میلی مدنیتین گوجلنمه سی، یایغین حال آلماسی و گونوموزده کی یاشاما اویغونلاشماسی قارشییزدا کی ان اؤنملی قونولاردان حساب اولونماقدایر. بونا انگل ایسه توپلوم اولاراق اختیارسیزلیق و فرد اولاراق سلیقه لر و شخصی منافعه بوغولماقلاردیر.

نه یازیق کی میلتیمیز بللی ندن لردن دولایی تام بیر اختیارسیز دوروما دوشوب و یالنیز باشقالارینین (ایستر توپلوم اولاراق، ایستر فرد اولاراق) ایستک و ماراقلارینی یئرینه گتیرمه یه زورلانیلماقدادیر. باشقا یؤندن بو آغیر دورومون سونوجوندان دولایی شخصی (روحی)خسته لیک لری معیار قبول ائدرک، هر بیر قونودا شخصی سلیقه و ماراق اساس رول اویناماقدادیر. بو شرایط بیزی توپلوم اولاراق گلیشمیشلیکدن و مدنی لشمک دن، فرد اولاراق یوکسک معنوی کیفیتلر و اؤزه للیکلر قازانماقدان گئری قویوب، تام بیر اوچونجو دونیا جمعیتینین تیپیک بیر اؤرنه یینه چئویرمیشدیر.

درین، فایدالی و قاپساملی اولاراق ،دوشونجه و کولتور قیتلیغیندا هر بیر دوشونجه یوخسولو فیلسوف لوق و هر بیر شارلاتان مدنیت خادیمی اؤرتویونه بورونوب اؤزونو توپلوما تحمیل ائتمک دردینه دوشور.

سونوج ایسه اورتادادیر. تام آنلامیندا میلی بیر فلاکت ده یاشایان جمعیت و شخصی ماراقلاریندا بوغولان فردلر.

بوگون میلت اولاراق اؤزوموزه اؤزگو و دونیا استانداردلارینا اویغون یاشام بیچیمی یارادیب و گلیشدیرمه سک ،صاباحیمیزدا بو گونوموزدن فرقلی اولمایاجاقدیر. بونون اوچونده مدنیت ارث و ماهیتیمیزی تانیییب ،سونرا انتقاد سوزکئچیندن کئچیریب ،الده قالانی تمل قبول ائده رک اونون چئوره سینده گونه اویغون منسجیم بیر یاشام بیچیمی و مدنیت دونیاسی هؤروب یاراتماغیمیز چوخ اؤنملی دیر.

بئله لیک له طالعیمیزی بیر سیرا دوشونجه یوخسوللاری و شارلاتانلاردان قورتاریب و میلتیمیزی بوندان آرتیق اؤزگه لشمک دن و اونا-بونا اویونچاق اولماقدان قورتارا بیلریک.