بلژیک-ین بروکسل شهرینده ایران خلقلری و حرکتلرینین دئموکراتیک پلاتفورم کنفرانسی پژاک اؤندرلیگینده گرچکلشمیش. بو کنفرانسیندا گونئی آزربایجان تورکلرینی‌ده فرهاد بشارت آدلی بیریسی تمثیل ائتمیش. بو آدامی بیر آز آراشدیردیم و سولجو اولدوغونو گؤردوم. بو توپلانتینین آماجی و ایچه‌ریگی حاققیندا باشقا بیر یازی یازماق لازیم آما بورادا مسئله نده‌ن آزربایجان تورکلرینی بیلینمه‌یه‌ن بیریسی تمثیل ائدیر و بو تمثیلیته بیر اعتراض سسی چیخمیر؟

کئچن ایل (بیز و تمثیلیت سورونو) باشلیغی ایله بیر یازی یازدیم و او یازی دا آزربایجان میللی حرکتی نین تمثیلیت سورونونو اورتادان قالدیرماسی گرکدیگینی یازدیم.

گونئی آزربایجان میللی حرکتی سیاسی بیر اورقانیزاسیون اولمادیغی اوچون بعضن تمثیلیت سورونو یاشاماقدادیر. بو تمثیلیت مسئله‌سی گئنللیکله اولوسلار آراسی آرئنادا اؤز داغینیقلیغینی و دوزه‌نسیزلیگینی گؤسترمکده دیر. میللی حرکت ایچریسینده فرقلی سیاسی، کولتورل، سوسیال و اینسان حاقلاری قروپلارین یانی سیرا باغیمسیز اولاراق میللی حرکت منسوبو شکلینده فعالیت گؤسترنلر ده واردیر. بیریسی اؤزونو بو حرکتین قوروجوسو، بیریسی میللی لیدری و باشقا عنوانلارلا آدلاندیریرلار. هر قوروم و شخص ده دوغال اولاراق اؤزونده بو حرکتی تمثیل ائتمه حقی گؤرور. هر شخص و قوروم اؤز فیکیرلرینی میللی حرکتین فیکیری کیمی گؤستریر و او شکیلده میللی حرکتی تمثیل ائدیر.

بعضن میللی حرکتین فرقلی شخص و قوروملاری تضادلی بیر شکیلده گؤروش اورتایا قویورلار. و بو میللی حرکت ایچریسینده تضادلی بیر بوتونون اولدوغونو قارشی طرفه ایلقا ائدیر. بئله اولونجا میللی حرکت بوتونلوگونو ایتیریر. بیریسی فرقلی گؤروشلرله اورپا اؤلکه لرینده گؤروش کئچیریر بیر باشقاسی ایسه بیر عرب اؤلکه سینده میللی حرکتی تمثیل ائتدیگینی ایددعا ائدیر. ائله دوشونوره‌م کی دونیانین ان گوجلو اؤلکه‌سی بئله گونئی آزربایجان میللی حرکتی قده‌ر دیپلماسی چئشیدلیلیگی یاشامیر.

بوگون بو دوروم سورون اولاراق گؤزوکمه‌سه‌ده یاخین گلجکده میللی حرکت و طبیعی اولاراق گونئی آزربایجان اوچون سورون یارادابیلر. اونا گؤره بو سورونو اؤنلمک اوچون میللی حرکت ایچریسینده بو تمثیلیت مسئله‌سینی حل ائتمک لازیمدیر. چونکو بو قدر داغینیق گؤروشلو حرکتی دونیا جیددیه آلماز. جیددییه آلیسنا بئله فرقلی شکیللرده یوروملانیب دونیا گوجلری طرفیندن اؤز چیخارلاری دوغرولتوسوندا حرکتی داها دا داغینیق حالا گتیره بیلرلر.

بیزیم بیر دؤولتیمیز وار ایدی – داود توران