دونیالیق آنادیلی گونو موناسبتیله:
یونئسکو باش یازمانی، آدرئی آزولای خانیمین اولوس‌لار آراسی آنادیلی گونو ایله باغلی مئساژی
یونئسکو، اینسانلیغین ماددی اولمایان میراثی‌نین بو باشلیجا بیله‌شنی‌نی(جزء) قوْروماق و جانلاندیرماق اوچون، دیل آیریملی‌لیغینی ساوونماق و چوخ دیللی اؤیرَنیمین تانیدیلماسی‌یلا ائتکین اولاراق اوزون ایل‌لر اوغراشمیش‌دیر.
۲۰۱۸ فئورال ۲۱
تورکجه‌یه چئویرن: یاسر رنجبری
بوگون، یونئسکو اون‌دوققوزونجو اولوسلارآراسی آنادیلی گونونو قوتلاییر. بو، اؤرگوتوموزون دیل‌لری ساوونماق و تانیتماق قونوسونداکی اوستلنمه‌سینی آنیمساتماق اوچون بیر فرصت‌دیر. بیر دیل، صیرف بیر ایله‌تیشیم(خبرلشمه) آراجی اولمانین چوخ داها اؤته‌سینده‌دیر. اینسانلیغیمیزین بیله قوْشولو(شرطی) بودور. دیَرلریمیز، اینانج‌لاریمیز و کیملی‌ییمیز اونون ایچینه گؤمولموشدورلر. دئنه‌ییم‌لریمیزی، گله‌نک‌لریمیزی و بیلگیمیزی ایلَتدی‌ییمیز آراج، دیل‌دیر. دیل‌لرین آیریملیلیغی(تنوع)، خیال گوجوموزون و یاشام بیچیم‌لری‌نین دارتیشیلماز زنگینلییی‌نی یانسیدیر.
یونئسکو، اینسانلیغین ماددی اولمایان میراثی‌نین بو باشلیجا بیله‌شنی‌نی(جزء) قوْروماق و جانلاندیرماق اوچون، دیل آیریملی‌لیغینی ساوونماق و چوخ دیللی اؤیرَنیمین تانیدیلماسی‌یلا ائتکین اولاراق اوزون ایل‌لر اوغراشمیش‌دیر.
بو اوستلَنمه(تعهد)، اؤزللیکله میلیونلارجا گلیشمکده اولان گنج ذهنی بیچیملندیرن و اینسان توپلولوغونا ایلک اؤنجه یئرل دوزئیده، سونرا دا کوره‌سل دوزئیده قاتیلماسی اوچون، قاچینیلماز داشی‌ییجی اولان آنادیل‌لری ایله ایلگیلی‌دیر.
یونئسکو، اؤزللیکله چوخ دیللی اؤلکه‌لرده‌کی آنا دیل‌لری و یئرلی دیل‌لری تانیدان و اؤزندیرن(تشویق) دیل پولیتیکالارینا، آرخا چیخماقدادیر. بو دیل‌لرین، اوْخول اَییتیمی‌نین ایلک ایل‌لریندن باشلایاراق قوللانیلماسینی اؤنه‌ره‌ریک. چونکو، اوشاقلار اؤز آنا دیل‌لرینده، ان یاخشیسینی اؤیره‌نَرلر. یونئسکو آیریجا، گئنل آلان‌لاردا و اؤزللیکله چوخدیللیلییین قورالساللاشماسی گره‌کن اینترنت‌ده، آنادیلی‌نین قوللانیمینی اؤزندیره‌ر.
هرکس، ایلک دیلینه باخماقسیزین، مجازی اوْرتامدا، قایناق‌لارا اریشه‌بیلمه‌لی و چئوریم‌ایچی دییشدیرمه و دانیشیق توپلولوق‌لاری قورابیلمه‌لی‌دیر. بوگون، بیرلشمیش میللت‌لر ۲۰۳۰ گونده‌می‌نین اوره‌یینده‌کی بو قونو، سوردوروله‌بیلر قالخینمانین ان بؤیوک چتینلیک‌لریندن بیری‌دیر.
ایکی هفته‌ده بیر، دونیانین دیل‌لریندن بیری اونودولوب، اینسانلیق تاریخیمیزین و کولتورل میراثیمیزین بیر پارچاسی اونونلا گئدیر. اوسته‌لیک، چوخدیللیلییین اؤزندیریلمه‌سی، بو دوزنلی سؤنمه و یوخ اولوشون دوردورولماسینا یاردیمچی اولور.
«نئلسون ماندئلا»نین بنزرسیز سؤزلرینجه، «بیرییله آنلادیغی دیلده دانیشارسانیز ذهنینه، آنجاق اونون اؤز دیلینده(آنادیلینده) دانیشارسانیز، اوره‌یینه سسلنمیش اولارسینیز.»
یونئسکو، بو اولوسلارآراسی گونو ندنییله اویه اؤلکه‌لرینی، فرقلی اَییتیم و کولتورل گیریشیم‌لر یوْلویلا، دونیامیزین یاشایان وارلیق‌لارینی اولوشدوران دیل آیریملیلیغی و چوخ‌دیللی‌لییی، قوتلامایا چاغیریر.
