نئچه واخدیر سوسیال مئدیالاردا تورکجه جومالار کمپینی باشلاییبدیر. تورکجه سوسیال مئدیا ایشلدنلر جوما گونلری آنا دیللرینده یازاراق بیر آچیلیم باشلادیبلار. جوما گونلرینین سیخیجیلیغی و داریخماسی یئرینی اومودا و هیجانا وئریبدیر. آما سانکی اورتادوغو توپلوملارین قده‌ری‌دیر جومالارینین قارا اولماسی.

بو جوما بیزیم اونلارجا میللی فعاللیمیز ساده و ساده‌جه تاریخی و میللی قهرمانلاریندان اولان بابک قالاسینا گئتمک ایسترکن ایران رئژیمی طرفیندن آزربایجانین بیر چوخ شهرینده توتوقلاندیلار. ظننیمجه توتوقلو اولمایان آزربایجان شهری چوخ آزدیر. باشقا بیر دئییشله ایران آزربایجانی دوستاغا قویدو.

ایران چوخ چتین گونلر کئچیرمکده دیر. آزربایجان توکلرینین آیاغا قالخماسی بو رئژیمه اینانیلماز ضربه‌لر وورابیلر. اونون اوچون آزربایجان تورپاقلارینداکی هر بیر ییغینجاق بوگونلرده ایران گؤزونده امنیتی مسئله داشیر. قورخوتماق سیاستی ایله امنیتی مسئله‌نی اورتادان قالدیرماق ایسته‌مکده دیر. آما آزربایجاندا قورخوتماق سیاستی هئج بیر زامان جواب وئرمه ییبدیر.

بیر قیویلجیم ایله بوندان سونرا آزربایجانین هر بیر قاریشی بابک قالاسی اولاجاقدیر. آزربایجان تورکلری کئچیم سیخینتی‌سینین یانی سیرا میللی و سیاسی تبعیضلره ده معروض قالیرلار. آزربایجان تورکلرینی گلجکلرینه اومودلو آددیملار آتماق ایستیرلر.

بؤلگه میز چوخ جیددی گونلردن کئچیر و گؤروندوگو کیمی داها دا جیددی و چتین گونلر بیزی گؤزلور. بونون اوچون هم اؤز ایچیمیزده هم ده دونیایا وئره‌جه‌گیمیز پیاملاردا داها دا دیققتلی اولمالییق. بو دؤنم اودوزما شانسیمیز یوخدور. دویغوساللیقدان اوزاق آغیر و دوشونولموش آددیملار آتماللیق.

محسن سعادت- ستون‌نویس آرازنیوز