کیمسه‌نی اینانجیمیزا فدا ائتمکده حاقلیییق‌می – ایواز طاها
سکسنینجی گونش ایل‌لری‌نین اول‌لرینده مدنی فعال رحمتلیک نصیریان دونیایا گؤز یومدو. اونون ختم تؤره‌ن‌لرینی طنطنه‌لی کئچیردیک. دوست‌لارلا بیرلیکده خئیرال مسجدینده پلانلاشدیردیغیمیز مراسیم اوچون تورکجه یاخشی چیخیش ائدن، عینی حالدا مدنی فعالیت‌له ماراقلانان بیر عالیم آرادیق. بو آختاریشدا یولوموز اردبیل چئوره‌سینده گیلانده کندینه دوشدو.
۱. سکسنینجی گونش ایل‌لری‌نین اول‌لرینده مدنی فعال رحمتلیک نصیریان دونیایا گؤز یومدو. اونون ختم تؤره‌ن‌لرینی طنطنه‌لی کئچیردیک. دوست‌لارلا بیرلیکده خئیرال مسجدینده پلانلاشدیردیغیمیز مراسیم اوچون تورکجه یاخشی چیخیش ائدن، عینی حالدا مدنی فعالیت‌له ماراقلانان بیر عالیم آرادیق. بو آختاریشدا یولوموز اردبیل چئوره‌سینده گیلانده کندینه دوشدو. دوست‌لارلا بیرلیکده حجت الاسلام عظیمی قدیم‌ی مراسیمه دعوت ائتدیک. ائرته‌سی گونو نوحه‌خوانین حیدر بابا مرثیه‌سی ایله باشلادیغی مراسیم، عظیمی قدیمین گؤزل چیخیشی ایله سونا یئتدی. آخشام چاغی المهدی هتلینده یئمک یئدیکدن سونرا کیملیکچی بیر قورومون یارانماسی باره‌ده اوزون-اوزادی صؤحبت‌لر گئتدی. بوتون بونلار او قده‌ر ماراقلی ایدی کی، کیمسه ظارافاتجا دئدی: «کئشکه هر ۶-۷ آیدا فعال‌لاردان بیری اؤله‌یدی، بئله مراسیم‌لر کئچیره‌یدیک!» بو سؤزون آردیندان هامی‌نین باخیشی رحمتلیک عادل ارشادی‌فردده ایلیشیب قالدی. باخیش‌لارین آغیرلیغینی دویموش عادل دئدی: «توتالیم بیرینجیسی من، بس اوبیریسی کیم؟!»
ظارافاتین آرخاسیندا قورخونج بیر دونیاگؤروشو گیزله‌نیردی؛ یولداشیمیزی اینانجیمیزا قوربان وئرمک.
۲. مرتضی مرادپورون اعتصابی زامانی دوست‌لارین گیریشیمی ایله بیر کمپین باشلاندی. دوست‌لارین بیری خصوصی مئساژلار بو کمپینه تپکی گؤستردی. اونون نظرینجه مرادپور بو کمپین‌له راضیلاشا بیلمزدی. اونا بئله بیر جاواب یازدیم: «مرتضی اؤز عقیده‌سی اوغروندا اؤلومو سئچه بیلر، آمما بیز، باشقا اینسان‌لار اولاراق، اونون جانینی قورتارماق اوچون قئیدسیز-شرطسیز مسئولیت داشیییریق.»
بونو دا آرتیردیم: «سیز اؤزگه‌سی اوچون دئییل، یالنیز اؤزونوز اوچون بونو روا قیلا بیلرسینیز. بونون آدی ایثاردیر. ایثار دا انتحار کیمی سون مقامدا اینسانین فردی توتومو ایله علاقه‌داردیر. اؤلومده ماراقلیسینیزسا، زیندانا گئدیب، اعتصاب‌لا بو یولو سئچه بیلرسینیز. لاکین او زامان دا، سیز کؤنول وئرمه‌سه‌نیز بیله، باشقالاری‌نین باشلیجا گؤره‌وی سیزی قورتارماق اولاجاق.»
۳. اینسانین عمل‌لری اوچ یئره بؤلونور: ایش، ماراق و سیاست. ایش، گئییم-ایچیم کیمی ایلکین احتیاج‌لاری قارشیلاماق اوچون صرف ائدیلن آکسییادیر. ماراغی گئنیش آنلامدا ایشله‌دیرم. ماراق یاشامین کیفیتینی یوکسلدن اویون، اینجه‌صنعت، ریتوآل [آیین] و أیلنجه‌دن [سرگرمی‌دن] عیبارت‌دیر. ایش و ماراق اینسانین اؤزونه عایددیر. آمما سیاست فردی سینیرلاری آشیر، باشقالارینا عاید اولور. دئمک سیاست توپلومو گلیشدیرمک‌له باغلی‌دیر. اینسانین توپلوم ساحه‌سینده مدنیت و اویغارلیق یاراتماسی، اوچونجو تیپ عمل‌لرین سونوجودور. ایثار اوچونجو عمل‌لر چرچیوه‌سینده آنلام قازانیر.
سؤزسوز، ایثارین یوخلوغوندا یوکسک دوشونجه‌لر قاناد آچا بیلمز. ایثارین اولمادیغی یئرده مؤوجود دوروم‌لاری دییشیمه اوغراتماق چتین آلینار. لاکین أخلاق باخیمیندان، هر بیر شخص ایثاری یالنیز اؤزونه روا قیلا بیلر. باشقالاری‌نین بوندا حاققی یوخدور.
۴. بوردا اخلاق (یعنی یاخشی-یامان‌لیق) باخیش‌بوجاغیندان مسئله‌یه توخونورام، لاکین یارادیجیلیق عالمینده (گؤزه‌للیک ساحه‌سینده) ده بئله‌دیر. هئچ بیر اینجه‌صنعت اثری، نه تام ایثارا کؤکله‌نه بیلر، نه ده بوتونلوک‌له اوندان چکینه بیلر. تام یوکوم‌لولویه قورشانمیش اثر بیله، لذت‌له ایثار آراسینداکی اورتامدا گلیشیر، یارانیر.
چاغداش دونیا ایثارلا sacrifice کئفین enjoyment چارپیشماسیندان یوْغرولور. قوربانلیق گئتمک‌له کام‌آلما آراسیندا. بو قیل کؤرپوسونده، کئف‌له ایثارین اوْرتاق یؤنو اؤلوٍمون گوٍجونده‌دیر. اؤلوٍمون گوٍجو: بیر یاندان بدنین سیٌنیٌرلارینی آشماق، اوْ بیری یاندان ایسه یئنی یاشامین واسیطه‌سی اوْلان اؤلوٍمو سیناماق. بوردا کئفدن مقصد بدن چرچیوه‌سیندن داها آرتیغینی سیناماق‌دیر، ایثار ایسه دردین اوْتاییندا لذّت آختاریشی‌دیر، باشقا بیر دونیادا کام‌آلما ماراغی‌دیر. ایثار، سوْیوت بیر ایدئیانین اوغروندا جان‌یاندیرمادیر، فدا اوْلماق. کئف‌له ایثار أل‌بیردیرلر، آنجاق اینجه‌صنعت نه بونون، نه ده اوْنون جبهه‌سینده دؤیوشه بیلمز.
۵. کیمسه مکتب‌لری، ایدئولوگییالاری و مذهب‌لری نجات وئرمه‌یه بورجلو دئییل، اینسان‌لاری قورتارماقدا گؤره‌ولی‌دیر. مکتب‌لر، ایدئولوگییالار و مذهب‌لر اینسانین قورتولوشونا آدانمالی‌دیر.
ایواز طاها
