آجلیق آکسیاسی ان ائتکیله ییجی و عینی زاماندا تهلیکه لی اعتراض شکلیدیر- داود توران
نئجه کی باغیرماق و سسی‌سینی یوکسلتمک بیر اعتیراض شکلی ایسه، ائلجه سس‌سیز اولماق و آغزینی حیاتا باغلاماق دا اعتیراض شکیللرین‌دن بیری‌سی‌دیر. اینسان اوغلو اگر ایسته‌سه بیر اولای، داورانیش، باسقی و حاق‌سیزلیق قارشی‌سین‌دا موجاده‌له ائتسین اونو فرق‌لی شکیلللرده یارادیجی‌لیغی ایله اورتایا قویابیلر. بعضن خیابانلاردا چیخیب شعار وئرمک، اولدوغون دوروما اعتیراض شکلی‌دیرسه، زیندانلارین دؤرد دووالاری آراسین‌دا دوداقلاری بیر بیرینه یاپیش‌دیرماق دا ایمکانلاردان ایستیفاده ائد‌رک اعتیراض ائتمه شکلیدیر. اعتیراض، اینسان اوغلونون بیر داورانیش بیچی‌می اولاراق ایستکلرینه چاتماق‌دا بیر آراج‌دیر. اعتیصاب ایسه اعتیراض شکیللرین‌دن بیری‌سی‌دیر. اعتیصاب نورمال و طبیعی اولانین دیشینا چیخماق‌دیر. ایشله‌مک نورمال و طبیعی گونلوک ایش اولسا دا ایشله‌مه‌مک و ایشی دوردورماق (ایش اعتیصابی) دا بیر اعتیراض داورانیشی اولاراق بعضن اینسان و قروبلار طرفین‌دن اویغولانان مئتوددور. یئریمک و آدیم آتماق گونلوک و طبیعی اینسانی داورانیش اولسا دا بعضن ساعتلرجه بیر یئرده دورماق، یئنه اعتیراض ین بیر بیچی‌می‌دیر. یئمک یئمک حیات‌دا قالماق اوچون گونلوک بیر احتیاج ایسه، یئمک یمئه‌مک ده بیر اعتیراض شکلیدیر. اعتیصاب اصلین‌ده بیر نوع دیره‌نمک‌دیر. سیزه اویغولانان باسقی و ظولمون قارشی‌سین‌دا دیرنیش داورانیشی‌دیر.
گونئی آذربایجان میللی حرکتی ده بللی تاریخی سورجلرده، باسقی و حاق‌سیزلیقلارا قارشی بو اعتیراض شکیللرین‌دن بیری‌سینی حیاتا کئچیرمیش و کئچیرمک‌ده‌دیر. بعضی دؤنملرده خیابانی حرکتلر ایله اعتراضینی دیله گتیرمیش، بعضن ده قورولتای و فوتبال استادیوملاریندا. میللی حرکت اؤز ایچینده گلیشدیکجه و احتیاج حیس ائدیلدیکجه، اعتراض مئتودلارینی دا گلیشدیرمکده دیر. اؤرنک اولاراق آزربایجان میللی حرکتی هله ایش بوراخما، (ایش اعتصابی) اراجیندا ایستفاده ائتمه ییبدیر. آما بو گونلر ده گونئی آزربایجان ین بعضی توتوقلو میللی فعاللاری اعتراض و اعتصاب چئشیدلریندن بیریسی اولان یئمک یئمه مه ک (hunger strike)، اعتصابینا باشلامیشلادیر. بو اعتصاب شکلی ان ائتکیله ییجی و عینی زاماندا تهلیکه لی اعتراض شکلیدیر. چونکو اینسانلارین ساغلیغی ایله علاقه لیدیر. ییرمی گوندن آرتیقدیر کی یئنی گاموح تشکیلاتی نین مرکزی کادرینین باشلاتدیغی یئمک اعتصابی داها سونرا میللی حرکتین تانینمیش توتوقلو فعالی عزیز پورولی نین قاتیلیمی ایله دوام ائتمکده دیر. یئنی گاموح-ون بئش مرکزی عضوو اونلارا وئریلن 9 ایللیک حاقسیز یئره زیندانا اعتراض اولاراق بو اعتصابا باشلامیشلاردیر. عزیز پورولی ایسه اونلارا دستک آماجی ایله بو اعتصابا قاتیلمیشدیر.
بو اعتصابلار گونئی آزربایجان ین حاقلی سسینی آزادلیق سئور دونیا اینسانلارینا چاتدیرمیشدیر…
