تورکجه خبر:
آزربایجانین کیتاب یاییم و ساتیش ائولری باهالیقلاردان دولایی آردی آردا باغلانیرلار
اقتصادی دورومون گونو گوندن فلاکته دوغرو گئتمه‌سی ایراندا کتاب قیمتی‌نین باهالاشماغینا ندن اولوبدور.
اقتصادی دورومون گونو گوندن فلاکته دوغرو گئتمه‌سی ایراندا کتاب قیمتی‌نین باهالاشماغینا ندن اولوبدور.
ایراندا اقتصادی دورومون بیسلشمه‌سی نتیجه‌سینده کتاب قیمتی باهالاشیب کیتاب آلانلارین ساییسی آزالاراق کتاب یاییم ائولری (انتشارات) فعالیتلرینی دایاندیرماغا مجبور قالیبلار.
ارک، سعادت و شمس کتاب یاییم ائولری و ساتیش مرکزلری آرد-آردا اکونومیک کریزلر سونوجوندا قاپادیلماغا مجبور قالیبلار. بو قوجامان یاییم ائولری نین آرد آردا باغلانماسی گونئی آزربایجانین کولتورونو اولومسوز اولاراق ائتکیلیه‌جکدیر.
کاغاذ، یاپیشقان و ایشچی آیلیغی‌نین باهالاشماسیندان دولایی یئنی باسیلان کیتابلارین قیمتی باهالاشیبدیر. بونونلار بیرگه اقتصادی دورومون چؤکوشوندن دولایی ایراندا یاشایان ملتلر اؤز گونلوک احتیاجلارینی گئدرمکده چتینلیکلرله قارشیلاشیرلار بو اوزدن کتاب آلانلارین سایی یوکسک اوراندا آزالیبدیر.
گونئی آزربایجان‌دا فعالیت آپاران بیر کیتاب یاییم ائوی‌نین یؤنتیجیسی بو حاقدا گوندم خبر بؤلومو ایله دانیشیغیندا دئییب کی: «ایندی آرتیق مدرسه و بیلیم یوردلارین اؤیرنچی‌لریندن باشقا کیتاب آلان یوخدور. اونلارا عایید اولان کیتابلارین دا باسماق حاققی بعضی اؤزل یاییم ائولری انحصاریندادیر بو اوزدن بیزلر ایشلریمیزی یوروتمکده چتینلیکلرله باش باشاییق.»
بو یاییم ائوی یونتیجیسینین آنلاتدیقلاری اساسدا بیر چوخ اؤیرنچی ده درس کیتابلارینی ایکینجی ال کیتاب ساتانلاردان آلماغا چالیشیرلار.
آزربایجانلی ملی – مدنی فعال و یازار محمد رحمانی فر بو یاییم ائولرین باغلانماسینی دگرلندیریب دئدی: «اقتصادی باخیمیندان گونو گوندن یوخسوللاشان ملت، فرهنگی باخیمیندان دا گونو-گوندن یوخسوللاشماق زوروندا قالمالیدیر»
