یازی:
آنادیلی و گله جگیمیز
-- نویسنده: محسن سعادت
بلکه سیز ده بیریلری ایله آنادیلی نین اؤنمنیندن دانیشارکن اونلارین فرقلی تپکیلری ایله قارشیلاشیبسینیز. ایندیلیک آنا دیلی نین اؤنمسیز اولدوغو و اینسانلارین آج اولدوغو و قارینلارینی دویورماق ایسته دیکلری جوابلارینی آلیبسینیز.
دیل و آنادیلی گرچکدن ده گونوموزده اؤنمسیزدیر می؟ دیل ایله گونلوک یاشامیمیزین و حتا اقتصادی دوروموموزون نئجه بیر ایلیشکیسی واردیر؟ آنا دیلده تحصیل بیزی نئجه هم سویال اولاراق هم ده اقتصادی اولاراق آزادلیق و رفاها چاتدیرا بیلر؟
دیلی (آنادیلی) ساده جه بیر ایلتیشیم (ارتباط) آراجی (وسیله) اولاراق دوشونورسک البته بوگونوکو شرایطده آنا دیلده تحصیل مبحثلری یئرسیز اولاراق گؤرونر. آما دیل بیزیم دونیایا باخیش آچیمیزین گلیشمه سینده و اؤزوموزه حیات سئچمه میزده بیرینجی رولو اوینایان کولتورل وارلیقلاریمیزدان بیریسیدیر.
اصلینده بوگونکو شرایطده اولماغیمیزین بیرینجی ندنلریندن بیریسی ده آنا دیلیمیزدن یوخسون اولمامیزدیر. آنا دیلیمیزده تحصیلیمیز اولسایدی بیزیم بیر وطنمیمیز و وطنمیمیزه بیر ده سوروملو(مسؤول) بیر دؤولتمیزی وار ایدی. آنا دیلی آزادلیغیمیزا گئدن بیزیم ایلک آددیمیمیزدیر. اونون اوچوندور کی بیزیم ایلک آددیمیزی آتمامیمیزی ایسته میرلر و ایللردیر آنادیلیمیز هله ده اوخودولمور.
آنا دیلیمیز بیزیم گله جگیمیزی قورابیله جه گیمیز بیر چاتیدیر. میللی حرکتین اورتایا چیخیش ندنلریندن ان اؤنملیسیدیر. اونا گؤره دیر هله ده سهند استادیوموندا تورک دیلینده مدرسه شعارلاری سسله نیر. بو شعار ساده جه دیل تحصیلی اوچون دئییل عئینی زاماندا آزاد آزربایجانا گئدن یولجولوغون سسیدیر.
