تجربی تئوریسین و ایدئولوق – داوود توران
بو گون باشلیغی ایله بیر یازی یازماق ایستیردیم آما ایزله دیگیم بیر ویدئو دانیشیغی سونوجوندا فیکریمی دئییشدیم.
بو گون <گونئی آذربایجان میللی حرکتی؛ میللیتچیلیکدن وطن سئورلیگه کئچیش> باشلیغی ایله بیر یازی یازماق ایستیردیم آما ایزله دیگیم بیر ویدئو دانیشیغی سونوجوندا فیکریمی دئییشدیم.
اسکیده‌ن تجربی دیشچیلر وار ایدی. بیلمیره‌م ایندی ده وارلار یا یوخ؟ اونلار اؤزلرینی دیشچیلیک ساحه‌سینده پروفسور اولاراق گؤررلردی. ایندی باخیرام بئله بیر تجربی دیشچیلر‌ده آذربایجان میللی حرکتینده یاییلمایا باشلاییبلار. آدام ائله تئوری‌دن دانیشیر سانکی تئوری حاققیندا اونلارجا کیتابلار یازمیش و یا ایدئولوژی‌نی ائله آنلادیر سانکی سوسیال بیلیملر ساحه‌سینده قبول ائدیلن بیر آغیرلیقدیر.
آذربایجان میللی حرکتی‌نی ان اؤنملی سورونلاریندان بیریسی سورومسوزجا فیکیر بیلدیرمک و هر کسین هر شئیی الده ائتمک ایسته‌گی‌دیر. هر کس اؤزونو ابن سینا و یا فارابی کیمی هر ساحه ده اوزمان گؤرور. سیاست، توپلوم، توپلومسال تاریخ، فلسفه و اقتصاد ساحه‌لرینده فیکیر اوره‌تیرلر. و گئنللیکله بو فیکیرلرین هئچ بیر بیلیمسل طرفی یوخدور.
بیلگی ایله بیلیم آراسینداکی فرق دیققته آلینمادان بیلگی‌لی (چوخونلوقلا دا قولاقدان دویما بیلگیلر) اینسان ایله بیلیمسل اینسان قاریشدیریلماقدادیر. بیلیمسل اولمایان چؤزوملر ایسه قورتاریجی شکلینده توپلوما سونولماقدادیر. بوتون بونلار بیزیم هله‌ده توپلومسال اولاراق جیددی سورونلارلا قارشی قارشییا اولدوغوموزو گؤسترمکده‌دیر.
