ناموس جینایتی
ناموس جینایتی؛ رومینا-نین آتاسی، ۱۴ یاشلی قیزینی یوخو ایچینده‌یکن اوراق‌لا اؤلدوردو
گیلان پولیسی، بو اوستان‌ین کندلری‌نین بیرینده 14 یاشلی قیزین اؤز آتاسی‌نین الی‌یله ناموس جینایتینه قوربان گئتدییینی اونایلادی. محکمه مقام‌لاری، نئچه گون سس‌سیزلیکدن سونرا، بو دوسیانین «اؤزل آراشدیریلاجاغینی» بیلدیریبلر.
«قاتیل»ین آدی «مقتولو»ون اعلانیندا!
گیلان پولیسی، بو اوستان‌ین کندلری‌نین بیرینده ۱۴ یاشلی قیزین اؤز آتاسی‌نین الی‌یله ناموس جینایتینه قوربان گئتدییینی اونایلادی. محکمه مقام‌لاری، نئچه گون سس‌سیزلیکدن سونرا، بو دوسیانین «اؤزل آراشدیریلاجاغینی» بیلدیریبلر.
نئچه گون اؤنجه بیر خبر یاییلمیشدی کی، رومینا اشرفی‌نین آتاسی اونون یوخو ایچینده اوراق باشینی کسیب!
و جینایت خرداد آیی‌نین بیرینده تالش شهری‌نین حویق بؤلگه‌سینده گرچک‌لشمیشدی آنجاق خبری نئچه گون سونرا یاییلدی. گیلان اوستانی‌نین سوسیال پولیس باشقان یاردیمچیسی، مجید رسول‌زاده، مقتول‌دان آد آپارمادان دئییبدیر پولیس آراشدیرمالاریندا، سانیق (متهم) قیزینی اؤلدورمه نه‌دنینی «عایله سورون‌لاری و قیزین ائودن قاچماسی» بیلدیریب.
رسول‌زاده دئدی: ۳۷ یاشیندا بیر کیشی اؤز قیزینی، بوینونا ایتی بیر نسنه ایله ضربه‌لر ووراراق اؤلدوروب، و جینایت یئرینده توتوقلانیب.
اونون دئدییینه گؤره، پولیس سورغولاندیرمالاریندا سانیق دئییب، اونون قیزی عایله‌نین رضایتی اولمادان ۳۰ یاشلی بیر کیشی ایله ائولنمک اوچون ائودن قاچمیشدی.
محکمه مقام‌لاری‌نین دئدییینه گؤره، رومینانین آتاسی گؤزآلتینا آلینیب، جینایتین دورتوسو (انگیزه) و نه‌دنی حاقیندا داها کامیل سوروشدورمالار داوام ائدیر. گیلان‌ین یئرلی مئدیالاری راپور ائتمیشدیلر کی رومینا اشرفی، عایله‌سی‌نین جیددی قارشی چیخدیغی بیر ایلیشکی‌ده‌یدی بو اوزدن ده ائودن قاچیب. آنجاق پولیس، عایله‌لرین بیلدیری‌لری اساسدا اونو و یانینداکی کیشی‌نی توتوقلاییب. یئرلی تانیق‌لارین (شاهد) دئدییینه گؤره رومینا جان قورخوسوندان ائوه قاییتماق ایسته‌میرمیش آما پولیس «قانون اساسیندا» اونو عایله‌سینه تحویل وئریب.
بو راپور اساسیندا ائوه قاییتدیقدان سونرا، رومینانین آتاسی یوخودا اونون سوراغینا گئدیر، اؤنجه اونو بوغماق ایستیر آما بوغا بیلمیر و اوراق ایله اونون بوینونو ووراراق، باشینی بدنیندن آییریر! رومینانین آناسی بو صحنه‌نین گؤرونجه های‌هارای سالیب، فغان ائده‌رک قونشولاری چاغیریر و نهایت‌ده پولیس رومینانین آتاسینی توتوقلاییر.
گیلان محکمه یاردیمچیسی، جان احمد آقایی، رومینانین قتلی حاقیندا دئدی: اؤولاد عایله‌سینه تپشیریلاندان سونرا، اونلار گئجه‌نی آستارادا بیر اقربا‌نین ائوینده کئچیریرلر. اورتام نورمال و طبیعی ایمیش. آنجاق صاباحیسی گون از کندلرینه قاییدیرلار و بللی دییل اودا غیر عادی اولان نه اتفاق اولور کی، آخشام چاغی قیز یوخودایکن آتا اؤز قیزینی اؤلدورور.
بو ناموس جینایتی‌نین سوسیال مئدیادا، شوک و اینانیلمازلا یاناشی، گئنیش یانسیماسی اولدو.
۱۴ یاشینداکی قیزین اعلامیه‌سی‌نین شکلی الدن- اله دولانیر؛ بو اعلامیه‌ده «مقتول»ون آدی آلتیندا «قاتیل»ین آدی، بیرینجی عزالی عنوانیندا یازیلمیش!
بو مؤوضوع، دوسیانین یارغیلاما سوره‌جی‌نین یانی سیرا، سوسیال شبکه‌لر قوللانیجی‌لاری آراسیندا بؤیوک نیفرت و تنقیدلرین دالغالانماسینا سبب اولوب. اسلامی مجازات قانون‌لارینا گؤره، ایراندا اؤز اؤولادینی اؤلدورن آتا قصاص اولونماز و محکمه‌ده جنایتی ثبوت ائدیلندن سونرا دیه و حبسه محکوم اولار.
گیلان اوستان بهزیستی‌سی‌نین سوسیال ایشلر یاردیمچیسی، بو جینایتی «اوشاق حاق‌لاری‌نین آچیق نقض ائتمه اؤرنه‌یی» آدلاندیریب، بو اولایین کولتور یوخسول‌لوغوندان و «تعصب‌لو» اینانج‌لاردان قایناقلاندیغینی بیلدیریب. رضا جعفری سدهی دئییب، جینایتین ماهیتینه گؤره، «اوشاق و یئنی یئتمه‌لره دستک قانونونون بئشینجی ماده‌سی» اساسیندا دؤولت ساوجیسی عملیاتا کئچیب.
ایران جمهور باشقانی‌نین قادین و عایله ایش‌لری یاردیمچیسی، بو جینایته تپکی اولاراق اؤز توییتینده یازیب، “دؤولت و مجلیسین تعقیبی ایله اوشاق‌لار و یئنی‌یئتمه‌لره دستک لایحه‌سی سون آشامالاریندادیر”. بو لایحه ایکی ایل اؤنجه ایرانین مجلیسینه گؤندریلیب آنجاق هله اونایلانماییب. /سانجاق
