سون زامانلاردا گونئی آزربایجانین سیاسی قورولوشلاری نین بیرینین باشقانی نین آزربایجان جومهوریتی نین جمهور باشقانینا نزاکتسیز یاناشماسی و تربیه قایدالارینا سیغمایان سؤزلری سوسیال مئدیادا یاییلمیش و میلتیمیزین بؤیوک اکثریتینین راحاتسیزلیغینا ندن اولموشدور. اوسته‌لیک بو موصاحیبه‌نین بعضی پارچالاری نین فارس و ائرمنی سوسیال شبکه‌لرینده یاییلاراق میلتیمیزین علئیه ینه تخریبات ماتئریالی اولاراق ایستیفاده اولوندوغو موشاهیده اولونور. بو ندنله آزربایجان میلی دیر‌نیش تشکیلاتی اولاراق بو حاقدا اؤز موناسیبتیمیزی بیلدیرمگی واجیب ساییریق.

وطنیمیزین قوزئیینده قورولموش اولان آزربایجان جومهوریتی دؤولتی بوتون دونیا آزربایجانلیلاری نین و او جومله‌دن گونئی آزربایجان تورکلری نین دوغما دؤولتیدیر. بو دؤولتین بوتون عونصورلرینی، او جومله‌دن بایراغی، میلی مارشی، پرئزیدئنتلیک مقامی، میلی مجلیسی و اوردوسونو قوروماق و گوجلنمه‌سی اوچون چالیشماق هر بیر آزربایجانلی نین میلی گؤرویدیر.

طبیعی اولاراق دئموکراتییا اوصوللارینا اویغون شکیلده هر بیر مقاما تنقید قاپیسی آچیقدیر. آنجاق هر هانسی بیر تنقید بیرینجی اولاراق حؤرمت و نزاکت قایدالاری چرچوه‌سینده اولمالی و ایکینجی اولاراق گئرچک فاکتلارا دایانمالی و خوش نیتلی اولمالیدیر، عکسی حالدا تنقید یوخ بلکه تخریبات ساییلار و یول وئریلمزدیر.

گونئی آزربایجان و بؤلگه‌نین سون درجه حساس دورومونو نظره آلاراق بوتون آزربایجان ایجتیماعیاتی نین هر زامان اولدوغوندان داها چوخ بیرلیک و برابرلیگه احتیاجی اولدوغو قناعتینده ییک. گونوموزون حساس شرطلرینده بیرلیک و برابرلیگیمیزه زیان وئرن خوصوصی ایله آزربایجانین گونئی ایله قوزئیی آراسیندا ایختیلاف یارادا بیله‌جک مسله‌لری مئدیا اوزرینده موباحیثه یه چیخارماق، میلی طالئعیمیزه ضربه وورماسی و دوشمنلریمیزی سئویندیرمه‌سیندن باشقا بیر نتیجه‌سی اولمایاجاق. حال-حاضیردا بؤلگه‌نین حساس و هر آن یئنی حادیثه لر باش توتا بیله‌جک وضعیتینده، میلی بیرلیک روحونو زده له‌یه بیله‌جک مسئله‌لری مئدیادان یوخ بلکه خوصوصی یوللار واسیطه‌سی ایله موباحیثه ائتمگین داها دوغرو اولدوغونون قناعتینده ییک.

آزربایجان میلی دیرنیش تشکیلاتی

۷ مرداد ۱۳۹۸

.Azərbaycan Cümhuriyyətinin prezidentlik məqamına nəzakətsiz yanaşma yanlış və yol verilməzdir

Son zamanlarda Güney Azərbaycanın siyasi quruluşlarının birinin başqanının  Azərbaycan Cümhuriyyətinin prezidentinə nəzakətsiz yanaşması və tərbiyə qaydalarına sığmayan sözləri sosial mediada yayılmış və millətimizin böyük əksəriyyətinin rahtsızlığına nədən olmuşdur. Üstəlik bu müsahibənin bəzi parçalarının Fars və Erməni sosial şəbəkələrində yayılaraq millətimizin əleyhinə təxribat materialı olaraq istifadə olunduğu müşahidə olunur. Bu nədənlə .Aərbaycan Milli Dirəniş Təşkilatı olaraq bu haqda öz münasibətimizi bildirməyi vacib sayırıq

Vətənimizin quzeyində qurulmuş olan Azərbaycan Cümhuriyyəti dövləti bütün dünya Azərbaycalılarının və o cümlədən Güney Azərbaycan Türklərinin doğma dövlətidir. Bu dövlətin bütün ünsürlərini, o cümlədən bayrağı, milli himni, prezdentlik məqamı, milli məclisi və ordusunu qorumaq və güclənməsi üçün .çalışmaq hər bir Azərbaycanlının milli görəvidir

Təbii olaraq demokratiya üsullarına uyğun şəkildə hər bir məqama tənqid qapısı açıqdır. Ancaq hər hansı bir tənqid birinci olaraq hörmət və nəzakət qaydaları çərçəvəsində olmalı və ikinci olaraq gerçək faktlara dayanmalı və xoş niyyətli olmalıdır, əksi halda tənqid yox bəlkə təxribat sayılar və yol verilməzdir.

Güney Azərbaycan və bölgənin son dərəcə həssas durumunu nəzərə alaraq bütün Azərbaycan ictimaiyyatının hər zaman olduğundan daha çox birlik və bərabərliyə ehtiyacı olduğu qənaətindəyik. Günümüzün həssas şərtlərində birlik və bərabərliyimizə ziyan verən xüsusi ilə Azərbaycanın güneyi ilə quzeyi arasında ixtilaf yarada biləcək məsələləri media üzərində mübahisəyə çıxarmaq, milli taleyimizə zərbə vurması və düşmənlərimizi sevindirməsindən başqa bir nəticəsi olmayacaq. Hal-hazırda bölgənin həssas və hər an yeni hadisələr baş tuta biləcək vəziyyətində, milli birlik ruhunu zədələyə biləcək məsələləri mediadan yox bəlkə xüsusi yollar vasitəsi ilə mübahisə etməyin daha doğru olduğunun qənaətindəyik.

Azərbaycan Milli Dirəniş Təşkilatı – ۲۹٫۰۷٫۲۰۱۹