا یئرلرده ایسه هانسیسا معدن ماده‌لرینی الده ائتمک اوچون، چئوره‌نی کیرلندیریرلر(زهرلندیریرلر)
و یاخود کیمی‌لری آغاجلاری کسیب دوغراییرلار، گؤل‌لرین، چایلارین سولاری آزالیر و هر یئر قوراقلیغا ساری گئدیر.
اوسته گل چئوره کولتورونون اولماماسی اوزوندن اینسانلاردا چئوره‌نی پیس دوروما سالماقدا رول اویناییرلار، هردن ایسه آدینی اینسان قویان کیمسه‌لر طرفیندن حیوانلارا ائدیلن شکنجه و اینجیتمه فیلیم‌لری هامینی اوزور.
بو مساله‌لری سادالاماقدان آماجیم بودور:
بیز بو تورپاقدا بو دوغادا یاشاییریق و یاشادیغیمیز یئری، تورپاغی، چئوره‌نی دوغرو-دوزگون، آری و تر-تمیز ساخلاماق بیزیم بورجوموزدور. بیزلر هانسیسا اقتصادی مساله‌لره گؤره دوغانی پیس دوروم‌لارا سالمامالی‌ییق، اونو اؤزلریمیزه و اؤزللیکله‌ده گله‌جک نسیل‌لره اولدوغو کیمی تاپشیرمالی‌ییق.
تورپاغی سئویریکسه، اونا وطن دئییب، منیمسه‌ییریکسه، اونا گؤره سوروملو اولمالی‌ییق و دوغامیزی قوروماق اوچون الیمیزدن گله‌نی اسیرگه‌مه‌مه‌لی‌ییک.
بو هم چئوره ساغلاملیغی، همده چئوره اوزره یاشایان حیوان و اینسانلار اوچون اؤنملی بیر ایش‌دیر.
میللی سوروملولوق، توپلومسال سوروملولوق و چئوره سوروملولوغو هر بیر سیویل اینسانین اؤزللیک‌لریندن ساییلیر.
سوروملو اولماقدان قاچیریقسا سورونلارین سایی سایسیز اولاجاق البت.
