شعیر: «دار آغاجی» – حبیب ساسانیان
آزربایجانلی تورک میللی فعال و سیاسی محبوس حبیب ساسانیان «یاکاموز» آزربایجان میللی حکومتی‌نین باش‌ساوجی‌سی (دادستان کل) فیریدون ایبراهیمی حاققیندا تبریز زیندانیندا حبس‌ده ایکن یازمیشدیر.
رحمتلیک فیریدون ایبراهیمی نین یۆکسک دۆشۆنجە و یئنیلمز اینامینا ایتحاف اوْلونور.
چاغیردی دوستاغین گؤزَتچیلری
قارانلیق محبس دَه یاتان بیر اَری.
بو گون آزادلیغین گۆنودور سنە
اَل گؤتور بو ایشدن، گیریشمە یئنە
عاییله ن قاپیدا سنی گؤزلَه ییر
گَل قانون قارشیندا سوْن دؤنه اَییل
بوراخ بو بوْشونا موباریزه نی
یوخسا یوْخ ائده ریک بیر آن دا، سنی
ایکی یول اؤنونه، سئچیم سنینله
سونون بو یوللارین بیز دییه‌ک، دینله
هَن دئه سن بو آن دا آزاد اولورسان
یوخ دئسن سارالیب بو گۆن سولورسان.
ائشیکدە عاییله ن اینتیظاردادی
یوخسا بو آخشاما باشین داردادی
او سینماز ایگیدین دوداغی قاچدی
بیر آز دویغولانیب، سونرا سؤز آچدی
دئدی: بو قانون یوخ، بوتون ظولومدو
بو ظولمه باش اَی‌مک، منه اولومدو
ایکی شرطیم واردی هَن دییه م سیزه
اینامیم اوغروندا چؤکه رَم دیزه.
بیرینجی تَر-تمیز گئیینَم گرک
سیزدن قورتارماغا چیرپینیر اۆرک
سوْن دؤنه ائلیمین شانلی بایراغین
بیر آن، دار آیغیندا کؤکسومه تاخین
گئدیم دار آیغینا اۆرک دؤیونسون
من تؤوبه ائیلَه‌ییم، جللاد سؤیونسون!
بیرده بیر قیزیل گول سانجیم یاخاما
او‌نو ایتحاف ائدیم عزیز آناما.
بو سؤزو حاکیمه تئز یئتیردیلر
اونون ایسته یینه بویون اَیدیلر
گئییندی داماد تک پئنجک شالوارین
تاخدی سین- سینه، شانلی بایراغین
ویقارلا یوللاندی دارین دیبینه
اَللرین اوزاتدی دارین ایپینه
اؤپه‌رَک دار ایپین بوْینونا سالدی
جللاد دا، حاکیم دَه بوتون مات قالدی
دئدی؛ من اؤله رک دیری قالیرام
ائلیمین شرفین ساتین آلیرام
کؤکسومدە بایراغیم داردا اَسَرم
وارلیغین دانانین کؤکۆن کَسَرم
بایراغیم اوْلاراق اَسَرم بو آن
سن ائی ظالیم جللاد، من اَسدیکجه یان.
بایراقلا ویقارلی او‌ْ دالغالاندی
گولوشو سمایه بیر آن جالاندی
گولوش دوداغیندا، یومدو گؤزلرین
قوْووشدو تاریخه، دئدی سؤزلرین
سن ائی گؤزل یوردوم، ائی آزربایجان
یئنیلمز بایراغین، جان سنه قوربان
«یاکاموْز» یازدیقجا، اورک داغلاردی
اولومدن ( فیریدون*) بئله باج آلدی.
تبریز دوستاغی: ۲۰۱۷
فریدون ابراهیمی متولد۲۹ آبان ۱۲۹۷ هجری شمسی آستارا، شهادت اوّل خرداد ۱۳۲۶ هجری شمسی تبریز.
دادستان کُلّ حکومت ملی آزربایجان به ریاست مرحوم سیّد جعفر پیشه وری.
حبیب ساسانیان«یاکاموز»
