سؤیله‌م چئلیشکیمیز نه زامان دوزه‌له‌جک؟ – داود توران
کئچن گون رحمتلیک مهندیس امانی-نین ایل دؤنومو مراسیمی فیلمینه باخارکن دانیشانلاردان بیرسینین سؤزلری عاغلیما تاخیلدی. او دئدی: بیز امام حسین-ین وارثلریییک. بیز آتا بابک-ین یولوندان گئدنلریک. بو سؤزو نه آنلامدا دیله گتیردیگینی بیلمیره‌م آما بو سؤزدن یولا چیخاراق آزربایجان میللی حرکتینده‌کی سؤیلم قارماشاسی و چئلیشکیلری دیققتیمی چکیر. اؤزه‌للیکله سون واختلاردا میللی حرکتده دین دویغوسونون یوغونلاشدیغینی حیس ائدیره م.
بیلمیره م او دوستوموز امام حسین و بابک-ی نئجه و هانسی دوشونجه‌یه دایاناراق بیر آرایا گتیریر و دالیسیجا دا بوتون میللی حرکتی اونلارین دوامچیسی اولاراق گؤرور؟ بابک، بوتون تاریخی قارانلیقلارینا باخمایاراق آزربایجان میللی فعاللاری اوچون بیر قهرمان اولاراق گؤرونور. عجبا امام حسین‌ده اونون کیمی می‌دیر؟ بابک کیمینله ساواشدی؟ اگر معتصم-ین یئرینه حسین عائله سینده بیریسی او دؤنم حاکیم اولسایدی، بابک او حاکیمه بویون مو ایه جکدی؟
سؤیله‌م چئلیشکیمیز ساده‌جه بونونلا دا سینیرلی دئییل. حتتا ایلکل تانیملاریمیزدا بئله بو چلیشکیندن قورتولا بیلمیریک. فارس میللیتچیلیگینی محکوم ائدیریک آما تورک میللیتچیلیگینی ساوونوروق. میللیتچیلیگین اولومسوز بیر طرفی وارسا اونون تورک و فارس اولماسی نه‌یی دئییشدیره‌ر؟ دئیه بیلرسینیز فارس میللیتچیلیگی باسقیجی‌دیر تورک میللیتچیلیگی ساوونماجی. او زامان گونئی آزربایجان-دا حاکیم اولاجاق تورک میللیتچیلیگینین باسقیجی اولمایاجاغی نین قارانتیسی وار می دیر؟ هله بعضی‌لری ایسه اؤزلزینی میللتچی اولاراق تانیملیرلار. سوسیال بیلیملر سؤزلرینه باخدیم. بئله بیر قاورام تاپابیلمه‌دیم. آنلامینی بیلن وارسا لطفن یازسین.
گونئی آزربایجان-ین قورتولوش ره‌چته‌سی تورک میللیتچیلیگینده می گیزلیدیر؟ بو سورویا دوغرو و اطرافلی جواب وئریرسک سؤیله‌م قارماشالیغیمیزدان دا قورتولا بیله‌ریک بلکه…
