من‌له حرکت، یوخسا میللی حرکت ؟!
گونئی آزربایجان میللی حرکتینده، بویوک زوراکلیقلاری آردیندا گئری بوراخان و باغلی بیر اتمسفرده نفس آلان میللی منفعیتلریمیزی دوشونن و عینی حالدا ایراندا باش قالدیران دیکتاتورلوق‌لا گؤز-گؤزه باخان بیر میللی دوشونر اینسانیمیز، ایستر- ایسته‌مز بیرآز گلیشمه‌دن، مجادله‌دن سونرا قوردوغو بیر تشکیلات‌دا، یئر توتدوغو گروپلاردا بیر چوخو نئچه ایل مباریزه‌دن سونرا میللی حرکت یئرینه من‌له حرکتی ترجیح ائتمیشدیلر.
سانیرام بیر گون گونئی آزربایجانیمیز توپلوموندا پیسخولوژیک سورونلار یاشادان بو دیکتاتورلوق آرادان قالدیریلسا نورمال و عینی حالدا دئموکرات بیر اتمسفری ساغلاماق بیزیم اؤچون بویوک بیر سورون اولاجاقدیر.
دوشونورم کی ایراندا باش وئرن اقتصادی و سیاسی چوکمه‌لری گؤز اونونه توتورساق، هر بیر گونئی آزربایجان میللی دوشونر اینسانیمیز، توپلوموموزون یاخین گله‌جکده و اوزاق گله‌جکده اؤز وئره بیلیر سورونلاری الده ائتمه‌لی و بو سورونلارا چوزوم یولونو بلیرله‌مه‌لیدیر.
آنجاق سؤز گونئی آزربایجان تشکیلاتلارینا گلینجه و میللی حرکت آدلاندیردیغیمیز بیر گورکه‌می گؤرونجه، “من‌له حرکت”، “میللی حرکت”دن نئچه قات یوخاریدا گؤروندوغو آجی بیر گئرچک کیمی گؤرونمکده‌دیر.
میللی منفعتلریمیزی قوروماق، میللی کیملییمیزی الده ائتمک، بیر اؤزگور میللت کیمی دونیادا تانینماق و عینی حالدا میللی اؤز گوونیمیزی قازانماق هر بیر گونئی آزربایجان تورکونون آرزیسی ساییلماقدادیر. آنجاق بو گونکو چاتمامازلیقلار، تارتیشمالار و حرکتین انرژی‌سینی توکه‌تن بوش بوغازلیقلار، میللی حرکتده یئر توتان دیرلی اینسانلاریمیزین منم-منملیگیندن، “میللی حرکت” یئرینه “من‌له حرکت” ائتسینلر پیسخولوژیک سورونلاریندا اولموشدور.
دوشوندوغومه گؤره، یول بیر اولونجا، الده ائتدیغیمیز سونوج لار آینی اولاجاغینی دوشوندوغوموزده، بیرلیکده بو یولدا و برابر آتیملاماق او قدر زور بیر ایش گؤرونمه‌ییر.
البت کی بو بیرلیگی بیر ال چاتماز آرزی کیمی گؤرنلر، همن “من‌له حرکت” ذهنیتیده یاشایان میللی دوشونر یولداشلاریمیزدان عبارتدیلر.
سانیرام آرتیق زامانی گلیب چاتمیشدیر کی گونئی آزربایجان میللی حرکتی، آزربایجانیمیزین میللی و مدنی حاققلارینی و اونون ایچینده باغیمسیزلیغینی الده ائتمک اوچون، ایچینده بیر بویوک ترپنمه‌یه حاضیرلیقدا گؤرونه و عینی حالدا یاخین گله‌جک و اوزون گله‌جه‌یی اوچون پلانلارینی سرگی‌لییه. و بو بویوک آتدیملار اوچون ان دوغرو یول هر بیر میللی دوشونر اینسانلاریمیزا گرکه‌ن “من‌له حرکتین” یئرینه، “میللی حرکت”ی دریندن و دوغرو اینانماقدان اولاجاقدیر.
مسعود هارای
برگرفته از صفحه فیس بوک ایشان
