آزربایجان میلی حرکتی؛ اخلاقی مجادله یوخسا احمدی نژادیسم! مجید جوادی
اورتا دوغو سیاسی کولتورونده دمکراسی، چوخولجولوق و اخلاقی مجادله هارداسا یوخدور. بو بؤلگه‌ده چوخونلوقلا پوپولیسم و لمپنیستی داورانیشلار سرگیلنیر و نتیجه‌ده دیکتاتورلار باش گؤستریرلر.
اورتا دوغو سیاسی کولتورونده دمکراسی، چوخولجولوق و اخلاقی مجادله هارداسا یوخدور. بو بؤلگه‌ده چوخونلوقلا پوپولیسم و لمپنیستی داورانیشلار سرگیلنیر و نتیجه‌ده دیکتاتورلار باش گؤستریرلر.
ایران سیاسی اورتامیندا پوپولیسم و لمپنیسمین سیمگه‌لشمیش فیگورو احمدی نژاددیر و آرتیق ایران سیاسی ادبیاتیندا احمدی نژادیسم بیر تئریمه دونوشوب.
نه یازیق کی گونئی آزربایجان‌نین سیاسی اورتامی‌دا اورتا دوغو و ایران سیاسی کولتوروندن مستثنا دئییل و اؤز نصیبینی آلدیبدیر.
آزربایجان میلی حرکتینده دموکراسی‌یه اینانان گوجلرین یانیسیرا پوپولیسم و لمپنیسمینه سؤیکنن جریانلار و شخصلر ده واردیر. میلی حرکتین بوتون تشکیلاتلار و جریانلارین ایچینده بو طرز داوانیشلاری آز و یا چوخ گؤرمک ممکن‌دور؛ اما معلوم بیر شخص وار کی مع‌الاسف احمدی نژادیسمین سیمگه‌سی حالینا گلیب. بو شخص آزربایجان تورک ملتی‌نین اعتباری ایله اله گئچیردیگی مئدیا قورولوشونو بو یؤنده اؤز آمال و عمللرینه آلت ائدیبدیر. بو شخص ایللردن بری یورد ایچینده کی فعالاری دئشیفره ائتمیش و حاکمییتین آچیق هدف حالینا گتیرمیش، سندسیز بیر شکیلده و اوز مسئولیتی! ایله بیریلرینی ساتقینلیق، جاسوسلوق، آخماقلیق، خیانت، جنایت، تجاوز، قاچاقچیلیق و بو کیمی شئیلرله متهم ائدیر و بو ایشی گؤررکن ده دوشوک و نزاکت‌سیز بیر دیل ایشله‌دیر. سونرا دا هئچ بیر شئیی اثبات ائتمگه احتیاج گؤرمه‌دن بیر شئی اولمامیش کیمی یولونا دوام ائدیر.
بو داورانیشین آرخاسیندا کی تکنیک ندنلر ایسه آیریجا بیر مسئله!
البته بونودا وورغولاماق لازیمدیر کی اونون قارشیسیندا دورونلاردا زامان زامان لمپنیسمه و تخریباتچیلیغا باش وورورلار. چونکو ائله همن اورتا دوغو و ایران ذهنیتی ایستر ایسته‌مز قارشی طرفده‌ده وار. ائله همن بو منتقد شخصلر هئچ دوشونمورلر کی یانلیشین جوابی یانلیش دئییل و بوردا قارشی طرفده لمپنیسمه باش وورانلاری قینامادان گئچمک البته عقل و وجدان ایشی دئییل.
اوزون سوره‌دن بری میلی حرکتین ایچینده کی بیر سیرا اؤنده گلن فعاللار عمومی بیر بیلدیری یایاراق میلی حرکت فضاسینا حاکم اولان تخریباتچیلیغی محکوم ائدجکلرینی و ایختلافلارین بیر کنارا بوراخیلماسینی ایسته‌یه‌جکلرینی ایفاده ائدیردیلر. البته بو مبارک بیر ایشدیر کی اونو دستکله‌مه‌مک اوچون آنجاق غرضلی اولماق لازیمدیر.
نه ایسه، سؤز قونوسو مکتوب چیخدی اما نه یازیق کی چوخ تئز بللی اولدو کی معلوم شخصی دستکله‌ین معلوم جریان بو تشبوثا ال قویوب و اونو اؤز اینحصارچی و آنتی دمکراتیک هدفلری اوچون بیر اویونا چئویریب‌دیر.
تانینان ایمضالارین چوخو بللی بیر طیفه منسوب شخصلریندیر. دیگر جریانلارین اؤنده گلن شخص‌لریندن ایمضا ایستنمه‌ییب. ایمضالایانلاردان بیر سیراسی اؤز ایفاده‌لری ایله سادجه تخریباتی محکوم ائدیب قیناماق اوچون ایمضا آتیبلار و هانسیسا طرفی محکوم ائدیب اودا بنزین سپمک اوچون دئییل. بیر سیراسیدا وار کی دئییر منیم خبریم اولمادان آدیم لیسته قویولوب.
جالیب بو کی اورتادا یوزلرجه کیم اولدوغو بللی اولمایان و کیمسه‌نین تانیمادیغی آد وار و قیسا بیر سوره‌ده هاردا و نه شکیلده بو قدر ایمضا توپلانیب بللی دئییل و ان جالیبی بو کی ایمضا ییغانلار حذفی داورانیشا تنقیدلره جواب اولاراق آچیقجا کاناللاریندا یازدیلار کی اونلارین هدفی بیر سیرا «ضد میلی» شخص و قورومو حذف ائتمکدیر و اونا گؤره‌ده اونلارین ایمضالاماسینا مساعده ائتمه‌یه‌جکلر و بئله‌لیکله‌ده میلی بیرلیک قورماق ایسته‌ییرلر!
نه قدر تانیش بیر میلی بیرلیک ذهنیتی! همن میلی بیرلیک کی رضا خان قوردو و اوغلو دوام ائله‌دی. اولمادی، خمینی یئنی‌سینی قوردو و ایندی خامنه‌ای دوام ائدیر. متد دقیقا هماندی. مخالیفه و منتقیده انگ وور، حذف ائله، اؤزون تک قال، تک باشینا ذاتاً بیرلیک اولاجاقسان. تام بیر اورتا دوغو و ایران کلاسیک اثری!
البته بو طرز بیرلیک قورماقدا متودولوژیسی ان موثر اولان، یانی پوپولیسم و لمپنیسمی حد اعلادا ایشلدن و مقدس! هدف اوچون هر جور اخلاقسیزلیغی مباح گؤرن احمدی نژاد اولدوغو اوچون اونون سبکی داها معروف اولدو.
گونئی آزربایجان‌دا ایللردیر معلوم بیر شخص و جریان احمدی نژادی متدلارلا میلی بیرلیک قورماغا چالیشیر کی بونون ان کمدی-تراژیک نمونه‌سی ائله بو سون طومار ایدی.
البته طومارین آرخاسیندا کی و اساس هدفی اولان یاخشی نیتی آلقیشلاماماق اینصاف دئییل، اما ائله بیر تمیز نیتلی تشبوثو اله گئچیریب بئله بیر سونوج چیخاردان احمدی نژادیستلره‌ده احسنت دئمک لازیم.
هئچ شبهه یوخدور کی بو میلی بیرلیگین گئدجگی یئرده رضاخان و خمینی‌نین‌کیندن فرقلی اولمایاجاق. چونکو ذهنیت و متدلار همندی.
آزربایجان میلی حرکتی اولاراق بیزیم باشلیجا هدفلریمیزدن بیری میلی حرکتده دمکراتیک نورملاری، اؤزللیکله‌ده چوخولجولوغو یئرینه اوتورتماق و توتالیتر ذهنیتی توپلومدان سیلمک اولمالیدیر. بونون اوچون‌ده ایندی‌دن اخلاقی مجادله متدلارینا باغلی قالمالی‌ییق و پوپولیسمی و لمپنیسمی هانسی جبهه‌ده اولورسا اولسون قینامالی و اوندان مسافه آچمالی‌ییق. یوخسا ان یاخشی احتماللا و شانسیمیز بیزه چوخ یاور اولورسا گله‌جکده فارسجا دانیشان بیر خامنه‌ای‌نین یئرینه تورکجه دانیشان بیر خامنه‌ای میز اولاجاق.
