تورکجه خبر:
ایران رژیمینین عراق‌دا بؤیوک اوغورسوزلوغو؛ بصره‌ده ایرانین کنسوللوغو اعتراضچیلار طرفیندن اودلاندی
غضبلی اعتراضچیلار جمعه‌نی شنبه‌یه باغلایان گئجه عراقین نفتلی بؤلگه‌سی بصره‌ده ایران کنسوللوغونا هجوم ائدیب بو بینانی اودا چئکدیلر.
غضبلی اعتراضچیلار جمعه‌نی شنبه‌یه باغلایان گئجه عراقین نفتلی بؤلگه‌سی بصره‌ده ایران کنسوللوغونا هجوم ائدیب بو بینانی اودا چئکدیلر.
بینانین ائشیگینده اولان باشقا اعتراضچیلار ایسه ایران رژیمینین علیهینه شعارلار سسلندیررک ایرانین اؤلکه‌لریندن چیخمالارینی ایسته‌دیلر. یاییلان راپورلار اساسیندا اعتراضچیلار ایران بایراغینی و لیدری خامنه‌ای‌نین شکیللرینی آیاقلارینین آلتینا آلیب اودا چئکدیلر.
چوخو شیعه اولان بصره شهرینین وطنداشلاری ایرانلا سیخ شکیلده ایرتیباطلاری اولان بیر سیرا سیاسی پارتیلری ایرانین اؤلکه‌لرینین ایچ ایشلرینه مداخله ائتمه‌سینده تقصیرکار بیلیرلر.
یاییلان خبرلره گؤره؛ عراقین گونئیینده اولان گرگینلیکلر نئچه گون دوام ائدرک اعتراضچیلار حشدالشعبی کیمی ایرانا باغلی یاری عسگری (شبه نظامی) قروپلارین اوفیسلرینی اودا چکیبلر.
عراقین امنیت قوه لری بو استاندا کئچن هفته‌دن گئنیش فسادلار ندنی ایله باشلانان اعتراضلارا گؤره گل-گئت قاداغالاری اویقولاییبلار.
بعضی یئرلی مسؤللارین آچیقلامالارینا دایانارق عراق حزب الله نیرولارینین قرارگاهی، حزب الفصیله گوجلرینین قرارگاهی، عصائب اهل حق اؤرگوتو و بدر اؤرگوتونون قرارگاهلاری دا بو اولایلاردا اودا چئکیلیب.
اسکای نیوز خبر آزانسینین بیلگیلرینه گوره؛ آدین چئکدیغیمیز حزبلرین اوفیسلریندن علاوه عراقین اسلامی عالی مجلسی ده اودا چئکیلیب. بصره شهرینده باشلانان اعتراضلار کئچن اوچ گون عرضینده داها آرتیق گرگینلشیب و دولت آداملارینین آچیقلامالارینا دایاناراق سه شنبه گونون دن بوگونه قدر ۱۰ عراقلی وطنداش بصره گرگینلیک لرینده اؤلوبدور.
