ییرمی سککیزینجی ایل دؤنومونده؛
آزربایجان میلی دیرنیش تشکیلاتی نین قارا یانوار فاجعه سی له باغلی باش ساغلیق ساوی
آزربایجانیمیزین قوزئینده استقلالیتین یئنیدن الده ائدیلمه سی سوره‌جینده، قارا یانوار، قاراباغ و باشقا شهید و غازی‌لریمیز، آتا-بابا تورپاقلاریمیزی قانلا سوواراراق وطن کیمی قالماسی‌نین تضمیناتی اولموش، اوچ رنگلی بایراغیمیزین ابدیاً دالغالانماسینی ملتمیمیزه ارمغان ائتمیشلر.
سون ایکی عصیرده آزربایجان تورک میلتی، وطنیمیزین گونئیی و قوزئیینده میلی حاکمیت و اؤز مقدراتینا حاکم اولماق مباریزه سی اوغروندا آغیر بدللر اؤده‌میش و مینلرجه وطن ائولادینی قوربان وئرمیشدیر. یالنیز اؤده‌نن بو بدللر و وئریلن قوربانلار ملتیمیزین میلی کیملیگینین قوامی و جوؤهری اولموش و بوگونکی آزربایجان تورک میلتینین واحید بیر بیلینج ایله تاریخ صحنه‌سینده وار اولماسینا، قوزئیده کی استقلالیمیزا و گونئیده کی شانلی مجادیله‌میزه دانیلماز تأثیرینی بوراخمیشدیر.
شوبهه‌سیز چاغداش آزربایجان تاریخینین ان آجی اما عئینی زاماندا ان شانلی صحیفه‌لریندن بیری ده قارا یانوار اولایی دیر.
قارا یانوار حادثه‌سینده، ۱۹۹۰٫ ایلده وطنیمیزین قوزئی حیصه‌سینده کی میلتیمیز آجیماسیز روس امپریالیزمین قارشیندا استقلال مجادله‌سی وئررکن، روس قیزیل اوردوسو باکی دا و باشقا شهرلرده الی یالین ملتیمیزین اوستونه یوگوررک ۱۴۶ انسانیمیزی شهید ائتمیش، ۷۴۴ سویداشیمیزی ایسه یارالامیشدیر. میلتیمیزین یادداشینا قازیلان بو حادثه، ملی اؤزگورلوک ساواشینی داها دا قیزغینلاشدیرمیش و بو شانلی مجادله‌نی استقلالا قدر آپارمیشدیر.
آزربایجانیمیزین قوزئینده استقلالین یئنیدن الده ائدیلمه سوره‌جینده، قارا یانوار، قاراباغ و باشقا شهید و غازی‌لریمیز، آتا-بابا تورپاقلاریمیزی قانلا سوواراراق آنا وطنی قورویوب اوچ رنگلی بایراغیمیزین سون سوزا دک دالغالانماسینی ملتمیمیزه ارمغان ائتمیشلر.
قارا یانوارین ۲۸٫ ایل دؤنومونده، آزربایجان تورک میلتینین میلی حاکمیتی و بوتؤولوگو یولوندا جانینی و قانینی اسیرگه‌مه‌ین بوتون شهید و غازی‌لریمیزین قارشیسیندا سایغی ایله باش اگیریک.
سون سوز استقلال و ملی حاکیمیت دیله‌گی ایله
آزربایجان میلی دیرنیش تشکیلاتی
تبریز – ۲۰/۰۱/۲۰۱۸
