گادپ سؤزچوسو سایین ماحمود بیلگین‌ین دکتر چهرگانی‌نین ادعالاری ایله باغلی آچیقلاماسی
آچیقلاما
سایغین و دیرلی دوستلار:
سون گونلرده چهرگانی بی من و حیات یولداشیم افسانه سولدوزلویا ووردوغو چیرکین ایفترالار و یالانلاردان دولایی، میللی حرکاتیمیزین بو گونکو آغیر دوروموندا، چوخ اوزونتو ایله اؤز حاقیمدا نئچه قونودا آچیقلاما وئرمه‌لییم.
بیلگین آدی
۱۹۹۸-ده اونودولماز رحمتلیک حسن بی دمیرچی ایله ایلک گؤروشوم استکهلم دا اولدو. اونا سوی آدیمی سئومه‌دیگیمی دئدیم، دئدی فاضلیان نین معناسی بیلگیندیر منده سئودیم بو آدی و گؤتوردوم. زامان کئچیب اوچ ایل سونرا ۲۰۰۱-ده ایلک دفعه چهرگانی بیی گؤردوم، ایندی ایسه بی ادعا ائدیر منه بیلگین آدینی او قویموشدور! بو تام بیر یالاندیر.
سولدوزدا کوردلرله بیرگه تورکلری اؤلدورموشم!!؟؟
۲۰۰۱ ایلینده چهرگانی بی ایسوئچه گلنده اوچ ایلییدی آزربایجان سسی رادیوسونون آپاریجیسییدیم. حیات یولداشیم افسانه سولدوزلو ایسه ایسوچ آزربایجان فئدراسییاسینین باشقانییدی.
لوبیچیلیک فعالییتلرینده او جومله‌دن آوروپا شوراسیندا گؤروشلره گئدرکن منیم اؤنری و ایصراریملا چهرگانی بی تشکیلاتلانماغا ماراقلاندی. “گونئی آزربایجان” سؤزونون تشکیلاتین آدیندا اولماسی اوستونده دایاندیم، چوخلو دانیشماقلاردان سونرا گاموح آدی اورتایا چیخدی. ۲۰۰۲-ده ایلک توپلانتینی باکیدا کئچیردیک و آردیندان آنایاسا، بایراق و تشکیلات بؤلوملری و اؤزللیکله ایچ قولون یارانماسی حاقدا بیرلیکده قرارلار آلدیق و گونئیین ان گوجلو تشکیلاتین یارانماسینا ایمکان یاراندی .
دیشاریدا چوخلو اولوملو ایشلریمیز اولدو، دوغال اولاراق چوخلو پروبلئملریمیزده اولوردو .
هر موخالیفینه بالاجا فیکیر آیریلیقلاری اوستونده توهین و ایفترالارلا ووراندا، دوستلارلا بیرگه اورتامی یوموشاتماغا و سهولرینی یوماغا چالیشاردیق. بو قونودا اونلارجا اؤرنک وئره بیلرم.
ایللر بویو اونا و عاییله سینه ماددی یاردیمیلاریم اوچون منه قارشی یوموشاق داورانماغا چالیشاردی آنجاق ۲۰۰۷-جی ایلین سونوندا آرامیزدا “آزربایجان و تورکیه پرئزیدئنتلری ایله داورانیش طرزینده جیدی ایختیلاف چیخدی. (تشکیلات قونوسوندا دا اؤنملی فیکیر آیریلیقلاریمیز وارییدی). او منیم اونا موخالیف اولوب یالنیشلارینی دئمگیمه دؤزه بیلمه‌دی، سونوندا بیر گون اینتئرنئتده اؤز سسی ایله گویا! آچیقلاما گتیردی کی اونا خبر گلیب کی ماحمود بیلگین سولدوزدا کوردلرله بیرگه تورکلری اؤلدوروب. ۷ ایل بیرگه چالیشاندا بو خبر اونا یئتیشمه‌میش، فیکیر آیریلیغیمیز اولارکن خبر یئتیشمیش!.بئله‌لیکله منی باشقان یاردیمجیلیغیندان اوزاقلاندیردی. یولوموز آیریلدی. من اونون کاراکتئرینی تانیدیغیم اوچون اؤزومدن دیفاع ائتمگی بوش وئردیم، میللی حرکتین گوندمینده داها اؤنملی سورولار اولمالیدیر دئیه شخصی حاقیمدان واز کئچیب ۱۲ ایل سوسدوم.
نه یازیق کی ۱۲ ایل او گونلردن کئچسه‌ده بو ایفتیرا و یالانلاما کامپانییاسی حالا داوام ائدیر.
چهرگانی یئنی یالانلاماسیندا ایدیعا ائدیر من و حایات یولداشیم اونا دئمیشیک ۱۹۷۹-جی ایلین باهاریندا، سولدوزون قانلی تئرؤر اولایلاریندا، بیز هیجرینین سیلاحلی گوجلریله بیرگه ۷۰۰ تورکو اؤلدوموشوک!! بو چیرکین ایفتیرایا گلدیغیمیزد، ۴۰ ایل بوندان اؤنجه‌کی گونلریمی دانیشمالییام:
– ۱۳۳۵(۱۹۵۶) ده اورمودا بیر آزربایجانلی تورک عاییله سینده دونیایا گؤز آچدیم. ۱۳۵۵ده مازنداران اونیوئرسیته‌سینده ۲۰ یاشیندایکن چیریک فدای تشکیلاتی و اؤزه‌لیکله جز‌نی نین یازیلاری ایله تانیش اولوب شاهچیلیق سیستیمینه قارشی موجادیله‌یه باشلادیم.
– ۵۷ اینقیلابیندان ایکی آی اؤنجه اورمییه‌ده شاها قارشی اعتراض آکسییاسیندا یورگیمین یانیندان بیچاقلاناراق (شهرین ایلک یارالیلاریندان اولاراق) ایکی آی خستخانادا قالدیم (عملیاتدا هئپاتیت ب قانی ووردوقلاری اوچون ساریلیق توتاراق اینقیلاب گونلرینی اورمو خستخاناسیندا کئچیردیم).
– بهمان اینقیلابیندان همن سونرا، او زامانلار آزربایجان میللی تشکیلاتلاری اولمادیغی اوچون ایرانچیلیق دوشونجه‌سی اساسیندا دئموکراسی و توپلومسال عدالت موباریزه‌سی یولوندا (مذهبی یا سولچولوق دوشونجه‌لری آراسیندا) فدای تشکیلاتیندا فعالییته باشلادیم.
سولدوزدا کورد تئرؤر حرکتی
۱۳۵۸-جی ایلین ایلک باهار آییندا من مازنداران اونیوئرسیته‌سینده الکتروتکنیک ساحه سینده سون تئرمی اوخویارکن سولدوزدا کورد دئموکرات تشکیلاتی سولدوزو قانا بله‌دی. آنجاق، نئچه گون سونرا حجت الاسلام حسنی و بورچالی جنابلارینین اورمودان سولدوزا میللی قووه‌لریله گلمه‌لری و معبودی جنابی نین میللی گوجلریله بیرلشرک کورد سیلاحلی قووه‌لری یوزلر کیلومتر سولدوزدان اوزاقلارا قاچماغا مجبور ائتدیلر. دئمه‌لییم منیم داییم بورچالی کومیته اویسی اولاراق سولدوزون آزادلیغیندا ایشتراک ائتمیشدی، هابئله او قانلی گونلرده حایات یولداشیمین ایکی قارداشینی کورد سیلاهلی قوووه‌لری اسیر آلاراق اؤزلریله آپارمیشدیرلار. حایات یولداشیم افسانه نوری، سولدوزون یئرلی تانینمیش عاییله لریندن و رحمتلیک معبودی نین قوهوملارینداندی.
من نه اینکی او گونلر بلکه او گونلردن ۶ آی سونراسینا قدر نه تک سولدوزدا، بلکه گونئی آزربایجان توپراقلاریندا بئله اولمامیشام!!
من ۱۳۵۸-جی ایل مهر آییندا (سولدوز اولایلاریندان ۶ آی سونرا) ۲۳ یاشیندا تکنیک اؤیرتمه‌نی اولاراق سولدوزون تکنیک اوخولو (هونریستانیندا) ایشه باشلادیم. من سولدوزا گلنده هئچ کورد تئرؤر ائلمانی بؤلگه‌ده یوخویدو! بیر چوخ کورد وطنداشی بئله سولدوزدان قاچمیشدی.
چهرگانی بی بیله‌رکدن یالان اویدویور
– کورد -تورک ساواشیندا سولدوزدا اولمامیشام، بونو ۴۰ ایل اؤنجه بوتون منی تانییان اؤیرتمنلر، طلبه‌لر، یاشلی میللی فعاللار شاهیددیرلر. نئجه‌کی۱۲ ایل اؤنجه ایلک دفعه چهرگانی بی بو چیرکین ایفتیرانی ووراندا تانینمیش میللی فعال سایین ارسالان بی مردانی منیم او زامانلار سولدوزدا اولمادیغیمی تصدیق ائتمیشدیر.
– من عسگرلیک ائتمه‌دیگیم اوچون (۵ ایل ائیتیم وئرمک زورودیدیم) هئچ زامان سلاح الیمه آلمامیشام و قوللانماغینی بئله باشارمیرام! البته شوبهه‌سیز کی آزادلیغیمیز اوچون گرکیرسه سئوه سئوه اؤیرنرم.
– کوردلر سولدوزدا او عرفه ده ۷۰۰ تورک اؤلدوره بیلمه‌ییبلر کی من و حایات یولداشیم اونون آپاریجیلاریندان اولاق.
– ۱۳۵۸-۶۲جی ایللر سولدوزدا اولدوغوم زامان فدای (اکثریت) اؤرگوتونون گنجلر و اؤیرتمنلر سوروملوسویدوم. هئچ بیر کورد اؤرگوتو ایله ایلیشگیم اولمامیش کی من اونلارلا سیلاحلی ایش بیرلیگیمده اولسون! (هابئله هئچ زامان فدایلارین اورمو شهرینده سوروملولوغوم اولماییب)
– یالانچینین حافظه سی گوچسوز اولار! من هیجری (ایندیکی کورد دئموکرات پارتیسینین باشقانی) ایله ایلک گؤروشوم سولدوز خالقین قانلی اولایلاریندا یوخ، بلکه چهرگانی بیین ایسته‌دیگی اساسیندا گاموح باشقان یاردیمجیسی اولاراق ۲۰۰۵(۱۳۸۴)-ده لندن ده فارس اولمایان میلتلرین ۱۳ تشکیلاتین ،لیدئرلرینین ایشبیرلیک توپلانتیسیندا اولوبدو! (من ۲۰۰۱ ایلینده گاموح ون یارادیجیلاریندان اولاراق ۲۰۰۷-نین سونونادک گاموح-آت باشقانی و گاموح ون باشقان یاردیمجیسی اولموشدوم). عئینی توپلانتیدادا بیز و اونلارین آراسیندا (هیجری –حسن زاده) گرگینلیک یاراندیغی اوچون ایکی جیبهه‌یه بؤلوندوک.
شریعتمداری حرکاتی
– ۱۳۵۸ – ۵۹ (۱۹۷۹-۸۰)دا، اوخولدا ائیتیم وئردیغیمده هر زامان (اؤزللیکله ایش قوراللاری درسی ساعاتلاریندا) تورکجه درس وئرمیشم و حتّی دیگر کیلاسلاردان دا بعضی طلبه‌لر بو مسله‌یه ماراقلانیب درسلریمده ایشتراک ائدردیلر.
سولچو اولاراق خمینی یه قارشی شریعتمداریدن حیمایه ائدردیم، ولایتی فقیهه قارشی و ایراندا فئدرال اؤلکه اولماسینی شریعتمداری آدی آلتیندا تبلیغ ائدردیم. اؤزللیکله سولدوزدا شریعتمداری و اونون نوماینده‌سی موللا موحریر چوخ گوجلویدو.
– من خالق موسلمان حرکتین میلیونلوق آکسییالاریندا تبریزده ایشتراک ائتمیشدیم. چیریک فدای ایکی بؤلونموشدو، آزلیق شریعتمدارینین یانیندا و چوخلوق اونا قارشییدی. دوستلاریمین چوخو فدای اکثریتده قالدیغی اوچون منده اکثریتده قالدیم آما شریعتمدارینی خمینی یه ترجیح ائدیردیم .
۳۳ ایل اؤنجه سولچو اولاراق وطندن قاچدیم .۲۵ ایلدیر میلتچی اولاراق یورگیمده وطنیمله یاشیرام.
چهرگانی بی حاقدا سایغی دگر دوستلاریم حسین بی تورک ائللی و جواد عباسی کئچمیشده آچیقلامالاردا بولونموشدورلار من ایسه سوسموشدوم آنجاغق گرکیرسه بو قونولاردادا آچیقلاما گتیره بیلرم:
۱- میللی فعاللارا قارشی ایفتیرا و قارا یاخمالاری
۲- موهندیس امانی بیین شهادتیندن سونرا یالانجاسینا اونو اؤز ایلک باشقان یاردیمجیسی کیمی اعلان ائتمه‌سی
۳- میللی حرکات آدی ایله یاردیم آلیب، آنجاق اؤز شخصی یاشاییشیندا خرج ائتمه‌لری
۴- قاچقین میللی فعاللاریمیزا تاییدیه طلبلری قارشیسیندا پول ایستمکلری
۵- آلمانییادا ماحمود تیکانین و آزربایجاندا جاهاندار بی اوغلونون گویا اونو اؤلدورمک ایسته‌دیکلری حاقدا
۶- سیاست آدی آلتیندا تانینمیش شخصلره ایهانتلری (و جومله‌دن مهربان خانیم و سایین ایلهام علی اف) و سیاسی دوشونجه‌لرینده ایکی اوزلو داورانیشلاری
۷- یوکسک سوییه‌ده اولان سییاسی گؤروشلرده یئرسیز و بوش بوش دانیشیقلاری حاقدا
۸- گئری قالمیش اخلاقی باخیشلاری، اؤزللیکله قادینلار حاقیندا
۹- منلیک اساسیندا دار سیاسی دوشونجه‌لری حاقدا
۱۰- تشکیلاتچیلیغا اینانماماسی (اؤرنک اوچون، ۱۱ نفر ایجرایی سیاسی هئیت اویه‌لرینین ۵ نفرینی او تعیین ائدیردی! آنجاق هئچ بونو دا بئله قبول ائتمه‌دی)
۱۱- یو ان پی او ایله باغلی گاموح و گادپ اویه‌لیگینده، باشیمیزا گتیردیگی اویونلارلا باغلی
۱۲ – ۲۰۰۶ ایستانبول باکی دئپورتلاریندا یارادان اولومسوز دوشونجه‌لری، سییاسی تشکیلاتی آچیدان ائتگیلری حاقدا
۱۳ – ۲۰۰۷-جی ایلین سونوندان من آیریلاندان سونرا، الی باغلی قالیب واشینگتن دان بیزیم لوبیچیلیک، بیرلیک چابالاریمیز، آزربایجان و تورکییه‌ده‌کی فعالییتلریمیزی اوزاقدان ایزله‌مه‌سی اونون اوستونده بؤیوک باسغی یارادیب ائله‌کی اولومسوز ایشلری هاقدا اؤزللیکله سون ایلده ایستانبولدا اولانلاردان و یایدیغی ایفترالارلا باغلی،دانیشا بیلرم.
من اونون اؤزل گئری قالمیش ایلیشگیلری حاقدا البته کی دانیشمام، او اونون اؤزل حایاتی. آنجاق، اوستده‌کی هر هانسی قونونو گرکیرسه آچیقلایا بیلرم.
چهرگانی بی ۱۹۹۶ سئچگیلرینده میللی حرکاتیمیزدا اولوملو رول اوینامیش حرکاتیمیز داها جانلانمیش، منده ۷ ایل چالیشدیم اونا یاردیمجی اولوب بلکه اونون واسیطه‌سیله گونئی آزربایجاندا اؤرگوتلشمه پروبلئمینی چؤزک. اؤزوم و بوتون عاییله مله بیرگه ماددی و دوشونسل و عملی ایشلرله بوتون ایمکانیمدان فایدالاندم، هئچ نیی اسیرگمه‌دیم. ایسته‌دیغیم کیمی ،واحید بیر اؤرگوتد، باشاریلی اولامادیق، آما ۲۰۰۱ دکی چابالاریمیز بو گون یئنی گاموح، گادپ، آذوح و گاموح ون بعضی ساغلام اویه‌لرینی میللی حرکاتیمیزا پای وئردی.
چهرگانی بیین اولومسوز و داغیدیجی داورانیشلارینا باخمایاراق، بیر سیرا قونولاردا دا او ایللرد(۲۰۰۱- ۲۰۰۷) اؤنملی باشاریلار الده ائتدیک:
_ گاموه ایچ قولونون یارانماسی، دیشاریدا گاموح-آت، گاموح-ت ج ت، گاموح، آک ت و اوست اوستده ۱۶ شهرده بورولارین یارانماسی
– گونئی آزربایجان سؤزونون سیاسیلشمه‌سی و گرچک بیر فاکت کیمی قبول اولونماسی
– گونئی آزربایجان میللی حرکاتین بایراغی
– اؤز گله‌جگین بلیرله‌مه حاقی سییاسی ایسترتئژی کیمی قبول اولونماسی
– لوبیچیلیک حاقدا آتیلان بعضی آددیملار
– دیشاریدا گونئی آزربایجان کولتور ساحه سینده چابالار،ی سیاسیلشمه‌یه یؤن توتماسی، دیگر سیاسی پارتییالارین یارانماسی
– گونئی آزربایجان سسی رادییوسونون بیر ایل ایرانا جانلی یاییلماسی و ایللر بویو آوروپادا یاییلماسی
– تورکییه و آزربایجاندا گونئی مساله سی داها آرتیق گوندمه گلمه‌سی
و ….
و! ،۱۹۹۵-ده رحمتلیک زهتابی و دوستلاری باشقا داها یئتنکلی و سیاسی – تشکیلاتچی آدایی بولموش اولسایدیلار، بو گون میللی حرکاتین گوجو اؤزوموزله موجادیله‌یه یوخ، فارس شووینیزمینه قارشی اوداقلانمیشدی.
گونئی آزربایجان دئموکرات پارتیسی نین (گادپ)سؤزچوسو
ماحمود بیلگین
۲۰۱۹٫۰۸٫۰۸
