سئویل سولیمانی: معیشت زوراکی‌لیق‌لاری‌نین جمعیت‌لرده درین کؤک‌لری وار/ آمئریکانین سسی
علیرضا قولونجو
بمت باش آسسامبلئیاسی 25 نویابری قادین‌لارا قارشی زوراکی‌لیقلا بئینلخالق موباریزه گونو کیمی معین ائدیب. بو موناسیبتله آمئریکانین سسینه موصاحیبه وئرن گونئی‌لی یازار و مدنی فعال سئویل سولئیمانی معیشتده فیزیکی زوراکی‌لیق‌لارین تؤردیلمه‌سینه سبب اولان عامل‌لری تحلیل ائدیب.
سئویل سولئیمانی‌نین سؤزلرینه گؤره، جمعیتده اومومیتله زوراکی‌لیق‌دان بحث ائدنده چوخ زامان ساده‌جه اونون فیزیکی آسپئکتی نظرده توتولور، قادین‌لارا قارشی زوراکی‌لیق‌لار فیزیکی هوجوملا محدودلاشمیر.
“بیزیم جمعیت عادتن ساده‌جه فیزیکی تضییقی ایشگنجه و زوراکی‌لیق اولا‌راق گؤرور. آنجاق قادین‌لارا قارشی تطبیق ائدیلن تضییق‌لرین بیر چوخ نؤوو واردیر. قادین بو جمعیتده پسیخولوژی، اقتصادی و اجتماعی زوراکیلیغا معروض قالیر. سؤیوش، تحقیر، عائله ایله گؤروشمه‌یه قاداغا قویماق، اجتماعی و سیاسی فعالیت‌لره مانع اولماق کیمی محدودیت‌لرین هامی‌سی زوراکی‌لیق سایی‌لار،” دئیه آمئریکادا موهاجیرت حیاتی یاشایان گونئی‌لی فال فیکرینی ایفاده ائدیر.
خانیم سولئیمانی‌نین سؤزلرینه گؤره، جمعیت‌لرده زوراکیلیغین تاریخی کؤک‌لری واردیر، گوج و حاکمیتین مؤوجود اولدوغو هر یئرده زوراکی‌لیق و تضییق مؤوجوددور. اونون فیکرینجه، حاکمیت‌لر تاریخ بویونجا دومینانت دین و دیل واسطه‌سیله زوراکی‌لیغی توپلومدا تشویق ائدیب‌لر. او، همچی‌نین قادین‌لارا قارشی تطبیق ائدیلن زوراکی‌لیقلا علاقه‌لی کیشی‌لرین رولونو موذاکیره ائدیب.
