ایگیرمی دوققوز ایل بوندان اؤنجه بئله‌نچی گونلرده، روس سووئت ایمپئرییاسینین داغیلدیغی زامان، آزربایجان تورک میلتی آراز چایینی ایکی طرفیندن ساختا سرحدلره هوجوم ائد‌رک ساختا و زوراکی سرحدلری سؤکوب آتدیلار و بئله‌جه دوغما باجی قارداشلار اوزون ایللر سونرا بیر داها قوجاقلاشیب حسرت گئدره بیلدیلر.

بو تاریخی اولای بیر داها ثبوت ائتدی کی آزربایجان تورک میللتی دوشمنلرین ظالمجه و عدالت‌سیزجه چکدیگی سرحدلره رغماً اصلا بؤلونمه‌ییب، بیرلیک و بوتؤولوک روحونو قورویوبدور و قورویاجاقدیر.

سونراکی ایللرده بو موناسیبتله ۳۱ دئکابر آزربایجان جومهوریتی نین پارلامئنتی و جومهور باشقانی مرحوم ابولفضل ائلچی بی طرفیندن «دونیا آزربایجانلیلارینین همرأی‌لیک گونو» آدی ایله میلی بایرام اعلان ائدیلدی. او گوندن بو یانا ۵۰ میلیونلوق آزربایجان تورک میلتی دونیانین هر یئرین‌ده ۳۱ دئکابری میلتیمیزین بیرلیک، برابرلیک و بوتؤولوک بایرامی اولاراق بؤیوک بیر جوشغو ایله قوتلاماقدادیر.

آزربایجان میلی دیرنیش تشکیلاتی اولاراق بیز ده بو میلی بایرام موناسیبتی ایله بؤیوک میللتیمیزی تبریک ائدیب، او گونون گلمه‌سینی اوموروق کی ۵۰ میلیونلوق میلت اولاراق بو بایرامی آزاد و ایفتیخارلی شکیلده هامیمیز بیرگه قوتلایاق.

آزربایجان میللی دیرنیش تشکیلاتی مرکزی شوراسی
تبریز
۳۱ دئکابر ۲۰۱۸