«تبریز آراشدیرمالار اینستیتوتو» طرفیندن فئدرالیزم حاققیندا اونریلن آنایاسایا داییر منیم تنقیدلریمله باغلی بیر سیرا آنلاشیلمازلیقلارین یاراندیغی گورونور. آشاغیداکی قیدلری آرتیرماقلا سوزوگئدن آنلاشیلمازلیقلارین آرادان قالدیریلماسینی اومود ائدیرم:

۱ – منیم طرفیمدن فئدرالیزم حاققیندا اونریلن آنایاسایا داییر ایرلی سورولن دوشونجه لریم؛ منیم، فئدرالیزمین طرفداری اولدوغوما دلالت ائتمه مه لیدی. من ساده جه اونریلن آنایاسا حاققیندا، بیر فئدرال سیستمی نین نئجه اولدوغو ایله باغلی دوشونجه لریمی وورغولامیشام. بیزیم ایسته ییمیزه گلدیکده ایسه، بیز- یئنی گاموح- میللتیمیزه دونیانین آزاد میللت لری کیمی، اوز مقدراتینی تعیین ائتمک حقوقونا مالیک اولماسی حاققینی ایسته ییریک. فئدرال سیستم، باغیمسیزلیق و یا هر هانسی بیر باشقا دولت له بیرلشمک، اؤز مقدراتینی تعیین ائتمک حاققینین واریانتلاری اولاراق، میللتیمیزین سئچیمی ایله آلینان بیر قرار اولمالیدیر. یئنی گاموح پارتیاسی، ان اویغون زاماندا کونژونکتورا باخاراق اؤز توتومونو بو باره ده پایلاشاجاقدیر.

۲- ایکینجی مسئله؛ بوتون میللتلرین دیللرینین اؤلکه ده رسمی اولماسی ایله برابر؛ سوزو گئدن فئدرال دولت لر آراسیندا فارس دیلینین، موقتی اولاراق، مشترک بیر دیل اولماسی دیر. اصلینده، بونو من یوخ، بیر عصره یاخین فارس دیلینی و کولتورونو زور گوجو ایله بوتون اؤلکه میللت لرینه تحمیل ائدیلن گئرچک لیک دئییر. دوزونو دئسم من شخصا اینانمیرام بیر گون هر هانسی بیرعرب، کورد، گیلک، بلوچ و… اؤلکه میللت لریندن بیریسی بیر آذربایجان تورکو ایله قارشیلاشدیغی حالدا، بیر- بیرلرینی آنلاماق اوچون، چوخ چتینلیک له اویرندیکلری فارس دیلینی قویوب، گئدیب تورک دیلینی اویرنسین لر! بو گئرچکلییه ایسه، ایران اوچون هر هانسی بیر فئدرال سیستمی، موقتی اولسا دا، قاتلاشماغا محکوم دور.

لطیف حسنی
رجائی شهر تورمه سی
دی آیی ۱۳۹۷

انتشار پیش‌نویس قانون اساسی جمهوری فدرال ایران پیشنهاد انستیتو تبریز-فایل PDF