مارکسیزمه وئرن ایللرینین ایرانچی اؤزلمی ایله، آذربایجان میللی حرکاتینین تورکچو گوندهمی آراسیندا سورونه-سورونه ازیلن کسیمه “سول فئدرالچیلار” دئییلیر!

بیر آز قریب و کلاسیک اولمایان آنلاتیم اولدو! اؤزوم ده قبول ائدیرم! آنجاق، آدیندان دا بللی اولاسی “تئرمین گونده می”نین اؤزل باخیشینداییق.

 گوندم قونو: سون گونلرده یوخ ساییلان “آذربایجان فئدئرال-دئموکرات حرکاتی”نی گؤیلره قالدیراراق گونئی آذربایجانین اؤزگورلوگو و باغیمسیزلیغی اوغرونا موجادیله ائدن تورکجو-ایستیقلالچی قوروملاری اعتیبارسیز سایان بیر یازییلا قارشیلاشدیم. دوغرودان چوخ شاشیردیم! منی شاشیرتان قونو ایسه، تورکچو-ایستیقلالچی قوروملارین گوجلو-گوجسوز اولماسی دئییل، بیر ایران سئودالیسی فئدئرالچی مئساژین فارس مئدییاسی آلانیندا یاییلماسیدیر.

“ایرانی یم، ایرانی سن،… ،ایرانی ییک، ایرانی سیز،…!” کیمی کیملیک صرفینی سورکلی دیله گتیرن سول فئدئرالچیلارین معصوم ایستکلرینین ممنونلوقلا فارس مئدیاسیندا یاییلماسی چوخ نورمالدیر. آنجاق، باشا دوشولمز اولان قونو، اونلارین آذربایجان میللی حرکاتینین آلانیندا دئییل، ایرانچی مئدیالارین مئیدانیندا فارسچی-ایرانچی فاشیستلرین چؤرگینه یاغ سوتمکلریدیر. بونلار، ساده جه دوشمنه یاوشاقلیق ائتمکله دئییل، “آذربایجان میللی حرکاتی”نین جان باهاسینا قازانمیش اولان باغیمسیز تئرمینلرینین ده ایرانیلشدیرمهسی ایله فرقله نیرلر.

قونو قایناغی: آلیشقان اولدوغوموز بیر دئموکرات فارس، تانینمیش فئدئرالچی سویداشیمیزا سئپاراتچی آدی وئرمکله، اونو ایران(فارس) دوشمنی، یالانچی، آذربایجانین ایراندان آییرماسی یولوندا گیزلی پانتورکیست، تجزیهچی آدلاندیریر. سول فئدئرالچی دوستوموز بو ایفادهلره قیزاراق ایچ قورخوسونو اؤز ایستیقلالچی سویداشلارینی وورماقلا بئله جه سینه اورتایا قویور .(قیساتمیش جومله آنلاتیم بیچیمینده فارسجادان تورکجهیه چئویرمیشم)

-سیز، منی ایلک اؤنجه قوومی فئدئرالچیلیقدا، سونرا ایسه سئپاراتچیلیقدا،ازربایجانی ایراندان آییرماقدا ایتیهام ائدیرسینیز. بو شرمدن اوزاقدیر. ایتیهامدیر، ایفتیرادیر، آنتی دئموکراتیک داورانیشدیر….بو گون گوج سیزین الینیزده اولارسا بوش ایدیعالارا دایاناراق منی دار آغاجیندان آساردینیز!  ائله دئییلمی؟ من ۲۷ ایلدیر ایراندا دئموکراتیکلشمه و خالقلارین باریش ایچینده یاشامی اوچون چابا گؤسترمیشم…ایران خالقلاری حرکتلرینین مرکزچی موخالیف قوروملارییلا دیالوغا گیرمهلیدیر. بو، ایراندا کوتلهنین گنل میللی مصلحتلری اوچون یاردیمچی اولور… سیزین اولترا ناسیونالیست فیکیرلرینیز چوخ تهلوکهلیدیر…. سیزین توتومونوزلا ایران داغیلابیلر!  اویسه من خالقلارین بیر یئرده یاشاماسینا دریندن اینانیرام… سیزین گئریچی فیکیرلرینیزه اوزولورم!!!!

تئرمین و سلوقان دییشمکده ایصرارلی توتوم:

• میللتین قازاندیغی تئرمین: نه آز، نه چوخ “آذربایجان میللی حرکاتی”!
• سول فئدئرالچی کسیمین مئیلی جه:”ایران و آذربایجاندا تورک خالقینین میللی-دئموکراتیک حرکاتی”!
• میللتین قازاندیغی تئرمین: تورک میلتی!
• سول فئدئرالچی کسیمین مئیلی جه: ایرانین تورک خالقی!
• میللتین قازاندیغی تئرمین: گونئی آذربایجانین میللی-سیاسی موجادیلهسی!
• سول فئدئرالچی کسیمین مئیلی جه: ایران و آذربایجاندا میللی دئموکراتیک خالق موجادیلهسی!
• میللتین قازاندیغی تئرمین: آذربایجان تورک میلتینین میللی حاقلاری!
• سول فئدئرالچی کسیمین مئیلی جه: ایران خالقلارینین ائتنیک پروبلئمی!
• میللتین قازاندیغی تئرمین: فارس شووینیزمینه اؤلوم اولسون!
• سول فئدئرالچی کسیمین مئیلی جه: موللا رئژیمینه اؤلوم اولسون!
• میللتین قازاندیغی تئرمین: گونئی آذربایجان اوچون میللی دؤولتچیلیک!
• سول فئدئرالچی کسیمین مئیلی جه: ایران اوچون فئدئرال دؤولت!

و سایسیزجا دییشن تئرمینلر!

دوشونجه قایناغی:

گونئی آذربایجان تورکو اولان سول فئدئرالچیلارین بؤیوک کسیمی آوروپادا یاشاییر. سولچو ایران پارتییالاریندا سیاسیلشن بو یاشلی کسیم ایچینده نوستالیژیک اولایلارین بؤیوک رولو واردیر. آورپادا سورن قورومسال ایلیشگیلر، کیشیسل و عاییله وی دوستلوقلار، کئچمیشدن قالان نئچه ائتنیکلی ایدئولوژیک باغلار و بونا بنزر چوخلو باغلانتیلاردا ایرانیلیک و فارسچیلیغین اورتاق رول اویناماسی فارس اوستونلوگونه ندن اولموشدور. اؤلچوم سیراسییلا پاسیف، ایرانچی فعال، آذربایجانچی فعال کاتقوروسوندا یئرلشن سولچو فئدئرالیست سویداشلاریمیزین اورتاق ذهنیتلری مارکسیزمدیر. بو ذهنیته گؤره، میلتچی دوشونجه گئریچی، کاپیتالیست، ایمپئریالیست، آیریمچی، آنتی پرولیتر و قاوقاچی دیر. بو ذهنیتین بیر ده درین باغلانتیسی ایران آدلانان یئردهکی خالقلار دوستلوغوندا دایانیر. بو دوشونجهیه گؤره، ازیب-ازیلن خالق یوخدور. ایران آدلانان یئرده یاشایان بوتون خالقلارین بیر دؤولتی، بیر دیلی، بیر بایراغی واردیر. ائتنیک سوْرون وارسا دا، یالنیز و یالنیز وار اولان شرطلر ایچینده قوْنوما گلمهلیدیر. بو ایسه، او دئمکدیر کی، بو کسیم اوچون آذربایجانلا ایران آراسیندا سئچیم اولورسا کسینلیکله ایران اوغروندا آذربایجانین ایستیقلالی و گلهجگی قارشیسیندا دوراجاقلار!

آذربایجان میللی حرکاتی ایچینده گئنیش آلانلی فئدئرالچی کسیم بولونماقدادیر. گئنیش فئدئرالچی کسیمی، لیبئرال تورکچولوکده، ایران تورکلوگونده هابئله دینچی آذربایجانلیلار سیراسیندا دا اینجلهمک اولار. آنجاق، بو گوندمده یالنیز سول و مارکسیزمه باغلی اولان فئدئرالچی دوشونجه اله آلینیر.

سونوج:

سولچو فئدئرالچیلاردا اولان آشیری ایران سئوگیسی، زامان-زامان گونئی آذربایجان ایستیقلالچیلارینی قارشیسینا آلیر. بو قارشی دورمانین نه آنلامی واردیر؟

گونئی آذربایجان تورک میلتچیلری اوچون سولچو فئدئرالیستلرین بو توتومو چوخ آجیدیر. ایستیقلالچیلار اوچون ۴۰ میلیونلوق گونئی، ۱۰ میلیونلوق قوزئی و میلیونلارجا دونیایا سپلنمیش آذربایجان تورکو واحید آنلام داشیییر. ایستیقلالچیلار اوچون، میلتیمیزین بؤلوک-بؤلوک اولماسی دئییل، چوخولجو اولماسی گرهکیر. میلتیمیزین گلهجگی اوچون دیلچیسی ده، فئدئرالچیسی دا، ایستیقلالچیسی دا گرهکیر. بونلارین بیر آرادا اولماسییلا میلت آنلام تاپار! بیر-بیرینی اینکار ائتمکله دئییل! ایستیقلالچی کسیمه گؤره، فئدئرالچی آذربایجانلینین فارسچی-ایرانچی راسیزمینین قارشیسیندا اَییلمهسی، ازگینلشمهسی، اوفانماسی و ساوورنور دوروما دوشمهسی دئییل، ایگید بیر تورک کیمی دیم-دیک دایانماسی گرهکیر. فارس دیلینده، دوشمن مئدیاسیندا ایستیقلالین زیانلی، قورخولو، بؤلوجو، آلانسیز و اوفاجیق اولماسینی گؤسترمه گین آنلامی درین فارسلاشما و ایرانیلشمه دئییلسه، بس ندیر! ؟بونون هاراسی وطن سئورلیک، وطنداشلیق و سویداشلیقدیر؟ بیر فاشیست فارسین راضیلاشماسی اوچون میلیونلارجا بوزقوردچو سویداشین گونش کیمی پارلاق گرچگینی اسپور هیجانی آدلاندیرماق، یاشیللره آلدانماماسینی بیر کسیم ایستیقلالچینین آوانتوراسینا باغلاماق کیمی یوزلرجه میزی جاسینا داورانیشلارین هاراسیندا قارداشلیق روحو دایانیر! ؟