حیکایه چوخ آجیدیر. کاسیبلارین خبری چوخ یاییلمیر نه یازیق کی بیزیم تورپاقلاردا. بیر قادین، بیر اینسان، بیر آنا کاسیبلیقدان اؤزونو داردان آسیر و بیزیم خبریمیز ده اولمور. بو خبری ائشیتدیگیمیز زامان داها چوخ بیلگی آلماق اوچون اینترنت سایتلاریندا آراشدیردیم. آما بونون حاققیندا هئچ بیر شئی تاپانمادیم.

تبریزین سهند منطقه سینده بیر آنانین کیچیک اوغلو ات ایستیر. آناسی و اوغلان اتچی یه گئدیرلر و آنا ۱۰ مین تومنلیک ات الماق ایستیر. اتچی او پولو آلیر و توللاییر و دئییر بونا ات وئرمزلر. آنا اوزگون و اوتانقاچ شکیلده ائوه دؤنور. بو منظره یه شاهید اولان بیریسی بیرآز ات آلیر وئریر اوغلانا. اوغلان سئوینج ایله ائوه گلیرکن گؤرور آناسی اؤزونو آسیبدیر.

بونا بنزر اولایلار بلکه اونلارجا اولور بیزیم تورپاقلاریمیزدا بیزدن خبرسیز. توپلوموموز ایچریدن یوخ اولور و بیز بو یوخ اولوشو گؤرموروک.

آزربایجان میللی حرکتی توپلوموموزون بو آجی طرفی ایله گرکدیگی قدر ماراخلانمیر. توپلوموموز بیزیم و میللی حرکتین پایگاهی دیر. اونونلا بو قدر یابانجی قالماق بیزیم اوچون یاخشی سونوجلاری اولماز.

توپلوموموزا یئنی بیر روح وئرمه لییک. اینسانلاریمیزین بو سورونلاری بیرلیکده آشاجاغیمیز اینانجی یاراتمالییق. آزربایجان میللی حرککتی نین اونلارین یانیندا اولدوغو حیسسی نی وئرمه لییک.

قورتولوش ساده جه دیل و یا سیاسی سؤیلملر ایله اولماز. بیزیم توپلوموموزون هم دیل هم سیاسی هم ده گئچیم سورونو واردیر. بو سورونو دا باشقا سورونلار کیمی گؤروب بئله اولایلارین یاشانماماسی اوچون ایقتیصادی ائیلم پلانلاری حاضیرلامالییق.