آراز نیوز تی وی
گوندم پروقرامی نین ۲۰۰جو بؤلومو قوتلاندی
آراز نیوز تی‌وی‌نین گوندم پروقرامینین ۲۰۰-جو بؤلومونون یایینلانماسی آراز نیوز عایله‌سی طرفیندن قوتلاندی .
خزر مدنیت، کولتور و توپلومسال آیدینلانما درنگی‌نین مرکزینده کئچیریلن بو تدبیره خزر درنگی عضولری، آزربایجان میللی دیرنیش تشکیلاتی عضولری و آراز نیوز سوروملولاری و چالیشانلاری قاتیلدیلار.
تدبیرده سایین مجید جوادی مئدیادا چوخ‌سسلی‌لیک و چوخولجولوغون اؤنمینی وورغولایاراق اؤزگور مئدیانین مدرن دموکراسی‌لرین دؤردونجو تمل داشی اولدوغونو ایفاده ائتدی. او هابئله آراز نیوز تی‌وی‌نین بیر سربست تریبون کیمی بوتون گؤروش و اگیلیملره سؤز وئرمگه چالیشدیغینی و حاشیه‌لره قاریشمادان سادجه میللی مساله‌لره متمرکز اولدوغونو بیان ائتدی.
گوندم پروقرامینین ائدیتور و سونوجوسو سایین نازیلا نریمانلی دا خبرچی‌لیک‌ده چتینلیک‌لره اشاره ائدرک آراز نیوز تی‌وی‌نین اولدوقجا محدود امکانلارلا الیندن گلدیگی قدر میللی حرکت ساحه‌سینده اؤزگور خبرچیلیگه خدمت ائتمگه چالیشدیغینی افاده ائتدی.
تدبیرین سونونداکی رئسئپسیوندا ایسه قاتیلیمجیلار آراسیندا سربست مباحثه و گؤروش آلیش وئریشلری اولدو.
قئید اتمک لازیم‌دیر کی آراز نیوز تی‌وی اینترنت تلویزیونو بیر ایل یاریمدان بری آراز نیوز وئب سایتی بنیه سینده فعالیته باشلاییبدیر. ایندیلیک هرگون بیر پروقرام یایان آراز نیوز تی‌وی گونئی آزربایجانین میللی چیخارلارینی اساس آلاراق خبر، یوروم، آنالیز، مصاحیبه، تاریخ و بلگه‌سل پروقراملاری یایماقدادیر. هر هفته اوچ بؤلوم یایینلانان گوندم پروقرامینین ۲۰۰جو بؤلومو جوما ۳۱ شهریور ۱۳۹۶ تاریخینده یایینلاندی.
