“آزربایجان میللی حرکاتی”ندا تئرمین گونده‌می!
بیر نئچه گون اؤنجه ایران آدلانان اؤلکه‌نین ائییتیم باخانلیغی،ندان لهجه‌لی فارسجانین ائییتیم سیستئمینه بوراخیلماماسییلا باغلی رسمی دؤولت بیلدیریسی یاییلیر. بو بیلدیرییه گؤره، اؤلکه‌نین ائییتیم سیستئمینده ایشه آلینان اؤیرتمنلرین ایلک آشامادا لهجه‌سیز فارسجا تئستیندن کئچمه‌سی گره‌کیر.
دیکتات ندیر؟
ان اوفاجیق دیرنج گؤسترمه‌دن قالیب دوشمنین بویوروقلارینی مانقورتجاسینا اویقولاماق امرینه دیکتات دئییلیر!
اؤنجه دوغما تورکجه‌میزده قیسا، آنلاملی و سییاسال تئرمینولوژیک گوندم یازیلار اولوشدوران داوود بئی توران قارداشیما تشککور ائدیرم.
گوندم قونو:
بیر نئچه گون اؤنجه ایران آدلانان اؤلکه‌نین ائییتیم باخانلیغی،ندان لهجه‌لی فارسجانین ائییتیم سیستئمینه بوراخیلماماسییلا باغلی رسمی دؤولت بیلدیریسی یاییلیر. بو بیلدیرییه گؤره، اؤلکه‌نین ائییتیم سیستئمینده ایشه آلینان اؤیرتمنلرین ایلک آشامادا لهجه‌سیز فارسجا تئستیندن کئچمه‌سی گره‌کیر. بو ایسه، اؤیرتمن اولماق ایسته‌ین، آنجاق فارس اولمایان ویا فارسلاشمایان یوزده ۷۵-ای اولوشدوران وطنداشین آپ-آچیق ائییتیم سیستئمیندن قووولماسی دئمکدیر.
دوشونجه قایناغی:
آپارتئید، آفریکادان یاییلان عیرقسل آیری-سئچکیلیگین ان رادیکال و ییخیجی بیچیمیدیر. بو آنتی بشری بیچیمین تمه‌لینده آزینلیقلی ائتنیک ایقتیداری دایانیر. آپارتئید گئنوسید اؤزللیکلی ائتنیک دیکتاتورلوغونون اوزرینده قورولموش کسکین دؤولت سیستئمیدیر. گونوموزون قوشوللارینا گؤره، آپارتئید، ائتنیک شووینیزمین فاشیزمه دوغرو ایره‌لیله‌میش ان سون آشاماسی ساییلیر. بو آشامادا، آزینلیق ائتنیک دؤولت طرفیندن آچیق-آیدین یئرلی چوخونلوق توپلولوقلارا قارشی میللی دیسکریمیناسییا و سئقرئقاسییا سیستئمی اویغولانیر. سؤزسوز کی، آپارتئیدین ان کسکین سیلاهینی آسسیمیله و ائلینه اولموش یئرلی اینسانلار اولوشدورور. هر هانسی ندنله، اوزده اؤز گؤرونن اؤزگه لشمیش یئرلی قوللوقچولار، عیرقچی دوشمنین ان اوجوز، ان کسکین سیلاهی کیمی اؤز توپلومونا قارشی ایشه آلینیر.
اویقولاما میکانیزمی:
فارسچی رئژیم، ۹۵ ایللیک عؤمرونون ان کسکین آپارتئید بیلدیریشینی یاییر. گؤرن-بیلن اینسان و اینسان توپلوسو فارسچی رئژیمینین آپارتئید سایاغی بیلدیریسینی قیناییر. آنجاق، علیل دوغان، ذلیل اؤلن سؤزده تورک فراکسییونونون نئچه نفریندن باشقا، اؤزونو تورک آدلاندیران ۱۰۰-دن چوخ دئپوتاتی – گؤرمه‌دیم-ائشیدمه‌دیم بیچیمینده لال-کار اولاراق سوسور! ۶ تبریزلی میلت وکیلی داها ایره‌لی گئده‌رک، سهند شهرجیگینین اسکی سورونونو باهانا توتاراق، فارس ائییتیم باخانینا عاجیزجه دیلکجه یازیرلار! یازیدا فارس ائییتیمینه عایید اولان مرکزلرین آز اولدوغونو دیله گتیره‌رک داها چوخ فارس دیللی ائییتیم اوخوللارین آچیلماسینی دیله‌ییرلر!
هدف کوتله:
پانفاشیست فارسچی رئژیم قاموی اولوشدورماق اوچون سؤزده تورک اولان تبریزلی نؤکرلرینه بویوروق وئریر! اونلارا، اویغون اولاسی گئنیش کوتله‌نین قافا بولاندیرماسی یؤنونده امیر وئریلیر. رئژیم طرفیندن دیکتات اولونور کی، “سوسقونلوق پوزولسون، قاموی اولوشسون”! ۶ نؤکر ایسه، هئچ دیرنج گؤسترمه‌دن فاشیست آغالارینین بویوروغونو اویغولاماغا اؤزن گؤستریرلر. ۶ تبریزلی مانقورت دئپوتات، رئژیمین دونیانی شاشیردان فاشیست بیلدیریسینه ان اوفاق ایشاره ائتمه‌دن باخان عنوانینا یاییندیریجی دیلکجه ایمضالیرلار! دیلکجه، کؤروکلنه‌رک بؤیوک بیر اولای کیمی رئکلام اولونور. هدف آپارتئید ایچریک لهجه‌سیز فارسجا بیلدیرینی کوتله گؤزوندن یاییندیراراق یاواشجاسینا دؤولت سیستئمینده
یئرلشدیرمکدیر!
سونوج:
میلیونلار گنج تورک، رئژیمین آپارتئید سایاغی آیری-سئچگی سییاستینه قوربان گئده‌رک، اونلارین میلت وکیلی عنوانینی داشییان قوزو بالاسی فارس نؤکری محمد حسین فرهنگی فارسچی رئژیمینین پارلامئنتینده ایلین ان ساکین، دوز گلیب- دوز گئدن، باش اغریسی وئرمه‌ین و نظمیلی نوماینده‌سی سئچیلیر.
هانی دئیرلر؛ “آغادان نؤکره هئچ قالماسا دا، بیر کؤپک پایی قالار!”
یازار: ائلدار قاراداغلی
