دوام ائدن اعتراضلارلا باغلی گؤروش؛
میلی حرکت اؤز مئیدانینا صاحیب چیخمالیدیر
مجید جوادی (آراز)؛
ایران شهرلرینده نئچه گوندن بری باشلانان اعتراض دالغاسی هر گئچن گون گئنیشله ییر. اعتراضلار ایلک باشدا اؤلکه ده کی اقتصادی فلاکته تپکی اولاراق اورتایا چیخدی و رژیم ایچینده بعضی چئوره لر بو اعتراضلارا مسامحه گؤستریب استفاده ائتمگه چالیشدیلار. یالنیز اولایلار گؤزلنمز شکیلده سرعتله بؤیویوب و رژیمه قارشی بیر عمومی عصیان حالینی آلماغا باشلادی.
آزربایجان میلی حرکتی بیر استراتژی اولاراق سون ایللرده هر زامان مرکزیتچی جریانلاردان آیری دوروب و اؤز اوینونو اویناماغا چالیشیبدیر و بو استراتئژیسینده اولدوقجا باشاریلی اولوبدور. بو استراتژی زامان ایچینده میلی حرکته چوخ شئی قازاندیریب و ملی حرکتی گونئی آزربایجانین ان باسغین و غالب سیاسی گوجو حالینا گتیریبدیر.
سون اولایلاردا دا باشدا میلی حرکت بیر گله‌نک اولاراق آیری دورماق استراتئژیسینی منیمسه دی. یالنیز بو دفعه اولایلار هر زامانکیندن فرقلی گلیشدی. ایران شهرلرینده اورتایا چیخان اعتراضلار سادجه تهران و نئچه بؤیوک شهره محدود قالمادی و سرعتله اؤلکه نین هر طرفینه یاییلدی. کیچیک شهرلر و بیر چوخ ائتنیک بؤلگه ده اولایلار چیخدی و بؤیویرک دوام ائدیر. اولایلارین مقیاسی او قدر بؤیودو کی آزربایجان بئله اونون ائشیگینده قالا بیلمه دی.
آزربایجان ملی حرکتینین اولومسوز توتومونا رغماً سون گونلرده اورمو و اردبیلدن توتموش قزوین و همدانا قدر فرقلی مقیاسلاردا اعتراض تجمع لاری باش وئردی، چونکو گرچک بودور کی آزربایجان و تورک انسانی سادجه ملی حرکتی گؤروب و ائشیتمیر!
ایللردن سونرا بیر داها آزربایجانین شهرلرینده فارسجا شعارلار ائشیدیلدی و ابتکاری عملی میلی حرکتده اولمایان اولایلار گلیشدی. بو دوروم بیر چوخ آزربایجان و تورک دوشمانینی سئویندیردی و چوخلاری مئیدانا گیریب اوزونه پای چیخماغا چالیشدی. شاهچیلاردان، مجاهدلر و کوردچو ترور تشکیلاتلارینا قدر هر کس آزربایجانا قییم کسیلدی و امر و نهی ائله مگه چالیشدی!
گؤرونن اودور کی میلی حرکتین بایکوت و آیری دورماق استراتژیسی بو دفعه جواب وئرمه ییب و آزربایجان شهرلری میلی حرکیتن کنترولوندان چیخماغا باشلاییب. تئزلیکه استراتژی دگیشدیریلمز ایسه داها دا چوخ چیخمایاجاغینی کیمسه تضمین ائده بیلمز.
اعتراض دالغاسی ایستر بیر سوره سونرا بیتسین، ایستر اوزانیب فرقلی ابعاد قازانسین، مادام بو دالغا بیزه رغماً آزربایجانا گلیب اونو آزربایجانا نامحرم اولانلار دئییل، ملی حرکت یؤنلندیرمه لی و آزربایجان تورک ملتی نین چیخارلارینی قورومالیدیر!
میلی حرکت اؤز مئیدانینا صاحیب چیخمالیدیر!
